Read Nepali New Revised Version, 2012 २ शमूएल 22 Bible Online

२ शमूएल 22 - Nepali New Revised Version, 2012 bible

२ शमूएल 22

¹जुन दिन परमप्रभुले दाऊदलाई तिनका सबै शत्रुहरू र शाऊलको हातबाट छुटाउनुभयो, त्‍यस दिन तिनले गाएको भजनका शब्‍दहरू यी नै हुन्‌:

²परमप्रभु मेरो चट्टान, मेरो किल्‍ला र मेरा उद्धारक हुनुहुन्‍छ।

³मेरा परमेश्‍वर मेरो चट्टान हुनुहुन्‍छ, जसमा म शरण लिन्‍छु। उहाँ मेरो ढाल, मेरा शक्तिशाली उद्धारक, मेरो गढ़, मेरो शरणस्‍थान र मेरा उद्धारकर्ता हुनुहुन्‍छ। तपाईं मलाई हिंसात्‍मक मान्‍छेबाट बचाउनुहुन्‍छ।

⁴म परमप्रभुलाई पुकार्छु, जो प्रशंसाको योग्‍य हुनुहुन्‍छ, अनि म मेरा शत्रुहरूबाट बचाइनेछु।

⁵“मृत्‍युका छालहरूले मलाई घेरे, विनाशको बाढ़ीले मलाई व्‍याकुल बनायो।

⁶पातालका डोरीहरूले मलाई बेह्रे, मृत्‍युको पासोले मेरो सामना गर्‍यो।

⁷मेरो आपत्‌मा मैले परमप्रभुलाई पुकारा गरें, मैले मेरा परमेश्‍वरलाई हपारें। आफ्‍नो मन्‍दिरबाट उहाँले मेरो सोर सुन्‍नुभयो, र मेरो पुकारा उहाँका कानमा पुग्‍यो।

⁸पृथ्‍वीमा कम्‍पन भयो, अनि भूकम्‍प गयो, आकाशका जगहरू हल्‍लिए। तिनीहरू थरथर कामे, किनभने उहाँ रिसाउनुभएको थियो।

⁹उहाँको नाकबाट धूवाँ निस्‍क्‍यो, र भस्‍मकारी अग्‍नि उहाँको मुखबाट निस्‍क्‍यो, जलिरहेको आगोको भुङ्‌ग्रो त्‍यसभित्र दन्‍क्‍यो।

¹⁰स्‍वर्गलाई फारेर उहाँ तल ओर्लनुभयो। अँध्‍यारो बादल उहाँका गोड़ामुनि थियो।

¹¹उहाँ करूबहरूमाथि सवार भएर उड्‌नुभयो र बतासका पखेटामा सवार भई माथि उड्‌नुभयो।

¹²अन्‍धकारलाई उहाँले आफ्‍नो ओढ्‌ने तुल्‍याउनुभयो, पानीले काला भइसकेका बाक्‍ला बादललाई उहाँले आफ्‍नो मण्‍डप तुल्‍याउनुभयो।

¹³उहाँका उपस्‍थितिको उज्‍ज्‍वलताबाट बिजुली निस्‍किगए। असिना र आगोको भुङ्‌ग्रो।

¹⁴परमप्रभु स्‍वर्गबाट गर्जनुभयो, र सर्वोच्‍चको सोर गुञ्‍जायमान भयो।

¹⁵उहाँले आफ्‍ना काँड़हरू हान्‍नुभयो, र शत्रुहरूलाई तितरबितर पारिदिनुभयो। अनि चट्याङद्वारा तिनीहरू अस्‍तव्‍यस्‍त भए।

¹⁶परमप्रभुको हप्‍कीमा उहाँको नाकबाट निस्‍केको श्‍वासको विस्‍फोटले समुद्रका तहहरू देखा परे, र पृथ्‍वीका जगहरू प्रकट भए।

¹⁷“उहाँले माथिबाट आफ्‍नो बाहुली पसारेर मलाई समात्‍नुभयो। उहाँले गहिरो सागरबाट मलाई तानेर निकाल्‍नुभयो।

¹⁸उहाँले मलाई मेरा शक्तिशाली शत्रुबाट छुटाउनुभयो, मेरा शत्रुहरूबाट, जो मभन्‍दा अत्‍यन्‍तै शक्तिशाली थिए।

¹⁹मेरो विपत्तिको दिनमा तिनीहरू ममाथि आइलागे, तर परमप्रभु मेरा सहारा हुनुभयो।

²⁰उहाँले मलाई फराकिलो ठाउँमा ल्‍याउनुभयो, उहाँले मलाई उद्धार गरिदिनुभयो, किनकि उहाँ मसँग प्रसन्‍न हुनुभएको थियो।

²¹“मेरो धार्मिकताअनुसार परमप्रभुले मसँग व्‍यवहार गर्नुभयो। मेरा हातका शुद्धताको अनुरूप उहाँले मलाई प्रतिफल दिनुभयो।

²²किनकि म परमप्रभुको मार्गमा चलेको छु, मेरा परमेश्‍वरबाट तर्केर मैले दुष्‍टता गरेको छैनँ।

²³उहाँका सारा नियमहरू मेरै सामुन्‍ने छन्, र उहाँका कानूनहरू मैले त्‍यागेको छैनँ।

²⁴उहाँको दृष्‍टिमा म निर्दोष थिएँ, र दोषबाट मैले आफैलाई अलग्‍ग राखें।

²⁵परमप्रभुले मेरो धार्मिकताअनुसार र उहाँको दृष्‍टिमा मेरो शुद्धताको अनुरूप मलाई प्रतिफल दिनुभएको छ।

²⁶वफादारप्रति तपाईं वफादार हुनुहुन्‍छ, निर्दोषसँग तपाईं आफूलाई निर्दोष प्रकट गर्नुहुन्‍छ।

²⁷शुद्धसँग तपाईं आफै शुद्ध देखा पर्नुहुन्‍छ, तर बाङ्गोसँग तपाईं आफूलाई चतुर प्रकट गर्नुहुन्‍छ।

²⁸दीन-हीन मानिसहरूलाई तपाईं छुटाउनुहुन्‍छ, तर अहङ्कारीहरूलाई झुकाउनका निम्‍ति तपाईंको नजर तिनीहरूमाथि पर्छ।

²⁹हे परमप्रभु, तपाईं मेरो दियो हुनुहुन्‍छ, परमप्रभुले मेरो अन्‍धकारलाई उज्‍यालोमा परिवर्तन गर्नुहुन्‍छ।

³⁰तपाईंको सहायताले म फौजमाथि आक्रमण गर्न सक्‍छु, र मेरा परमेश्‍वरको सहायताले म पर्खाल नाघ्न सक्‍छु।

³¹“परमेश्‍वरको विषयमा भन्‍ने हो भने, उहाँको मार्ग सिद्ध छ, परमप्रभुको वचन सच्‍चा छ। उहाँमा शरण लिनेहरू सबैका निम्‍ति उहाँ ढाल हुनुहुन्‍छ।

³²किनकि परमप्रभुबाहेक अरू को परमेश्‍वर छ र? हाम्रा परमेश्‍वरबाहेक अरू चट्टान को छ र?

³³उनै परमेश्‍वर, जसले मलाई शक्तिशाली तुल्‍याउनुहुन्‍छ, र मेरो मार्गलाई सिद्ध तुल्‍याउनुहुन्‍छ।

³⁴उहाँले मेरा खुट्टाहरू मृगका खुट्टाजस्‍तै तुल्‍याउनुहुन्‍छ, र उच्‍च स्‍थानमा खड़ा हुन मलाई सक्षम बनाउनुहुन्‍छ।

³⁵उहाँले मेरा हातहरूलाई युद्धको निम्‍ति तालीम दिनुहुन्‍छ, यसैले मेरा पाखुराले काँसाको धनु झुकाउन सक्‍छन्‌।

³⁶तपाईंले मलाई आफ्‍नो विजयको ढाल दिनुभएको छ, स्‍वयम्‌ तपाईं मलाई महान्‌ बनाउन झुक्‍नुहुन्‍छ।

³⁷मेरा पाइलाहरूका निम्‍ति तपाईं फराकिलो बाटो बनाउनुहुन्‍छ, र मेरा गोड़ा चिप्‍लनेछैनन्‌।

³⁸“मेरा शत्रुहरूलाई खेदेर मैले नाश गरें, तिनीहरू संहार नहोउञ्‍जेल म फर्किनँ।

³⁹मैले तिनीहरूलाई खतम पारें, तिनीहरू फेरि उठ्‌न सकेनन्, तिनीहरू मेरा पाउमुनि लोटे।

⁴⁰तपाईंले मलाई लड़ाइँको निम्‍ति शक्तिशाली तुल्‍याउनुभयो, मेरा शत्रुहरूलाई तपाईंले मेरा खुट्टामा झुकाउनुभयो।

⁴¹तपाईंले मेरा शत्रुहरूलाई पिठिउँ फर्काएर भाग्‍न विवश पार्नुभयो, र मेरा वैरीहरूलाई मैले संहार पारें।

⁴²मदतको निम्‍ति तिनीहरूले पुकारे, तर तिनीहरूलाई बचाउने कोही थिएन। तिनीहरूले परमप्रभुलाई पनि पुकारे, तर उहाँले तिनीहरूलाई जवाफ दिनुभएन।

⁴³भूइँको धूलोजस्‍तै मैले तिनीहरूलाई धूलोपीठो पारेँ, गल्‍लीको हिलोझैँ मैले तिनीहरूलाई कुल्‍चें।

⁴⁴“मेरा मानिसहरूको आक्रमणबाट तपाईंले मलाई छुट्ट्याउनुभएको छ, तपाईंले मलाई जाति-जातिहरूका नेता हुनलाई जोगाउनुभएको छ, अपरिचित मानिसहरू मेरो अधीनमा छन्‌।

⁴⁵विदेशीहरू दण्डवत् गर्दै मकहाँ आउँछन्, मेरो आदेश सुन्‍ने बित्तिकै तिनीहरूले सो पालन गर्छन्‌।

⁴⁶विदेशीहरू डरले शिथिल हुन्‍छन्, तिनीहरू आ-आफ्‍ना किल्‍लाहरूबाट डरले काम्‍दै निस्‍कन्‍छन्‌।

⁴⁷“परमप्रभु जीवित हुनुहुन्‍छ! मेरो चट्टानको स्‍तुति-प्रशंसा होस्‌! परमेश्‍वर मेरा चट्टान, मेरा उद्धारक उच्‍च होऊन्‌।

⁴⁸उहाँ परमेश्‍वर हुनुहुन्‍छ, जसले मेरो बदला लिनुहुन्‍छ, उहाँले नै मानिसहरूलाई मेरो अधीनमा पार्नुहुन्‍छ,

⁴⁹उहाँले मलाई मेरा शत्रुहरूबाट छुटाउनुहुन्‍छ। मेरा शत्रुहरूमाथि तपाईंले मलाई उच्‍च पार्नुभयो, हिंसक मानिसहरूबाट तपाईंले मलाई छुटाउनुभयो।

⁵⁰यसैकारण हे परमप्रभु, जातिहरूका बीचमा म तपाईंको प्रशंसा गर्नेछु, र तपाईंका नाउँको स्‍तुति गाउनेछु।

⁵¹उहाँले आफ्‍ना राजाहरूलाई महान्‌ विजय दिनुहुन्‍छ, र उहाँका अभिषिक्त राजा दाऊद र तिनका वंशमाथि उहाँले सदासर्वदा आफ्‍नो अचूक करुणा देखाउनुहुन्‍छ।”