Read Nepali New Revised Version, 2012 २ शमूएल 7 Bible Online

२ शमूएल 7 - Nepali New Revised Version, 2012 bible

२ शमूएल 7

¹दाऊदले आफैलाई आफ्‍नो महलमा सुरक्षित पारेपछि, र तिनका चारैतिरका शत्रुहरूबाट परमप्रभुले तिनलाई विश्राम दिनुभएपछि,

²तिनले नातान अगमवक्तालाई भने, “म त देवदारुले बनाएको महलमा बस्‍दैछु, तर परमप्रभुको सन्‍दूक भने पालमा राखिएको छ।”

³नातानले राजालाई जवाफ दिए, “ठीक छ, तपाईंको मनमा जे छ सोही गर्नुहोस्, किनभने परमप्रभु तपाईंसँग हुनुहुन्‍छ।”

⁴त्‍यही रात परमप्रभुको यो वचन नातानकहाँ आयो:

⁵“गएर मेरो दास दाऊदलाई भन्, ‘परमप्रभु भन्‍नुहुन्‍छ: के मेरो निम्‍ति तैंले नै एउटा घर बनाउनेछस्‌ र?

⁶इस्राएललाई मिश्रदेशबाट ल्‍याएको दिनदेखि आजको दिनसम्‍म म कहिल्‍यै कुनै घरमा बसेको छैनँ। जहाँ-जहाँ बसे पनि म पालमा नै बस्‍दैआएको छु।

⁷म इस्राएलसँग जहाँ पनि यात्रा गरें, के मैले मेरो प्रजा इस्राएलका गोठालाहरूमध्‍ये कुनै शासकलाई “मेरो निम्‍ति देवदारुको घर किन बनाइनस्‌?” भनेर सोधें र?’

⁸“यसैले मेरो दास दाऊदलाई भन्, ‘सर्वशक्तिमान्‌ परमप्रभु भन्‍नुहुन्‍छ: मैले तँलाई मेरो प्रजा इस्राएलको गोठालो हुनलाई खर्कबाट र भेड़ाहरूका पछिपछि लाग्‍नबाट बोलाएँ।

⁹जहाँ-जहाँ तँ गइस्‌ म तँसँग रहें, र तेरा सबै शत्रुलाई तेरो बाटोदेखि नाश गरिदिएँ। अब पृथ्‍वीका प्रतिष्‍ठित व्‍यक्तिहरूका बीचमा म तेरो नाउँ महान्‌ बनाउनेछु।

¹⁰म मेरो प्रजा इस्राएलको निम्‍ति एउटा स्‍थान नियुक्त गर्नेछु, र तिनीहरूका आफ्‍नै एउटा वासस्‍थान हुनेछ र तिनीहरूलाई कसैले फेरि कहिल्‍यै सताउनेछैन। सुरु-सुरुमा गरेझैँ,

¹¹अनि मेरो प्रजा इस्राएलमाथि न्‍यायकर्ताहरू [1] नियुक्त गरेको समयदेखि यसो, तिनीहरूलाई दुष्‍ट मानिसहरूले अत्‍याचार गर्नेछैनन्‌। म तँलाई तेरा सबै शत्रुहरूदेखि विश्राम पनि दिनेछु। “‘परमप्रभुले तेरो राजघराना स्‍थापना गर्नुहुनेछ भनी परमप्रभुले तँलाई भन्‍नुभएको छ।

¹²जब तेरो दिन पूरा हुनेछ, र तँ आफ्‍ना पित्रहरूसँग विश्राम गर्नेछस्, तब म तेरै सन्‍तानमध्‍येबाट, तेरै शरीरबाट एक जना, तेरो उत्तराधिकारी हुनलाई उठाउनेछु, र त्‍यसको राज्‍य स्‍थिर गराउनेछु।

¹³त्‍यसले नै मेरो नाउँको निम्‍ति एउटा भवन बनाउनेछ, र म त्‍यसको राजकीय सिंहासन सधैँको निम्‍ति स्‍थिर गर्नेछु।

¹⁴म त्‍यसका पिता हुनेछु, र त्‍यो मेरो छोरो हुनेछ। त्‍यसले अधर्म गर्‍यो भने, मानिसको लट्ठीले म त्‍यसलाई सजाय दिनेछु, र मानिसहरूद्वारा त्‍यसलाई कोर्राबाजीको प्रहार गर्नेछु।

¹⁵तर मैले मेरो प्रेम शाऊलबाट हटाएझैँ, जसलाई मैले तेरो बाटोदेखि पन्‍छाएँ, म मेरो प्रेम त्‍यसदेखि कहिल्‍यै हटाउनेछैनँ।

¹⁶तेरो घराना र तेरो राज्‍य मेरो सामुन्‍ने सधैँभरि रहिरहनेछ, र तेरो सिंहासन सदासर्वदाको लागि स्‍थिर हुनेछ’।”

¹⁷आफूलाई दर्शनमा भनिएका सबै कुरा नातानले दाऊदलाई सुनाइदिए।

¹⁸तब दाऊद राजा परमप्रभुको उपस्‍थितिमा हाजिर भए, र त्‍यहाँ बसेर भने: “हे परमप्रभु परमेश्‍वर, म को हुँ, मेरो घराना के हो, र तपाईंले मलाई यहाँसम्‍म ल्‍याउनुभयो?

¹⁹यो सबैचाहिँ तपाईंको दृष्‍टिमा एउटा सानो विषयजस्‍तो ठानेर तपाईंले त आफ्‍नो दासलाई त्‍यसको घरानाको भविष्‍य नै बताइदिनुभयो। हे परमप्रभु परमेश्‍वर, के यो सब तपाईंले सधैँ नै गर्ने व्‍यवहार हो र?

²⁰“अनि अब दाऊद अरू बढ्‌ता के भन्‍न सक्‍छ र? किनभने तपाईंले आफ्‍नो दासलाई राम्ररी चिन्‍नुहुन्‍छ, हे परमप्रभु परमेश्‍वर!

²¹तपाईंका वचनको खातिर र आफ्‍नो इच्‍छाअनुसार नै तपाईंले यो महान्‌ काम गर्नुभएको छ र आफ्‍नो दासलाई यो बताउनुभएको छ।

²²“हे परमप्रभु परमेश्‍वर, तपाईं साँच्‍चै महान्‌ हुनुहुन्‍छ। तपाईंजस्‍तै अरू कसैको विषयमा हामीले कहिल्‍यै सुनेका छैनौं। तपाईंबाहेक अरू ईश्‍वर छैन।

²³अनि तपाईंको आफ्‍नै जाति इस्राएलजस्‍तो अरू को छ? पृथ्‍वीको एउटा त्‍यस जातिलाई परमेश्‍वरले नै आफ्‍नो निम्‍ति छुटकारा दिनुभयो, जसद्वारा तपाईंले आफ्‍नो नाउँ फैलाउनुभयो र मिश्रबाट छुट्ट्याउनुभएको आफ्‍नो प्रजाको बाटोदेखि अरू जातिहरू र उनीहरूका देवदेवताहरूलाई धपाइदिनुभई महान्‌ डरलाग्‍दा र उदेकका कार्यहरू गर्नुभयो।

²⁴तपाईंले आफ्‍नै प्रजा इस्राएललाई सदासर्वदाको निम्‍ति आफ्‍नै तुल्‍याउनलाई स्‍थिर गर्नुभएको छ, अनि हे परमप्रभु, तपाईं तिनीहरूका परमेश्‍वर हुनुभएको छ।

²⁵अब हे परमप्रभु परमेश्‍वर, आफ्‍नो दास र त्‍यसको घरानासित गर्नुभएको प्रतिज्ञाअनुसार सधैँभरि गर्नुहोस्‌। तपाईंले भन्‍नुभएजस्‍तै गर्नुहोस्,

²⁶ताकि तपाईंको ख्‍याति सदासर्वदै महान्‌ होस्, र मानिसहरूले यसो भनून्, ‘सर्वशक्तिमान्‌ परमप्रभु इस्राएलमाथि परमेश्‍वर हुनुहुन्‍छ।’ अनि आफ्‍नो दास दाऊदको घराना तपाईंको सामु स्‍थिर भइरहनेछ।

²⁷“हे सर्वशक्तिमान्‌ परमप्रभु, इस्राएलका परमेश्‍वर, तपाईंले आफ्‍नो दासलाई, मलाई, यसो भनेर आफ्‍नो अभिप्राय देखाउनुभयो, ‘म तेरो निम्‍ति एउटा घरानाको निर्माण गर्नेछु’। यसैकारण साहससँग म तपाईंकहाँ यो प्रार्थना चढ़ाइरहेछु।

²⁸हे परमप्रभु परमेश्‍वर, तपाईं परमेश्‍वर हुनुहुन्‍छ। तपाईंका वचन विश्‍वासयोग्‍य छन्, अनि तपाईंले आफ्‍नो दाससँग यी उत्तम प्रतिज्ञाहरू गर्नुभएको छ।

²⁹यसैले अब आफ्‍नो दासको घरानालाई आशिष्‌ दिनुहोस्, र त्‍यो तपाईंको नजर अगि रहिरहोस्‌। किनकि हे परमप्रभु परमेश्‍वर, तपाईंले बोल्‍नुभएको छ, र तपाईंका आशिष्‌द्वारा नै तपाईंको दासको घरानाले सदासर्वदाको आशिष्‌ पाउनेछ।”