Read Nepali New Revised Version, 2012 १ राजाहरू 7 Bible Online

१ राजाहरू 7 - Nepali New Revised Version, 2012 bible

१ राजाहरू 7

¹तर सोलोमनलाई आफ्‍नो महल निर्माण गर्न तेह्र वर्ष लाग्‍यो।

²तिनले सय हात लामो, पचास हात चौड़ा, तीस हात अल्‍गो, चार लहर देवदारुका स्‍तम्‍भ भएको, तिनका माथि देवदारुकै सत्तरी भएको लेबनानको वन भनिने महल बनाए।

³स्‍तम्‍भमा अड़िएका ती सत्तरीहरूमाथि देवदारुको छत लगाइयो— प्रत्‍येक लहरमा पन्‍ध्र वटा सत्तरी गरी जम्‍मै पैँतालीस वटा सत्तरी थिए।

⁴त्‍यसका झ्‍यालका तीन लहरहरूमा अल्‍गा गरी राखिएका थिए, ती आमनेसामने फर्केका थिए।

⁵सबै ढोकाका आयतकार चौकोसहरू थिए। ती अगाड़िपट्टि तीन-तीन वटाका पङ्‌क्तिमा एक-अर्कोतिर फर्केका थिए।

⁶तिनले पचास हात लामो र तीस हात चौड़ा स्‍तम्‍भहरूले घेरिएको चोक बनाए। त्‍यसको अगि एउटा दलान थियो, र त्‍यसको सामु खम्‍बाहरू र एउटा बाहिर निस्‍केको छत थियो।

⁷तिनले न्‍याय भवन, अर्थात्‌ सिंहासन भवन बनाए। त्‍यहीँ नै तिनले न्‍याय गर्थे। तिनले भूइँदेखि दलिनसम्‍म त्‍यसलाई देवदारुले छोपे।

⁸तिनले आफ्‍नै बस्‍ने महल त्‍यसको पछिल्‍तिर न्‍यायको भवनजस्‍तै बनाए। तिनले विवाह गरेर ल्‍याएकी फारोकी छोरीको निम्‍ति पनि त्‍यहीजस्‍तो महल बनाए।

⁹यी सबै भवनहरू बाहिरदेखि ठूलो चोकसम्‍म र जगदेखि छतसम्‍म करौँतीले ठीक परिमाणमा भित्री र बाहिरी मोहड़ामा काटिएका उच्‍च स्‍तरीय ढुङ्गाहरूले बनाइएका थिए।

¹⁰जगमा असल किसिमका ठूला ढुङ्गाहरू नापमा कोहीचाहिँ दश हात र कोहीचाहिँ आठ हातका थिए।

¹¹तिनको माथि उच्‍च स्‍तरीय ढुङ्गाहरू ठीक नापमा काटेर मिलाइएका र देवदारुका सत्तरी थिए।

¹²ठूलो चोकका चारैपट्टि काटेर मिलाइएका ढुङ्गाका तीन लहर थिए, र देवदारुका सत्तरीहरूको एक लहर थियो। परमप्रभुका मन्‍दिरको भित्री चोक र त्‍यसको दलान पनि त्‍यस्‍तै थिए।

¹³सोलोमन राजाले हुरामलाई टुरोसबाट बोलाइपठाए,

¹⁴जसकी आमा नप्‍ताली कुलकी एउटी विधवा थिइन्‌ र जसका पिताचाहिँ टुरोसवासी काँसाका निपुण कारीगर थिए। हुराम काँसाका सबै किसिमका काम गर्ने अत्‍यन्‍तै निपुण र अनुभवी मानिस थिए। तिनी सोलोमन राजाकहाँ आए र तिनलाई सुम्‍पिएका सबै कामहरू गरे।

¹⁵तिनले दुई वटा काँसाका स्‍तम्‍भहरू ढाले, नापमा प्रत्‍येकको अल्‍गाइ अठाह्र हात र फेरोचाहिँ बाह्र हातको थियो।

¹⁶तिनले स्‍तम्‍भहरूमाथि शिर राख्‍नलाई ढालेका काँसाका दुई वटा स्‍तम्‍भ-शिर पनि बनाए। प्रत्‍येक स्‍तम्‍भ-शिर पाँच हात अल्‍गो थियो।

¹⁷तिनले हरेक स्‍तम्‍भमाथि भएको स्‍तम्‍भ-शिरको निम्‍ति जाली स्‍वरूप सात वटा झुण्‍डिएका सिक्री बनाए।

¹⁸स्‍तम्‍भहरूका स्‍तम्‍भ-शिर सिँगार्नलाई हरेक सिक्रीको जालीका चारैपट्टि तिनले दुई लहर बुट्टादार दारिमहरू बनाए। तिनले हरेक स्‍तम्‍भ-शिरमा पनि त्‍यस्‍तै गरे।

¹⁹दलानभित्रका स्‍तम्‍भका स्‍तम्‍भ-शिरहरू लिली फूलको आकारका चार हात अल्‍गा थिए।

²⁰दुवै स्‍तम्‍भका स्‍तम्‍भ-शिरमा, जालीनेरको कचौराको आकार भएको भागमा, स्‍तम्‍भ-शिरका वरिपरि लहर-लहर गरी दुई सय बुट्टादार दारिम बनाइएका थिए।

²¹तिनले मन्‍दिरका दलानका अगाड़ि ती दुई स्‍तम्‍भहरू खड़ा गरे। तिनले दक्षिणपट्टिको स्‍तम्‍भको नाउँ याकीन राखे र उत्तरपट्टिको नाउँ बोअज राखे।

²²तिनका स्‍तम्‍भ-शिर लिली फूलका आकारका थिए। यसरी स्‍तम्‍भहरूको काम सिद्धियो।

²³तिनले साँचोमा ढालेर बनाइएको धातुको एउटा गोलाकार विशाल खड्‌कुँलो बनाए। त्‍यसको बिट एक किनारदेखि अर्को किनारसम्‍म दश हात थियो, र त्‍यो पाँच हात अल्‍गो थियो। त्‍यसको वरिपरि फेरो नाप्‍नलाई तीस हातको नाप्‍ने फित्ता चाहिन्‍थ्‍यो।

²⁴त्‍यस विशाल खड्‌कुँलोका चारैतिर बाहिरपट्टि बिटमुनि लौका, एक हातमा दश वटा, दुई लहरका थिए। खड्‌कुँलो र लौका एउटै टुक्रा धातुबाट बनिएका थिए।

²⁵त्‍यो खड्‌कुँलो बाह्र वटा साँढ़ेहरूमाथि राखिएको थियो— तीन वटा उत्तरतिर फर्केका, तीन वटा पश्‍चिमतिर फर्केका, तीन वटा दक्षिणतिर फर्केका र तीन वटा पूर्वतिर फर्केका थिए। तिनका पछिल्‍ला भाग भित्रपट्टि फर्केका थिए। त्‍यो खड्‌कुँलोचाहिँ तिनीहरू माथि थियो।

²⁶त्‍यसको चौड़ाइ चार अङ्‌गुल थियो, र त्‍यसको बिटचाहिँ कचौराको बिटजस्‍तै फक्रेको लिली फूलजस्‍तै थियो। त्‍यसमा प्राय: चवालीस हजार लिटर पानी अटाउँथ्‍यो।

²⁷तिनले काँसाका दश वटा आधारहरू पनि बनाए। प्रत्‍येक चार हात लामो, चार हात चौड़ा र तीन हात अल्‍गो थियो।

²⁸ती गुड्‌ने आधारहरू यसरी बनाइएका थिए: तिनका वरिपरिका पाटाहरू ठाड़ा फ्रेममा जोड़िएका थिए।

²⁹ती पाटाहरू र फ्रेमहरूमा पनि सिंहहरू, साँढ़ेहरू र करूबहरू थिए— फ्रेममाथि पनि।

³⁰प्रत्‍येक गुड्‌ने टेकामा काँसाका धुरा भएका चार वटा काँसाका चक्‍काहरू थिए। हरेकमा चार टेकामा अड़ेको एक बाटा थियो, जसका वरिपरि ढलौटे मालाहरू थिए।

³¹गुड्‌ने आधारभित्र खुला भाग थियो, जसको गोलाकार एक हात गहिरो गोला फ्रेम थियो। यसको खुला भाग गोलाकार थियो, र यसको तल्‍लो भागसमेत डेढ़ हात चौड़ा थियो। त्‍यसको खुला भागको वरिपरि बुट्टाहरू थिए। गुड्‌ने आधारका पाटाहरू गोला होइन तर वर्गाकार थिए।

³²ती चारै वटा चक्‍काहरू पाटाहरूका मुन्‍तिर थिए। चक्‍काहरूका धुराहरू गुड्‌ने आधारसँगै गाँसिएका थिए। हरेक चक्‍काको उचाइ डेढ़ हात थियो।

³³चक्‍काहरू रथका चक्‍काजस्‍तै बनाइएका थिए। तिनका धुरा, बिट, सुइरा र नाभिहरू सबै ढालेर बनाइएका धातुका थिए।

³⁴प्रत्‍येक गुड्‌ने आधारका चार वटा समात्‍ने बीँड़हरूचाहिँ एक-एक कुनामा थिए। ती गुड्‌ने आधारबाट बाहिर निस्‍केका थिए।

³⁵हरेक गुड्‌ने आधारका वरिपरि टुप्‍पामा आधा हात गहिरो गोलाकार धातुको फित्ता थियो। गुड्‌ने आधारका टेकाहरू र पाटाहरू त्‍यसकै टुप्‍पासँग गाँसिएका थिए।

³⁶पाटाहरूमा जहाँ-जहाँ खाली ठाउँ थिए, त्‍यहाँ-त्‍यहाँ तिनले करूबहरू, सिंहहरू र खजूरका बोटहरू र त्‍यसका वरिपरि मालाहरू कुँदेर बनाए।

³⁷यसरी नै तिनले ती दश वटा गुड्‌ने आधारहरू बनाए। ती सबै एउटै नाप र एउटै आकार भएका साँचोमा ढालेर बनाइएका थिए।

³⁸त्‍यसपछि तिनले काँसाका दश वटा बाटाहरू बनाए। प्रत्‍येक आठ सय असी लिटर पानी अटाउने र नापमा चार हात बराबर थियो। ती दशै वटा गुड्‌ने आधारका निम्‍ति एउटा-एउटा बाटा थियो।

³⁹तिनले पाँच वटा गुड्‌ने आधारहरू मन्‍दिरको दक्षिणपट्टि र पाँच वटा उत्तरपट्टि राखे। अनि पानीको खड्‌कुँलोचाहिँ मन्‍दिरको दक्षिणतिर, दक्षिण-पूर्वको कुनामा राखे।

⁴⁰तिनले बाटा र बेल्‍चाहरू र अरू विशेष छर्कने बाटाहरू बनाए। यसरी हुरामले परमप्रभुको मन्‍दिरमा सोलोमन राजाको लागि आफ्‍नो जिम्‍मामा लिएका सबै काम सिद्ध्याए:

⁴¹दुई स्‍तम्‍भहरू, स्‍तम्‍भका टुप्‍पामा कचौराको आकारका दुई स्‍तम्‍भ-शिर स्‍तम्‍भमाथिका स्‍तम्‍भ-शिरहरू सजाउने दुई बुट्टादार जालीहरू,

⁴²दुई जालीहरूका निम्‍ति चार सय दारिमहरू (दुई स्‍तम्‍भहरूका कचौराको आकार भएका स्‍तम्‍भ-शिरलाई ढाक्‍ने प्रत्‍येक जालीको निम्‍ति दुई लहर दारिमहरू),

⁴³दश वटा गुड्‌ने आधारहरू, तिनका दश वटा बाटाहरूसमेत,

⁴⁴एउटा विशाल खड्‌कुँलो र त्‍यसको मुन्‍तिर बाह्र वटा साँढ़ेहरू,

⁴⁵भाँड़ाहरू, बेल्‍चाहरू र छर्कने बाटाहरू। यी सबै चीजहरू, जो हुरामले परमप्रभुका मन्‍दिरको निम्‍ति सोलोमन राजाको लागि बनाएका थिए, टल्‍काइएका काँसाका थिए।

⁴⁶राजाले ती यर्दनको मैदानमा सुक्‍कोत र सार्तानको बीचमा साँचाहरूमा ढालेर बनाउन लगाएका थिए।

⁴⁷सोलोमनले यति धेरै चीजहरू बनाए कि ती नजोखी नै राखे। ती बनाउनलाई प्रयोग गरिएका काँसाको ओजन निधो गरिएन।

⁴⁸सोलोमनले परमप्रभुको मन्‍दिरका जम्‍मै सजाउने सामानहरू पनि बनाए: सुनको वेदी, उपस्‍थितिको रोटी राखिने सुनको टेबिल,

⁴⁹कञ्‍चन सुनका सामदान भित्री पवित्रस्‍थानको सामु दाहिनेपट्टि पाँच वटा र देब्रेपट्टि पाँच वटा, फूलको आकारका सुनका बुट्टाहरू, बत्तीहरू र चिम्‍टाहरू,

⁵⁰कञ्‍चन सुनका भाँड़ाहरू, सलेदाका चिम्‍टाहरू, छर्कने बाटाहरू, कचौराहरू र धुपौराहरू, सबैभन्‍दा भित्री कोठा, अर्थात्‌ महा-पवित्रस्‍थानका ढोकाहरूका लागि र मन्‍दिरको मुख्‍य सभाकक्षका ढोकाहरूका लागि सुनका खोपिल्‍टाहरू।

⁵¹जब सोलोमन राजाले परमप्रभुका मन्‍दिरको निम्‍ति सबै काम गरेर सके, तब तिनले आफ्‍ना पिता दाऊदले समर्पण गरेका थोकहरू, अर्थात्‌ चाँदी, सुन र सजाउने सामानहरू ल्‍याएर परमप्रभुका मन्‍दिरको भण्‍डारमा राखे।