Read Nepali New Revised Version, 2012 २ राजाहरू 16 Bible Online

२ राजाहरू 16 - Nepali New Revised Version, 2012 bible

२ राजाहरू 16

¹रमल्‍याहका छोरा पेकहको सत्रौँ वर्षमा यहूदाका राजा योतामका छोरा आहाजले राज्‍य गर्न लागे।

²जब आहाज राजा भए तब तिनी बीस वर्षका थिए, र तिनले यरूशलेममा सोह्र वर्ष राज्‍य गरे। तिनले आफ्‍ना पुर्खा दाऊदले गरेझैँ परमप्रभुको दृष्‍टिमा जे कुरो असल थियो त्‍यही गरेनन्‌।

³इस्राएलका राजाहरूका चालमा तिनी हिँड़े। इस्राएलको सामुबाट जुन जातिहरूलाई परमप्रभुले निकाल्‍नुभएको थियो, तिनीहरूकै घिनलाग्‍दा चालमा हिँड़ेर तिनले आफ्‍नो छोरालाई पनि आगोमा होम गरे।

⁴तिनले अल्‍गा-अल्‍गा ठाउँहरू र डाँड़ाका टाकुराहरूमा र हरेक झ्‍याम्‍म परेको रूखमुनि बलिदानहरू चढ़ाए र धूप बाले।

⁵तब अरामका राजा रसीन र इस्राएलका राजा रमल्‍याहका छोरा पेकहले यरूशलेमको विरुद्धमा लड़ाइँ गरेर आहाजलाई घेरा हाले, तर तिनीहरूले जित्‍न सकेनन्‌।

⁶त्‍यस बेला अरामका राजा रसीनले यहूदाका मानिसहरूलाई धपाएर एलातलाई अरामको निम्‍ति फेरि लिए। तब एदोमीहरू एलातमा पसे, र आजको दिनसम्‍म त्‍यसमा बसोबास गरेका छन्‌।

⁷आहाजले अश्‍शूरका राजा तिग्‍लत-पिलेसेरकहाँ यसो भनेर समाचारवाहकहरू पठाए, “म तपाईंको दास र तपाईंकै मातहत सेवक हुँ। मलाई आक्रमण गर्ने अरामका राजा र इस्राएलका राजाबाट आएर मलाई बचाउनुहोस्‌।”

⁸अनि आहाजले परमप्रभुको मन्‍दिरमा र राजमहलका भण्‍डारहरूमा भेट्टाएका सुन र चाँदी लिएर कोसेलीको रूपमा अश्‍शूरका राजाकहाँ पठाए।

⁹अश्‍शूरका राजाले तिनका कुरा सुने, र दमस्‍कसलाई आक्रमण गरेर उनले त्‍यो कब्‍जा गरे। उनले त्‍यहाँका बासिन्‍दाहरूलाई निर्वासन गरेर कीरमा लगे, र रसीनलाई मारे।

¹⁰तब राजा आहाज अश्‍शूरका राजा तिग्‍लत-पिलेसेरसित भेट गर्न दमस्‍कसमा गए। तिनले दमस्‍कसमा एउटा वेदी देखे, र त्‍यसका बनावटको सम्‍पूर्ण ढाँचा पूजाहारी उरियाहकहाँ पठाइदिए।

¹¹यसैले राजा आहाजले दमस्‍कसबाट पठाएको सम्‍पूर्ण ढाँचाबमोजिम पूजाहारी उरियाहले एउटा वेदी निर्माण गरे र राजा फर्कन अघि नै त्‍यो सिद्ध्याए।

¹²जब राजा दमस्‍कसबाट फर्केर आए, तब तिनले त्‍यो वेदी हेरे, र त्‍यसको छेउमा गएर त्‍यसमा भेटी चढ़ाए।

¹³तिनले आफ्‍नो होमबलि र अन्‍नबलि चढ़ाए, र अर्घ-बलि खन्‍याए र आफ्‍नो मेलबलिको रगत वेदीमाथि छर्के।

¹⁴परमप्रभुको सामुन्‍ने भएको काँसाको वेदी तिनले परमप्रभुका मन्‍दिरको अगिबाट, अर्थात्‌ नयाँ वेदी र परमप्रभुका मन्‍दिरको बीचबाट हटाएर त्‍यस नयाँ वेदीको उत्तरतिर राखिदिए।

¹⁵त्‍यसपछि राजा आहाजले पूजाहारी उरियाहलाई यस्‍तो हुकुम गरे: “यस ठूलो नयाँ वेदीमा बिहानको होमबलि र बेलुकाको अन्‍नबलि, राजाको होमबलि र तिनको अन्‍नबलि, र देशका सबै मानिसहरूका होमबलि र तिनीहरूको अन्‍नबलि र अर्घ-बलि चढ़ाउने गर। वेदीमा होमबलि र बलिदानहरूको सबै रगत छर्कनू। तर काँसाको वेदीचाहिँ म आफ्‍नो पथप्रदर्शनको लागि प्रयोग गर्नेछु।”

¹⁶राजा आहाजले हुकुम गरेझैँ पूजाहारी उरियाहले गरे।

¹⁷राजा आहाजले ठेला-गाड़ीहरूबाट तिनका वरिपरि भएका पाटाहरू र तिनका बाटाहरू हटाए। तिनले विशाल खड्‌कुँलो त्‍यसलाई थामिराख्‍ने काँसाका साँढ़ेहरूबाट निकालेर ढुङ्गाको आधारमा राखे।

¹⁸तिनले शबाथमा प्रयोग गरिने चँदुवा, जुनचाहिँ परमप्रभुको मन्‍दिरमा निर्माण गरिएका थिए, त्‍यो लगे, अनि परमप्रभुको मन्‍दिरबाहिर भएको राजकीय प्रवेशद्वार तिनले अश्‍शूरका राजालाई सन्‍तुष्‍ट गराउन हटाइदिए।

¹⁹आहाजको राजकालका अरू घटनाहरू र तिनले गरेका कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

²⁰आहाज आफ्‍ना पित्रहरूसित सुते, र दाऊदको सहरमा तिनीहरूसित गाड़िए। अनि तिनीपछि तिनका छोरा हिजकिया राजा भए।