Read Nepali New Revised Version, 2012 २ राजाहरू 17 Bible Online

२ राजाहरू 17 - Nepali New Revised Version, 2012 bible

२ राजाहरू 17

¹यहूदाका राजा आहाजको बाह्रौँ वर्षमा एलाहका छोरा होशिया सामरियामा इस्राएलका राजा भए, र तिनले नौ वर्ष राज्‍य गरे।

²तिनले परमप्रभुको दृष्‍टिमा जे कुरो खराब थियो त्‍यही गरे, तर तिनका अघिका इस्राएलका राजाहरूले गरेजस्‍तै त होइन।

³अश्‍शूरका राजा शलमनेशेरले होशियालाई आक्रमण गर्न आए। होशियाले उनका अधीनमा भएर उनलाई कर तिरेका थिए।

⁴तर अश्‍शूरका राजाले होशियाले विश्‍वासघात गरेका देखे, किनकि तिनले मिश्रदेशका राजा सोकहाँ राजदूतहरू पठाएका थिए र बर्सेनि पठाउने कर रोकेका थिए। यसैकारण शलमनेशेरले तिनलाई कैद गरेर झ्‍यालखानमा हाले।

⁵अश्‍शूरका राजाले सारा देशलाई आक्रमण गरे, र सामरियाको विरुद्धमा हमला गरेर त्‍यसलाई तीन वर्षसम्‍म घेरा हाले।

⁶अश्‍शूरका राजाले होशियाको नवौँ वर्षमा सामरिया कब्‍जा गरे र इस्राएलीहरूलाई कैद गरेर अश्‍शूरमा लगे। उनले तिनीहरूलाई हलहमा, हाबोर नदीको किनारमा भएको गोजानमा र मादीहरूका नगरहरूमा बसाले।

⁷यी सबै भएको कारणचाहिँ यही थियो, कि मिश्रदेशका राजा फारोको शक्तिबाट मिश्रदेशदेखि निकालेर ल्‍याउनुहुने परमप्रभु आफ्‍ना परमेश्‍वरको विरुद्धमा इस्राएलीहरूले पाप गरेका थिए। तिनीहरूले अरू देवताहरूलाई पुजे,

⁸र परमप्रभुले तिनीहरूका सामुबाट निकाल्‍नुभएका अरू जातिहरूले र इस्राएलका राजाहरूले चलाएका चालमा पनि तिनीहरू हिँड़े।

⁹परमप्रभु आफ्‍ना परमेश्‍वरको विरुद्धमा जे ठीक थिएन त्‍यो गुप्‍त रूपमा इस्राएलीहरूले गरे। पहरादार बस्‍ने धरहरादेखि लिएर किल्‍ला भएको सहरसम्‍मै तिनीहरूले आफ्‍ना सबै नगरहरूमा अल्‍गा-अल्‍गा ठाउँहरू बनाए।

¹⁰हरेक अल्‍गो डाँड़ामा र हरेक झ्‍याम्‍म परेको रूखमुनि तिनीहरूले चोखा ढुङ्गा र अशेरा देवीका खम्‍बाहरू खड़ा गरे।

¹¹तिनीहरूका सामुन्‍नेबाट निकालिएका जातिहरूले गरेझैँ हरेक अल्‍गा ठाउँमा तिनीहरूले धूप बाले। तिनीहरूले खराब काम गरे, जसले गर्दा परमप्रभुलाई रीस उठ्यो।

¹²परमप्रभुले तिनीहरूलाई “तिमीहरूले यस्‍तो गर्नुहुँदैन” भन्‍नुभए तापनि तिनीहरूले मूर्तिहरूको पूजा गरे।

¹³परमप्रभुले आफ्‍ना सबै अगमवक्ता र दर्शीहरूद्वारा इस्राएल र यहूदालाई गम्‍भीर चेताउनी दिनुभयो: “तिमीहरूले आफ्‍ना खराब चाल छोड़। मेरा आज्ञाहरू र उर्दीहरू सम्‍पूर्ण व्‍यवस्‍थाअनुसार पालन गर, जो मैले तिमीहरूका पुर्खाहरूलाई मान्‍नू भनी आज्ञा गरेको थिएँ, र मेरा दास अगमवक्ताहरूद्वारा तिमीहरूलाई दिएको थिएँ।”

¹⁴तर तिनीहरूले सुन्‍न मानेनन्, र परमप्रभु तिनीहरूका परमेश्‍वरमाथि भरोसा गर्नलाई इन्‍कार गरेका तिनीहरूका पिता-पुर्खाहरूझैँ तिनीहरू हठी भए।

¹⁶तिनीहरूले परमप्रभु तिनीहरूका परमेश्‍वरका सबै आज्ञाहरू त्‍यागे, र आफ्‍ना निम्‍ति बाछाको आकारमा ढालेर बनाइएका दुई वटा मूर्तिहरू र एउटा अशेरा देवीको खम्‍बा बनाए। तिनीहरू आकाशका सबै तारामण्‍डलको सामुन्‍ने घोप्‍टो परे, र बालको पूजा गरे।

¹⁷तिनीहरूले आफ्‍ना छोराहरू र छोरीहरूलाई आगोमा होम गरे। तिनीहरूले जोखना हेरे, र टुनामुना गरे, र परमप्रभुको दृष्‍टिमा जे कुरो खराब थियो त्‍यो गर्न तिनीहरूले आफैलाई बेचेर उहाँलाई रीस उठाए।

¹⁸यसैले परमप्रभु इस्राएलसित साह्रै रिसाउनुभयो, र तिनीहरूलाई आफ्‍नो उपस्‍थितिबाट निकालिदिनुभयो। केवल यहूदाको कुल मात्र छोड़ियो,

¹⁹र यहूदाले पनि परमप्रभु आफ्‍ना परमेश्‍वरका आज्ञाहरू पालन गरेनन्‌। इस्राएलले चलाएका चालमा तिनीहरू हिँड़े।

²⁰यसकारण परमप्रभुले इस्राएलका सबै मानिसहरूलाई त्‍याग्‍नुभयो। उहाँले तिनीहरूलाई कष्‍ट दिनुभयो, र लूटपीट गर्नेहरूका हातमा सुम्‍पिदिनुभयो, जबसम्‍म तिनीहरूलाई आफ्‍नो उपस्‍थितिदेखि फालिदिनुभएन।

²¹जब उहाँले इस्राएललाई दाऊदको घरानाबाट अलग गर्नुभयो, तब तिनीहरूले नबातका छोरा यारोबामलाई राजा तुल्‍याए। यारोबामले इस्राएललाई परमप्रभुको पछि लाग्‍नुबाट फकाएर एउटा ठूलो पाप गर्न लाए।

²²इस्राएलीहरू यारोबामका सबै पापहरूमा लागिरहे, र ती त्‍यागेनन्,

²³जबसम्‍म परमप्रभुले आफ्‍ना सबै दास अगमवक्ताहरूद्वारा चेताउनी दिनुभएझैँ तिनीहरूलाई आफ्‍नो उपस्‍थितिबाट निकाल्‍नुभएन। यसैले इस्राएलका मानिसहरू आफ्‍नो मातृ-भूमिबाट अश्‍शूर देशमा निर्वासित गरिएर लगिए, र तिनीहरू अझै पनि त्‍यहीँ छन्‌।

²⁴अश्‍शूरका राजाले बेबिलोन, कूता, अव्‍वा, हमात र सपर्बेमबाट मानिसहरू ल्‍याएर उनीहरूलाई इस्राएलीहरूका सट्टामा सामरियाका नगरहरूमा बसाले। उनीहरूले सामरिया कब्‍जा गरे, र उनीहरू त्‍यसका नगरहरूमा बसे।

²⁵जब उनीहरू पहिले त्‍यहाँ बसे, उनीहरूले परमप्रभुको उपासना गरेनन्‌। यसैले परमप्रभुले उनीहरूका बीचमा सिंहहरू पठाइदिनुभयो, र तिनीहरूले केही मानिसहरूलाई मारे।

²⁶अश्‍शूरका राजालाई यस्‍तो प्रतिवेदन पठाइयो: “हजूरले निर्वासन गरेर पठाउनुभएका र सामरियाका नगरहरूमा बसोबास गरेका मानिसहरूले त त्‍यस देशका देवतालाई चाहिने काम जान्‍दैनन्‌। उनीहरूले यो नजानेका हुनाले ती देवताले उनीहरूका बीचमा सिंहहरू पठाएर तिनीहरूले उनीहरूलाई मार्दैछन्‌।”

²⁷तब अश्‍शूरका राजाले यो हुकुम दिए: “सामरियाबाट कैद गरेर ल्‍याएका कुनै एउटा पूजाहारी त्‍यहाँ बस्‍नलाई पठाइऊन्, ताकि तिनले मानिसहरूलाई त्‍यस देशका देवताका रीति सिकाइदेऊन्।”

²⁸यसैले सामरियाबाट निर्वासनमा लगिएका एक जना पूजाहारी आएर बेथेलमा बस्‍न लागे, र परमप्रभुलाई कसरी आराधना गर्नुपर्छ भनी तिनले उनीहरूलाई सिकाए।

²⁹तैपनि प्रत्‍येक जातिको दलले आफू-आफू बसेका नगरहरूमा आ-आफ्‍नै देवताहरू बनाए, र सामरीहरूले बनाएका अल्‍गा-अल्‍गा ठाउँहरूमा भएका पूजा गर्ने थानहरूमा ती बसाले।

³⁰बेबिलोनबाट आएका मानिसहरूले सुक्‍कोत-बनोत, कूताका मानिसहरूले नेर्गल, र हमातका मानिसहरूले अशीमा,

³¹अव्‍वीहरूले नेभज र तर्ताकलाई बनाए, अनि सपर्बेमीहरूले आफ्‍ना देवता अद्रम्‍मलेक र अनम्‍मलेकका निम्‍ति आफ्‍ना छोराछोरीहरूलाई बलिदान स्‍वरूप आगोमा होम गर्थे।

³²उनीहरूले परमप्रभुको उपासना त गर्थे, तापनि अल्‍गा-अल्‍गा ठाउँमा भएका देवताथानहरूका लागि पूजाहारी काम गर्नलाई आफ्‍नै जातिबाट पनि उनीहरूले मानिसहरू नियुक्त गरे।

³³उनीहरूले परमप्रभुको उपासना गर्थे, तर जुन जातिहरूबाट उनीहरू ल्‍याइएका थिए, उनीहरूकै रीतिअनुसार चलेर उनीहरूले आफ्‍नै देवताहरूको सेवा पनि गर्थे।

³⁴उनीहरूले अघि-अघिका रीतिहरू आजको दिनसम्‍मै चलाइराखेका छन्‌। उनीहरू न त परमप्रभुको उपासना गर्छन्, न उहाँका उर्दीहरू र विधिहरू, र उहाँका विधान र आज्ञाहरू पालन गर्छन्, जुन उहाँले याकूबका सन्‍तानहरूलाई दिनुभयो, जसको नाउँ उहाँले इस्राएल भनी राख्‍नुभएको थियो, सो पालन गर्छन्‌।

³⁵जब परमप्रभुले इस्राएलीहरूसँग करार बाँध्‍नुभयो, तब उहाँले तिनीहरूलाई यो आज्ञा दिनुभएको थियो: “तिमीहरूले अरू कुनै देवताहरूको उपासना नगर्नू, अथवा तिनीहरूका सामु तिमीहरू ननिहुरनू, वा तिनीहरूको सेवा नगर्नू, वा तिनीहरूलाई बलिदान चढ़ाउनू।

³⁶तर आफ्‍नो ठूलो शक्ति र पसारिएको पाखुराद्वारा तिमीहरूलाई मिश्रदेशबाट निकालेर ल्‍याउनुहुने परमप्रभुको मात्र उपासना गर्नू। उहाँकै सामुन्‍ने तिमीहरू निहुरनू, उहाँलाई नै तिमीहरूले बलिदान चढ़ाउनू।

³⁷तिमीहरूका निम्‍ति उहाँले लेख्‍नुभएका उर्दीहरू, विधिहरू, विधानहरू र आज्ञाहरू तिमीहरूले होशियारीसित निरन्‍तर पालन गर्नू। तिमीहरूले अरू देवताको उपासना नगर्नू।

³⁸मैले तिमीहरूसित बाँधेको करारलाई नभुल्‍नू, र तिमीहरूले अरू देवताहरूको उपासना नगर्नू।

³⁹बरु परमप्रभु तिमीहरूका परमेश्‍वरको मात्र उपासना गर्नू। उहाँले नै तिमीहरूलाई तिमीहरूका सबै शत्रुहरूका हातबाट छुटकारा दिनुहुनेछ।”

⁴⁰तापनि तिनीहरूले सुन्‍न मानेनन्, र आफ्‍ना अगाड़िका व्‍यवहारमा हिँड़िरहे।

⁴¹परमप्रभुको उपासना गर्दागर्दै पनि तिनीहरूले आफ्‍नै मूर्तिहरूको सेवा गरिरहे। आजको दिनसम्‍मै तिनीहरूका छोराछोरीहरू र नाति-नातिनाहरू आफ्‍ना पिता-पुर्खाहरूका चालमा हिँड्‌दैआएका छन्‌।