Read Nepali New Revised Version, 2012 २ राजाहरू 15 Bible Online

२ राजाहरू 15 - Nepali New Revised Version, 2012 bible

२ राजाहरू 15

¹इस्राएलका राजा यारोबामको सत्ताईसौँ वर्षमा यहूदाका राजा अमस्‍याहका छोरा अजर्याहले राज्‍य गर्न लागे।

²जब तिनी राजा भए तब तिनी सोह्र वर्षका थिए, र तिनले यरूशलेममा बाउन्‍न वर्ष राज्‍य गरे। तिनकी आमाको नाउँ यकोल्‍याह थियो। तिनी यरूशलेमकी थिइन्‌।

³तिनले आफ्‍ना पिता अमस्‍याहले गरेझैँ परमप्रभुको दृष्‍टिमा जे असल थियो त्‍यही गरे।

⁴तापनि अल्‍गा-अल्‍गा ठाउँहरू तिनले हटाएनन्‌। मानिसहरूले अझै पनि त्‍यहाँ बलिदान चढ़ाउने र धूप बाल्‍ने गरे।

⁵परमप्रभुले राजालाई मरणान्‍त कुष्‍ठरोगले प्रहार गर्नुभयो, र तिनी भिन्‍दै घरमा बस्‍थे। राजाका छोरा योतामले नै राजमहलको जिम्‍मा लिएका थिए र देशका प्रजामाथि राज्‍य गर्थे।

⁶अजर्याहको राजकालका अरू घटनाहरू र तिनले गरेका सबै कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

⁷अजर्याह आफ्‍ना पित्रहरूसित सुते, र तिनीहरूका नजिक दाऊदको सहरमा गाड़िए। अनि तिनीपछि तिनका छोरा योताम राजा भए।

⁸यहूदाका राजा अजर्याहको अठतीसौँ वर्षमा यारोबामका छोरा जकरिया सामरियामा इस्राएलका राजा भए, र तिनले छ महिना राज्‍य गरे।

⁹आफ्‍ना पुर्खाहरूले गरेझैँ तिनले परमप्रभुको दृष्‍टिमा जे कुरो खराब थियो त्‍यही गरे। इस्राएललाई गर्न लाएका नबातका छोरा यारोबामका पापहरूबाट तिनी फर्केनन्‌।

¹⁰याबेशका छोरा शल्‍लूमले जकरियाको विरुद्धमा षड्‌यन्‍त्र रचे। शल्‍लूमले तिनलाई मानिसहरूकै सामुन्‍ने आक्रमण गरेर मारे, र तिनीपछि राजा भए।

¹¹जकरियाको राजकालका अरू घटनाहरू इस्राएलका राजाहरूका इतिहासको पुस्‍तकमा लेखिएका छन्‌।

¹²यसरी परमप्रभुले येहूलाई भन्‍नुभएको कुरा पूरा भयो: “तेरा सन्‍तान चौथो पुस्‍तासम्‍म इस्राएलको राजगद्दीमा बस्‍नेछन्‌।”

¹³यहूदाका राजा उज्‍जियाहको उनन्‍चालीस वर्षमा याबेशका छोरा शल्‍लूम राजा भए, र तिनले एक महिना सामरियामा राज्‍य गरे।

¹⁴त्‍यसपछि गदीका छोरा मनहेम तिर्साबाट सामरियामा उक्‍ले। तिनले सामरियामा याबेशका छोरा शल्‍लूमलाई आक्रमण गरे, र तिनलाई मारेर तिनी राजा भए।

¹⁵शल्‍लूमको राजकालका अरू घटनाहरू र तिनले रचेका षड्‌यन्‍त्र इस्राएलका राजाहरूका इतिहासको पुस्‍तकमा लेखिएका छन्‌।

¹⁶त्‍यसै बेला मनहेम तिर्साबाट सुरु गरेर तिफसा र त्‍यसका छेउछाउको हरेकलाई आक्रमण गरे, किनभने उनीहरूले तिनको निम्‍ति त्‍यसका ढोकाहरू खोल्‍न इन्‍कार गरे। तिनले तिफसालाई ध्‍वंस गरे, र सबै गर्भवती स्‍त्रीहरूका पेट चिरिदिए।

¹⁷यहूदाका राजा अजर्याहको उनन्‍चालीस वर्षमा गदीका छोरा मनहेम इस्राएलका राजा भए, र तिनले सामरियामा दश वर्ष राज्‍य गरे।

¹⁸तिनले परमप्रभुको दृष्‍टिमा जे कुरो खराब थियो त्‍यही गरे। इस्राएललाई गर्न लाएका नबातका छोरा यारोबामका पापहरूबाट आफ्‍ना सम्‍पूर्ण राजकालभरि नै तिनी फर्केनन्‌।

¹⁹तब अश्‍शूरका राजा पूलले देशलाई आक्रमण गरे, र राज्‍यमा आफ्‍नो राजकीय अधिकार बलियो पार्नलाई मनहेमले पूललाई एक हजार तोड़ा [1] चाँदी दिए।

²⁰मनहेमले इस्राएलबाट यो रुपियाँपैसा जबरदस्‍तसाथ लिए। हरेक धनी मानिसले अश्‍शूरका राजालाई पचास शेकेल [2] चाँदी दिनुपर्थ्‍यो। त्‍यसकारण अश्‍शूरका राजा फर्केर त्‍यस देशमा बसेनन्‌।

²¹मनहेमको राजकालका अरू घटनाहरू र तिनले गरेका सबै कार्यहरू के ती इस्राएलका राजाहरूका इतिहासको पुस्‍तकमा लेखिएका छैनन्‌ र?

²²मनहेम आफ्‍ना पित्रहरूसित सुते, र तिनका छोरा पकहीया तिनीपछि राजा भए।

²³यहूदाका राजा अजर्याहको पचासौँ वर्षमा मनहेमका छोरा पकहीया सामरियामा इस्राएलका राजा भए, र तिनले दुई वर्ष राज्‍य गरे।

²⁴पकहीयाले परमप्रभुको दृष्‍टिमा जे कुरो खराब थियो त्‍यही गरे। इस्राएललाई गर्न लाएका नबातका छोरा यारोबामका पापहरूबाट तिनी फर्केनन्‌।

²⁵तिनका मुख्‍य अधिकृतहरूमध्‍येका एक जना, रमल्‍याहका छोरा पेकहले तिनको विरुद्धमा षड्‌यन्‍त्र रचे। गिलादका पचास जना मानिसहरू आफ्‍नो साथमा लिएर सामरियामा भएको राजमहलको गढ़ीभित्र पसीकन पेकहले पकहीयालाई अनि अर्गोब र अरिहलाई पनि मारे। यसरी पेकहले पकहीयालाई मारे र तिनीपछि राजा भए।

²⁶पकहीयाको राजकालका अरू घटनाहरू र तिनले गरेका सबै कार्यहरू इस्राएलका राजाहरूका इतिहासको पुस्‍तकमा लेखिएका छन्‌।

²⁷यहूदाका राजा अजर्याहको बाउन्‍नौँ वर्षमा रमल्‍याहका छोरा पेकह सामरियामा इस्राएलका राजा भए, र तिनले बीस वर्ष राज्‍य गरे।

²⁸तिनले परमप्रभुको दृष्‍टिमा जे कुरो खराब थियो त्‍यही गरे। इस्राएललाई गर्न लाएका नबातका छोरा यारोबामका पापहरूबाट तिनी फर्केनन्‌।

²⁹इस्राएलका राजा पेकहको समयमा अश्‍शूरका राजा तिग्‍लत-पिलेसेरले आएर इयोन, हाबिल-बेथ-माका, यानोह, केदेश र हासोर लिए। उनले गिलाद र गालील, नप्‍तालीका सबै जग्‍गासमेत लिए, र मानिसहरूलाई अश्‍शूर देशमा कैद गरेर लगे।

³⁰तब एलाहका छोरा होशियाले रमल्‍याहका छोरा पेकहको विरुद्धमा षड्‌यन्‍त्र रचे। होशियाले आक्रमण गरेर तिनको हत्‍या गरे, र उज्‍जियाहका छोरा योतामको बीसौँ वर्षमा तिनीपछि राजा भए।

³¹पेकहको राजकालका अरू घटनाहरू र तिनले गरेका सबै कार्यहरू के ती सबै इस्राएलका राजाहरूका इतिहासको पुस्‍तकमा लेखिएका छैनन्‌ र?

³²इस्राएलका राजा रमल्‍याहका छोरा पेकहको दोस्रो वर्षमा यहूदाका राजा उज्‍जियाहका छोरा योतामले राज्‍य गर्न लागे।

³³जब तिनी राजा भए तब तिनी पच्‍चीस वर्षका थिए, र तिनले यरूशलेममा सोह्र वर्ष राज्‍य गरे। तिनकी आमाको नाउँ सादोककी छोरी यरूशा थियो।

³⁴आफ्‍ना पिता उज्‍जियाहले गरेझैँ परमप्रभुको दृष्‍टिमा जे कुरो असल थियो त्‍यही तिनले गरे।

³⁵तापनि डाँड़ाका अल्‍गा-अल्‍गा ठाउँहरू हटाइएनन्‌। मानिसहरूले त्‍यहाँ बलिदान चढ़ाउने र धूप बाल्‍ने गरे। योतामले नै परमप्रभुका मन्‍दिरको माथिल्‍लो ढोकाको पुनर्निर्माण गरे।

³⁶योतामको राजकालका अरू घटनाहरू र तिनले गरेका कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

³⁷(त्‍यस बेला परमप्रभुले अरामका राजा रसीन र रमल्‍याहका छोरा पेकहलाई यहूदाको विरुद्धमा पठाउन लाग्‍नुभयो।)

³⁸योताम आफ्‍ना पित्रहरूसित सुते, र तिनका पुर्खा दाऊदको सहरमा तिनीहरूसितै गाड़िए। अनि तिनीपछि तिनका छोरा आहाज राजा भए।