Read Nepali New Revised Version, 2012 २ राजाहरू 11 Bible Online

२ राजाहरू 11 - Nepali New Revised Version, 2012 bible

२ राजाहरू 11

¹जब अहज्‍याहकी आमा अतल्‍याहले आफ्‍ना छोरा मरेका देखिन्, तब सबै राजघरानालाई नष्‍ट पार्न तिनी कारबाही गर्न लागिन्‌।

²तर यहोराम राजाकी छोरी, अहज्‍याहकी बहिनी यहोशेबाले अहज्‍याहका छोरा योआशलाई मारिन लागेका राजकुमारहरूका बीचबाट सुटुक्‍क भगाएर लगिन्‌। तिनले त्‍यसलाई र त्‍यसकी धाईलाई अतल्‍याहबाट लुकाउनलाई एउटा सुत्‍ने कोठामा लुकाइराखिन्, र यसरी त्‍योचाहिँ मारिएन।

³अतल्‍याहले देशमा शासन गर्दा यसरी त्‍यो आफ्‍नो धाईसित परमप्रभुको मन्‍दिरमा छ वर्षसम्‍म लुकेर बस्‍यो।

⁴सातौँ वर्षमा यहोयादाले एक सयको दलका कप्‍तानहरू, करीहरू र पहरादारहरूलाई बोलाएर परमप्रभुको मन्‍दिरमा ल्‍याउन पठाए। तिनले तिनीहरूसँग एउटा करार बाँधे, र तिनीहरूलाई परमप्रभुको मन्‍दिरमा शपथ खान लाए। तब तिनले तिनीहरूलाई राजाका छोरा देखाइदिए।

⁵तिनले तिनीहरूलाई यसो भनेर हुकुम दिए, “तिमीहरूले यसो गर्नुपर्छ: तिमीहरू जो तीन दलमा शबाथको काम गर्न जान्‍छौ— तिमीहरूमध्‍ये एक-तिहाइले चाहिँ राजमहलको रक्षा गर्ने,

⁶एक-तिहाइ सूर ढोकामा बस्‍ने, र मन्‍दिरको पालैपालो रक्षा गर्ने एक-तिहाइ गारदको पछि ढोकामा बस्‍ने—

⁷अनि तिमीहरू जो अरू दुई दलमा छौ जसले साधारणतया शबाथमा खटाइएका कामबाट फुर्सत पाउँछौ, तिमीहरू सबैले चाहिँ राजाका निम्‍ति मन्‍दिरको रक्षा गर्नू।

⁸तिमीहरू हरेक मानिस आ-आफ्‍नो हतियार हातमा लिएर राजाको वरिपरि तैनाथ गर्नू। तिमीहरूका नजिक आउने जोसुकैलाई पनि मारिहाल्‍नू। राजा जहाँ गए तापनि तिमीहरू तिनको नजिकै रहनुपर्छ।”

⁹यहोयादा पूजाहारीले हुकुम गरेबमोजिम नै एक-एक सयको दलका कप्‍तानहरूले गरे। हरेकले आ-आफ्‍ना मानिसहरू लिए— शबाथको काममा खटाइएकाहरू र काम सकेर फुर्सत पाएकाहरू दुवै— यहोयादा पूजाहारीकहाँ आए।

¹⁰तब तिनले कप्‍तानहरूलाई परमेश्‍वरको मन्‍दिरमा भएका दाऊदका भालाहरू र ढालहरू दिए।

¹¹ती अङ्गरक्षकहरू हरेक आ-आफ्‍नो हतियार हातमा लिई वेदी र मन्‍दिर नजिकै मन्‍दिरको दक्षिणपट्टिबाट उत्तरपट्टिसम्‍मै राजालाई घेरेर बसे।

¹²तब यहोयादाले राजाका छोरालाई बाहिर ल्‍याए, र तिनको शिरमा शिरपेच राखिदिए। यहोयादाले तिनलाई करारको एउटा साक्षी-पत्र चढ़ाए, र तिनलाई राजा घोषणा गरे। तिनीहरूले तिनलाई अभिषेक गरे, र मानिसहरूले ताली बजाए, र यसो भनी कराए, “राजा अमर रहून्‌।”

¹³जब अतल्‍याहले अङ्गरक्षकहरू र मानिसहरू कराएको आवाज सुनिन्, तब तिनी परमप्रभुको मन्‍दिरमा भएका मानिसहरूकहाँ गइन्‌।

¹⁴तिनले हेरिन्, र दस्‍तूरअनुसार राजालाई स्‍तम्‍भको छेउमा उभिएका देखिन्‌। अधिकृतहरू र तुरही फुक्‍नेहरू राजाको छेउमा थिए, र देशका जम्‍मै मानिसहरू तुरही फुक्‍दै आनन्‍द मनाइरहेका थिए। तब अतल्‍याहले आफ्‍ना लुगा च्‍यातिन्, र कराएर भनिन्, “राजविद्रोह! राजविद्रोह!”

¹⁵यहोयादा पूजाहारीले एक-एक सयको दलका कप्‍तानहरूलाई यसो भनेर हुकुम दिए, “तिनलाई मन्‍दिरको बाहिर ल्‍याओ, र तिनको पछि लाग्‍नेहरू सबैलाई तरवारले मार।” किनकि “तिनी परमप्रभुको मन्‍दिरमा नमारिऊन्‌” भनी पूजाहारीले भनेका थिए।

¹⁶यसैले तिनी राजमहलका घोड़ाहरू पस्‍ने ठाउँमा पुग्‍दा तिनीहरूले तिनलाई समाते, र त्‍यहीँ नै तिनलाई मारे।

¹⁷त्‍यसपछि यहोयादाले तिनीहरू परमप्रभुको प्रजा होऊन्‌ भनी परमप्रभु, राजा र प्रजाका बीचमा करार बाँधे। तिनले राजा र प्रजाका बीचमा पनि एउटा करार बाँधे।

¹⁸देशका सबै मानिसहरू बालको मन्‍दिरमा गए र त्‍यो भत्‍काइदिए। तिनीहरूले त्‍यसका वेदीहरू र मूर्तिहरूलाई टुक्रा-टुक्रा पारे, र बालको पूजाहारी मत्तानलाई वेदीहरूका अगि मारे। तब यहोयादा पूजाहारीले परमप्रभुको मन्‍दिरमा पहरादारहरू नियुक्त गरे।

¹⁹तिनले आफूसित सय-सयका दलका कप्‍तानहरू, करीहरू, पहरादारहरू र देशका सबै मानिसहरूलाई लिएर राजालाई पहरा ढोका भएर परमप्रभुको मन्‍दिरबाट राजमहलभित्र ल्‍याए। तब राजा राजगद्दीमा बसे,

²⁰र देशका सारा मानिसहरू आनन्‍दित भए। अनि सहरमा शान्‍ति भयो, किनभने अतल्‍याह राजमहलमा तरवारले मारिएकी थिइन्‌।

²¹जब योआश राजा भए तब तिनी सात वर्षका थिए।