Read Nepali New Revised Version, 2012 २ राजाहरू 12 Bible Online

२ राजाहरू 12 - Nepali New Revised Version, 2012 bible

२ राजाहरू 12

¹येहूको सातौँ वर्षमा योआश राजा भए, र तिनले यरूशलेममा चालीस वर्ष राज्‍य गरे। तिनकी आमाको नाउँ सिब्‍या थियो। तिनी बेर्शेबाकी थिइन्‌।

²यहोयादा पूजाहारीले तिनलाई सिकाएका सबै वर्षहरूभरि नै तिनले परमप्रभुको दृष्‍टिमा जे असल थियो त्‍यही गरे।

³तापनि अल्‍गा-अल्‍गा ठाउँहरू तिनले हटाएनन्‌। मानिसहरूले त्‍यहाँ बलिदान चढ़ाउने र धूप बाल्‍ने गरे।

⁴योआशले पूजाहारीहरूलाई भने, “परमप्रभुको मन्‍दिरमा पवित्र भेटीको रूपमा जनगणनामा जम्‍मा गरेको रकम, व्‍यक्तिगत भाकल गरेको रकम र राजीखुशीसँग मन्‍दिरमा ल्‍याएको रकम जम्‍मा गर।

⁵हरेक पूजाहारीले कुनै एक कोषाध्‍यक्षबाट रकम लिऊन्, र मन्‍दिरमा भएको कुनै पनि नोक्‍सानी मरम्‍मत गर्नलाई त्‍यो प्रयोग गरिओस्‌।”

⁶तर योआश राजाको तेईसौँ वर्षसम्‍म पनि पूजाहारीहरूले मन्‍दिरको मरम्‍मत गरेका थिएनन्‌।

⁷यसकारण योआश राजाले यहोयादा पूजाहारी र अरू पूजाहारीहरूलाई बोलाएर भने, “तिमीहरूले किन मन्‍दिरका भत्‍केका ठाउँहरू मरम्‍मत गरेका छैनौ? अब उप्रान्‍त तिमीहरूले आफ्‍ना कोषाध्‍यक्षहरूबाट रकम नलिनू, तर मन्‍दिरका मरम्‍मतको निम्‍ति त्‍यो हस्‍तान्‍तरण गर्नू।”

⁸यसकारण मानिसहरूबाट रुपियाँ अब नलिने र मन्‍दिरका मरम्‍मतको निम्‍ति तिनीहरू आफैले जिम्‍मा नलिने भनी पूजाहारीहरू सहमत भए।

⁹यहोयादा पूजाहारीले एउटा सन्‍दूक लिएर त्‍यसको बिर्कोमा प्‍वाल पारे। परमप्रभुको मन्‍दिरमा पस्‍ने ठाउँको दाहिनेतिर वेदीको छेउमा तिनले त्‍यो राखिदिए। प्रवेशद्वारको रक्षा गर्ने पूजाहारीहरूले परमप्रभुको मन्‍दिरमा ल्‍याएका सबै रकम त्‍यसैमा हालिदिन्‍थे।

¹⁰जब-जब तिनीहरूले त्‍यो सन्‍दूक धेरै रकमले भरिएको देख्‍थे, तब राजाका सचिव र प्रधान पूजाहारी आएर परमप्रभुको मन्‍दिरमा यसरी ल्‍याएका रुपियाँको हिसाब गरेर थैलाहरूमा हाल्‍थे।

¹¹तिनीहरूले रुपियाँपैसाको हिसाब लगाएपछि परमप्रभुको मन्‍दिरमा काम गर्नेहरूमाथि नियुक्त भएका मानिसहरूलाई त्‍यो रुपियाँपैसा दिन्‍थे। त्‍यसैबाट तिनीहरूले मन्‍दिरका निर्माणको काम गर्नेहरूलाई दिन्‍थे,

¹²अर्थात्‌ सिकर्मीहरू, डकर्मीहरू र ढुङ्गा काट्‌नेहरूलाई। परमप्रभुको मन्‍दिरका मरम्‍मतको निम्‍ति तिनीहरूले काठपात र काटेर मिलाएका ढुङ्गाहरू किने, र मन्‍दिरका पुनर्निर्माणको लागि अरू सबै खर्च गरे।

¹³तिनीहरूले चाँदीका कचौराहरू, सलेदाका चिम्‍टाहरू, छर्कने बाटाहरू र तुरहीहरू अथवा कुनै पनि सुनचाँदीका सामानहरू बनाउनलाई परमप्रभुको मन्‍दिरमा ल्‍याएका रकमबाट खर्च गरेनन्‌।

¹⁴त्‍योचाहिँ मन्‍दिर मरम्‍मत गर्न काम गर्ने मानिसहरूलाई दिइयो।

¹⁵काम गर्नेहरूका निम्‍ति मुख्‍य कामदारहरूलाई दिएका रुपियाँपैसाको हरहिसाब तिनीहरूले लिएनन्, किनभने तिनीहरूले पूरै ईमानदारीसाथ काम गर्थे।

¹⁶दोषबलि र पापबलिका भेटीको रकमचाहिँ परमप्रभुको मन्‍दिरमा ल्‍याइँदैनथ्‍यो। त्‍योचाहिँ पूजाहारीहरूकै हुन्‍थ्‍यो।

¹⁷प्राय: त्‍यसै बेला अरामका राजा हजाएलले उक्‍लेर गई गातमाथि आक्रमण गरी त्‍यो दखल गरे। त्‍यसपछि उनी यरूशलेमलाई आक्रमण गर्न अगि फर्के।

¹⁸तर यहूदाका राजा योआशले तिनका पुर्खाहरू अर्थात्‌ यहूदाका राजाहरू यहोशापात, योराम र अहज्‍याहले समर्पण गरेका सबै पवित्र थोकहरू र आफैले समर्पण गरेका उपहारहरू र परमप्रभुको मन्‍दिरका र राजमहलका भण्‍डारहरूमा भेट्टाएका सबै सुन लिएर अरामका राजा हजाएलकहाँ पठाइदिए। त्‍यसपछि उनी यरूशलेमबाट फर्के।

¹⁹योआशको राजकालका अरू घटनाहरू र तिनले गरेका सबै कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

²⁰तिनका अधिकृतहरूले तिनको विरुद्धमा षड्‌यन्‍त्र गरे, र तिनलाई सिल्‍लाको ओरालो बाटोमा भएको बेथ-मिल्‍लोमा मारे।

²¹तिनलाई मार्ने अधिकृतहरू शिम्‍मतका छोरा योजाबाद र शोमेरका छोरा यहोजाबाद थिए। तिनी मरे र आफ्‍ना पित्रहरूसित दाऊदको सहरमा गाड़िए। तिनीपछि तिनका छोरा अमस्‍याह राजा भए।