Read Nepali New Revised Version, 2012 १ राजाहरू 6 Bible Online

१ राजाहरू 6 - Nepali New Revised Version, 2012 bible

१ राजाहरू 6

¹इस्राएलीहरू मिश्रदेशबाट निस्‍केर आएका चार सय असीऔँ वर्षमा, सोलोमनले इस्राएलीमाथि राज्‍य गरेका चौथो वर्षको जीभ, अर्थात्‌ दोस्रो महिनामा तिनले परमप्रभुको मन्‍दिर बनाउन सुरु गरे।

²परमप्रभुको निम्‍ति सोलोमन राजाले बनाएको मन्‍दिरको लमाइ साठी हात, चौड़ाइ बीस हात र उचाइ तीस हात थियो।

³मन्‍दिरको मुख्‍य सभाकक्षको सामुको दलान मन्‍दिरको चौड़ाइभरि फैलिएको थियो, अर्थात्‌ बीस हात चौड़ा थियो। मन्‍दिरको अघिल्‍तिर त्‍यो दश हातसम्‍म निस्‍केको थियो।

⁴तिनले मन्‍दिरको छानामुनिका साँघुरा झ्‍यालहरू बनाए।

⁵मुख्‍य सभाकक्ष र भित्री पवित्रस्‍थानको विपरीत तिनको भवनका चारैपट्टि भित्तासँगै गाँसेका कोठाहरू बनाए।

⁶सबैभन्‍दा मुनिका तलाको चौड़ाइ पाँच हात थियो। बीचका तलाको चौड़ाइ छ हात र तेस्रो तलाको चाहिँ सात हात थियो। तिनले मन्‍दिरका चारैपट्टि बाहिरतिर मन्‍दिरको भित्तामा केही नघुसाऊन्‌ भनी पालीहरू बनाए।

⁷मन्‍दिर बनाउँदा ढुङ्गाको खानिमै तयार गरिएका टुक्राहरू मात्र प्रयोग गरिए। घन वा छिनु वा कुनै किसिमका फलामका औजारको आवाज पनि मन्‍दिर निर्माण गर्ने ठाउँमा सुनिएन।

⁸सबैभन्‍दा तल्‍लो तलाको द्वार मन्‍दिरको दक्षिणपट्टि थियो। त्‍यहाँबाट बीचको र माथिल्‍लो तलामा जानलाई सिँढ़ी थियो।

⁹यसरी दलिन र देवदारुका फल्‍याकहरूबाट त्‍यसको छाना बनाएर तिनले मन्‍दिर सिद्ध्याए।

¹⁰तिनले मन्‍दिरका चारैतिर ससाना कोठाहरू बनाए। प्रत्‍येक कोठा पाँच हात अग्‍लो थियो, र मन्‍दिरसँगै देवदारुका काठका सत्तरीले जोड़िएका थिए।

¹¹तब परमप्रभुको यो वचन सोलोमनकहाँ आयो:

¹²“तैंले बनाइरहेको यस मन्‍दिरको विषयमा चाहिँ यसो हुन्‍छ, यदि तैंले मेरा उर्दीहरू पालन गरिस्‌ र मेरा विधिहरूबमोजिम गरिस्‌ भने, र मेरा सबै आज्ञाहरू पालन गरिस्‌ भने, मेरो त्‍यो प्रतिज्ञा तँद्वारा म पूरा गर्नेछु, जो मैले तेरो पिता दाऊदसँग गरेको थिएँ।

¹³र म इस्राएलको बीचमा रहनेछु, र मेरो प्रजा इस्राएललाई म त्‍याग्‍नेछैनँ।”

¹⁴यसरी सोलोमनले परमप्रभुको मन्‍दिर बनाएर सिद्ध्याए।

¹⁵तिनले मन्‍दिरको भूइँदेखि दलिनसम्‍म भित्रपट्टिका भित्ता देवदारुका फलेकहरूले मिलाएर भरिदिए।

¹⁶मन्‍दिरभित्र पछाड़िपट्टि तिनले भूइँदेखि दलिनसम्‍म देवदारुका फलेकहरू मिलाएर बीस हात लामो भित्री पवित्रस्‍थान, अर्थात्‌ महा-पवित्रस्‍थान बनाए।

¹⁷त्‍यसको अगिल्‍तिरको मुख्‍य सभाकक्ष चालीस हात लामो थियो।

¹⁸मन्‍दिरका भित्रपट्टिको देवदारुको काठमा चाहिँ फक्रेका फूल र लौकाका बुट्टा कुँदिएका थिए। ती सबै देवदारुका थिए। ढुङ्गा एउटै पनि देखिँदैनथ्‍यो।

¹⁹मन्‍दिरको भित्रपट्टि परमप्रभुका करारको सन्‍दूक राख्‍नलाई तिनले त्‍यो भित्री पवित्रस्‍थान तयार पारे।

²⁰यो भित्री पवित्रस्‍थान बीस हात लामो, बीस हात चौड़ा र बीस हात अल्‍गो थियो। तिनले त्‍यसलाई कञ्‍चन सुनले मोहोरे र देवदारुको वेदी पनि मोहोरे।

²¹सोलोमनले मन्‍दिरको भित्री भाग कञ्‍चन सुनले ढाके, र सुनले मोहोरिएको भित्री पवित्रस्‍थानको सामुन्‍ने तिनले सुनका सिक्रीहरू झुण्‍ड्याएर बढ़ाए।

²²यसरी तिनले भित्री भाग जम्‍मै सुनले मोहोरे। भित्री पवित्रस्‍थानमा भएको वेदी पनि तिनले सुनले मोहोरे।

²³भित्री पवित्रस्‍थानमा तिनले भद्राक्षको काठबाट दुई वटा करूब बनाए। प्रत्‍येक करूब दश हात अल्‍गो थियो।

²⁴पहिलो करूबको एउटा पखेटा पाँच हात लामो थियो र अर्को पनि पाँच हात लामो थियो। एउटा पखेटाको टुप्‍पादेखि अर्को पखेटाको टुप्‍पासम्‍म दश हात थियो।

²⁵दोस्रो करूबको नाप पनि दश हात थियो, किनकि ती दुई करूबहरू कद र आकारमा एकै थिए।

²⁶प्रत्‍येक करूबको उचाइ दश हात थियो।

²⁷तिनले ती करूबहरूलाई मन्‍दिरको भित्री कोठामा राखे। तिनीहरूका पखेटाचाहिँ बाहिरतिर फैलिएका थिए। एउटा करूबको एउटा पखेटाले एकापट्टिको भित्तालाई र अर्को करूबको एउटा पखेटाले अर्कोपट्टिको भित्तालाई छुन्‍थे, र तिनीहरूका अर्का पखेटाहरूचाहिँ कोठाको बीचमा छुन्‍थे।

²⁸तिनले ती करूबहरूलाई सुनले मोहोरे।

²⁹मन्‍दिरका चारैपट्टिका भित्री र बाहिरी कोठाहरूका सबै भित्ताहरूमा तिनले करूबहरू, खजूरका बोटहरू र फक्रेका फूलहरूका बुट्टा कुँदेर बनाए।

³⁰तिनले मन्‍दिरका भित्री र बाहिरी दुवै कोठाहरूका भूइँ पनि सुनले मोहोरे।

³¹भित्री पवित्रस्‍थानको द्वारको निम्‍ति तिनले पाँच पट्टिका थाम भएका भद्राक्षको काठका ढोकाहरू बनाए।

³²अनि ढोकाहरूमा तिनले करूबहरू, खजूरका बोटहरू र फक्रेका फूलहरूका बुट्टा कुँदेर बनाए, र करूबहरू र खजूरका बोटहरूचाहिँ पिटेका सुनले मोहोरे।

³³त्‍यस्‍तै गरी तिनले मन्‍दिरको मुख्‍य सभाकक्षका द्वारको निम्‍ति भद्राक्षको काठका चार पट्टिका थामहरू बनाए।

³⁴तिनले खोपिल्‍टामा घुम्‍ने दुई खापा भएका सल्‍लाका दुई वटा ढोका बनाए।

³⁵तिनले तिनमा करूबहरू, खजूरका बोटहरू र फक्रेका फूलहरूका बुट्टा कुँदेर बनाए, र ती बुट्टा सुनले बराबर मोहोरे।

³⁶अनि तिनले भित्री चोक काटेका ढुङ्गाका तीन लहर गरी र देवदारुका काठका सत्तरीको एक लहर गरी बनाए।

³⁷चौथो वर्षका जीभ महिनामा परमप्रभुका मन्‍दिरको जग बसालियो।

³⁸एघारौँ वर्षको बूल महिना, अर्थात्‌ आठौँ महिनामा त्‍यसको निर्देशअनुसार सबै विवरणबमोजिम मन्‍दिर बनाइसिद्ध्याइयो। त्‍यो निर्माण गर्न तिनलाई सात वर्ष लाग्‍यो।