Read Nepali New Revised Version, 2012 २ शमूएल 4 Bible Online

२ शमूएल 4 - Nepali New Revised Version, 2012 bible

२ शमूएल 4

¹जब शाऊलका छोरा ईश्‍बोशेतले हेब्रोनमा अबनेर मारिएको कुरा सुने, तब तिनको हात-खुट्टै गल्‍यो र सारा इस्राएलीहरू घबराए।

²ईश्‍बोशेतका दुई जना मानिसहरू थिए, जो लूटपीट गर्नेहरूका अगुवा थिए, जसका नाउँ बानाह र रेकाब थिए। उनीहरू बेन्‍यामीन कुलका बेरोती रिम्‍मोनका छोराहरू थिए। बेरोत पनि बेन्‍यामीनसँगै गनिएको छ,

³किनभने बेरोतीहरू गित्तैममा भागेर गएका थिए, र त्‍यस बेलादेखि अहिलेसम्म त्‍यहीँ नै बसोबास गरेका छन्‌।

⁴(शाऊलका छोरा जोनाथनको एक जना छोरा थियो, जो दुवै खुट्टाको लङ्गड़ो थियो। यिजरेलबाट शाऊल र जोनाथनका मृत्‍युको समाचार आउँदा त्‍यो पाँच वर्षको थियो। त्‍यसकी धाईले त्‍यसलाई बोकेर भागेकी थिइन्, तर तिनी हतार-हतार गरी जाँदा त्‍यो लड्‌यो, र लङ्गड़ो भयो। त्‍यसको नाउँ मपीबोशेत थियो।)

⁵बेरोती रिम्‍मोनका छोराहरू रेकाब र बानाह, मध्‍यदिनमा ईश्‍बोशेत विश्राम गरिरहेको बेलामा तिनको घरमा आए, र भित्र पसे।

⁶उनीहरू घरको भित्री भागतिर गहूँ लिन गएजस्‍तो गरी गए र त्‍यहाँ उनीहरूले तिनलाई पेटमा छुरी हाने। त्‍यसपछि रेकाब र बानाह सुटुक्‍क निस्‍के।

⁷ईश्‍बोशेत आफ्‍नो कोठामा सुतिरहेको बेलामा उनीहरू घरभित्र पसेका थिए। तिनलाई छुरी हानी मारिसकेपछि उनीहरूले तिनको शिर काटे र त्‍यो आफूसँग लगे, र अराबाबाट रातभरि हिँड़ेर गए।

⁸उनीहरूले ईश्‍बोशेतको टाउको हेब्रोनमा दाऊदकहाँ ल्‍याए, र राजालाई भने, “हजूरको प्राण लिन खोज्‍ने, हजूरको शत्रु शाऊलका छोरा ईश्‍बोशेतको टाउको यहाँ छ। परमप्रभुले शाऊल र उनको घरानालाई आज हजूरको निम्‍ति साटो फेर्नुभयो।”

⁹दाऊदले बेरोती रिम्‍मोनका छोराहरू रेकाब र त्‍यसका भाइ बानाहलाई जवाफ दिए, “परमप्रभु, जसले मलाई मेरा सबै कष्‍टबाट छुटाउनुभयो, जीवित परमप्रभुको नाउँमा शपथ खाएर म भन्‍दछु,

¹⁰शाऊल मरेको खबर राम्रो हो भनी ठानेर मकहाँ समाचार ल्‍याउने मानिसलाई मैले पक्रे, र मैले त्‍यसलाई सिक्‍लगमा मारें। मैले त्‍यसका समाचारको निम्‍ति त्‍यसलाई त्‍यही प्रतिफल दिएँ।

¹¹तर दुष्‍ट मानिसहरूले एक जना निर्दोष मानिसलाई त्‍यसकै घरमा त्‍यसको पलङ्गमा मार्छन्‌ भने झन्‌ कति बढ़ी प्रतिफल दिनुपर्ला! के मैले अब तिमीहरूले गरेको हत्‍याको बदला लिएर तिमीहरूलाई संसारदेखि खतम नगर्नु र?”

¹²तब दाऊदले आफ्‍ना मानिसहरूलाई हुकुम दिए, र तिनीहरूले उनीहरूलाई मारे। तिनीहरूले उनीहरूका हात-खुट्टा काटे, र हेब्रोनका पोखरीको छेउमा झुण्‍ड्याइदिए। तर ईश्‍बोशेतको टाउको चाहिँ तिनीहरूले लगेर हेब्रोनमा अबनेरको चिहानमा गाड़िदिए।