Read Nepali New Revised Version, 2012 २ राजाहरू 14 Bible Online

२ राजाहरू 14 - Nepali New Revised Version, 2012 bible

२ राजाहरू 14

¹इस्राएलका राजा यहोआहाजका छोरा येहोआशको दोस्रो वर्षमा यहूदाका राजा योआशका छोरा अमस्‍याहले राज्‍य गर्न लागे।

²जब तिनी राजा भए तब तिनी पच्‍चीस वर्षका थिए, र तिनले यरूशलेममा उनन्‍तीस वर्ष राज्‍य गरे। तिनकी आमाको नाउँ यहोअदीन थियो। तिनी यरूशलेमकी थिइन्‌।

³तिनले परमप्रभुको दृष्‍टिमा जे कुरा असल थियो त्‍यही गरे, तर तिनका पुर्खा दाऊदले गरेजस्‍तै त होइन। सबै कुरामा तिनले आफ्‍ना पिता योआशले गरेझैँ गरे।

⁴तापनि डाँड़ाका अल्‍गा-अल्‍गा थानहरू तिनले हटाएनन्‌। मानिसहरूले त्‍यहाँ बलिदान चढ़ाउने र धूप बाल्‍ने गरे।

⁵तिनको हातमा राज्‍य सुदृढ़ भएपछि तिनले आफ्‍ना ती अधिकारीहरूलाई मारे जसले तिनका पिता राजाको हत्‍या गरेका थिए।

⁶तापनि मोशाका व्‍यवस्‍थाको पुस्‍तकमा लेखिएअनुसार यसो भन्‍ने परमप्रभुको आज्ञालाई पालन गरेर तिनले हत्‍याराका छोराहरूलाई मारेनन्‌: “बुबाहरूलाई छोराछोरीहरूका निम्‍ति र छोराछोरीहरूलाई बुबाहरूका निम्‍ति नमार्नू। हरेक मानिस आफ्‍नै अपराधहरूका निम्‍ति मरोस्‌।”

⁷नूनको उपत्‍यकामा दश हजार एदोमीहरूलाई हराउने र लड़ाइँमा सेलालाई लिएर त्‍यसको नाउँ योक्‍तेल राख्‍ने तिनी नै थिए। त्‍यसको नाउँ आजको दिनसम्‍म त्‍यही हो।

⁸त्‍यसपछि अमस्‍याहले इस्राएलका राजा येहूका नाति, यहोआहाजका छोरा येहोआशलाई यसो भनेर युद्धको चुनौती दिए, “आऊ, मसँग आमनेसामने लड़।”

⁹तर इस्राएलका राजा येहोआशले यहूदाका राजा अमस्‍याहलाई यस्‍तो जवाफ पठाए, “लेबनानको एउटा सिउँड़ीले लेबनानकै एउटा देवदारुलाई यसो भनेर समाचार पठायो, ‘तिम्री छोरी मेरो छोरासित विवाह गरिदेऊ’। तब लेबनानको एउटा वन-पशु त्‍यसबाट भएर आयो, र त्‍यस सिउँड़ीलाई कुल्‍चिदियो।

¹⁰तिमीले साँच्‍चै एदोमलाई जित्‍यौ, र अहिले तिम्रो शेखी बढ़ेको छ। तिम्रो विजयमा गर्व गर, तर आफ्‍नै घरमा बस! आफ्‍नै र यहूदाको पनि पतनको निम्‍ति किन समस्‍या निम्‍त्‍याउछौं?”

¹¹तरै पनि अमस्‍याहले यस कुरामा ध्‍यानै दिएनन्‌। यसैले इस्राएलका राजा येहोआशले आक्रमण गरे, र तिनी र यहूदाका राजा अमस्‍याहले यहूदाको बेथ-शेमेशमा एक-अर्काको सामना गरे।

¹²यहूदा इस्राएलद्वारा पराजित भए, र हरेक मानिस आ-आफ्‍नो घरमा भाग्‍यो।

¹³इस्राएलका राजा येहोआशले अहज्‍याहका नाति, योआशका छोरा यहूदाका राजा अमस्‍याहलाई बेथ-शेमेशमा पक्रे। त्‍यसपछि येहोआश यरूशलेममा गए, र एफ्राइमको ढोकादेखि कुने ढोकासम्‍म प्राय: दुई सय मिटर लामो सहरका पर्खालको एक भाग भत्‍काइदिए।

¹⁴तिनले परमप्रभुको मन्‍दिरमा र राजमहलका भण्‍डारहरूमा भेट्टाएका सबै सुन र चाँदी र सबै चीजहरू लगे। तिनले धितो राखेका मानिसहरू पनि लगेर सामरियामा फर्के।

¹⁵यहोआहाजको राजकालका अरू घटनाहरू र तिनले गरेका कार्यहरू र तिनका उपलब्‍धिहरू, र यहूदाका राजा अमस्‍याहको विरुद्ध गरेको युद्ध के ती इस्राएलका राजाहरूका इतिहासको पुस्‍तकमा लेखिएका छैनन्‌ र?

¹⁶येहोआश आफ्‍ना पित्रहरूसित सुते, र इस्राएलका राजाहरूसित सामरियामा गाड़िए। अनि तिनीपछि तिनका छोरा यारोबाम राजा भए।

¹⁷इस्राएलका राजा यहोआहाजका छोरा येहोआशको मृत्‍युपछि यहूदाका राजा योआशका छोरा अमस्‍याह पन्‍ध्र वर्ष बाँचे।

¹⁸अमस्‍याहको राजकालका अरू घटनाहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

¹⁹तिनको विरुद्धमा यरूशलेममा एउटा षड्‌यन्‍त्र भयो, र तिनी लाकीशमा भागे। तर तिनीहरूले तिनको पछि लाकीशमा मानिसहरू पठाए, र तिनलाई त्‍यहीँ मारे।

²⁰तिनको लाश घोड़ामाथि बोकाएर ल्‍याइयो, र तिनी आफ्‍ना पित्रहरूसित दाऊदको सहर यरूशलेममा गाड़िए।

²¹तब यहूदाका सबै मानिसहरूले सोह्र वर्ष पुगेका अजर्याहलाई [1] लिएर तिनका पिता अमस्‍याहको सट्टामा राजा तुल्‍याए।

²²अमस्‍याह आफ्‍ना पित्रहरूसित सुतिसकेपछि यिनले नै एलात सहरलाई पुनर्निर्माण गरेर यहूदालाई फिर्ता गरिदिए।

²³यहूदाका राजा योआशका छोरा अमस्‍याहको पन्‍ध्रौँ वर्षमा इस्राएलका राजा येहोआशका छोरा यारोबाम सामरियामा राजा भए, र तिनले एकचालीस वर्ष राज्‍य गरे।

²⁴तिनले परमप्रभुको दृष्‍टिमा जे कुरो खराब थियो त्‍यही गरे, र इस्राएललाई गर्न लाएका नबातका छोरा यारोबामका पापहरूबाट फर्केनन्‌।

²⁵परमप्रभु इस्राएलका परमेश्‍वरले आफ्‍ना दास गात-हेपेरका अमित्तैका छोरा योना अगमवक्ताद्वारा भन्‍नुभएको वचनअनुसार लेबोहमातदेखि अराबाको समुद्रसम्‍म इस्राएलका सिमाना फेरि स्‍थिर गर्ने तिनी नै थिए।

²⁶कुनै फुक्‍का कि बँधुवा होस्, इस्राएलले साह्रै कष्‍ट भोगेको परमप्रभुले देख्‍नुभएको थियो। तिनीहरूलाई सहायता गर्ने कोही थिएन।

²⁷पृथ्‍वीबाट इस्राएलको नाउँनिशानै मेटिदिन्‍छु भनी परमप्रभुले नभन्‍नुभएको हुनाले, उहाँले येहोआशका छोरा यारोबामको हातद्वारा तिनीहरूलाई बचाउनुभयो।

²⁸यारोबामको राजकालका अरू घटनाहरू र तिनले गरेका सबै कार्यहरू र सैनिक उपलब्‍धिहरू, अनि दमस्‍कस र हमात, जो यहूदाका थिए, इस्राएलको निम्‍ति फेरि प्राप्‍त गरेको कुरा के ती इस्राएलका राजाहरूका इतिहासको पुस्‍तकमा लेखिएका छैनन्‌ र?

²⁹यारोबाम आफ्‍ना पित्र इस्राएलका राजाहरूसित सुते, र तिनीपछि तिनका छोरा जकरिया राजा भए।