Read Nepali New Revised Version, 2012 २ राजाहरू 22 Bible Online

२ राजाहरू 22 - Nepali New Revised Version, 2012 bible

२ राजाहरू 22

¹जब योशियाह राजा भए तब तिनी आठ वर्षका थिए, र तिनले यरूशलेममा एकतीस वर्ष राज्‍य गरे। तिनकी आमाको नाउँ अदायाहकी छोरी यदीता थियो। तिनी बोस्‍कतकी थिइन्‌।

²तिनले परमप्रभुको दृष्‍टिमा जे कुरो असल थियो त्‍यही गरे। तिनी देब्रे-दाहिने नलागी आफ्‍ना पुर्खा दाऊदकै सबै चालहरूमा हिँड़े।

³आफ्‍नो शासनकालको अठारौँ वर्षमा योशियाह राजाले मशुल्‍लामका नाति, असल्‍याहका छोरा सचिव शापानलाई परमप्रभुको मन्‍दिरमा पठाए।

⁴तिनले भने, “प्रधान पूजाहारी हिल्‍कियाहकहाँ जाऊ, र ढोकेहरूले मानिसहरूबाट ग्रहण गरेका, परमप्रभुको मन्‍दिरमा ल्‍याइएको रुपियाँपैसा तयार राख्‍नू भनी तिनलाई भन।

⁵मन्‍दिरका मुख्‍य कर्मचारीहरूका हातमा त्‍यो दिनू, र तिनीहरूले परमप्रभुको मन्‍दिर मरम्‍मत गर्ने मानिसहरूलाई देऊन्।

⁶अर्थात्‌ सिकर्मी, डकर्मी र निर्माण गर्नेहरूलाई। मन्‍दिर मरम्‍मतको निम्‍ति काठपात र काटेका ढुङ्गाहरू तिनीहरूले किनून्‌।

⁷तिनीहरूलाई दिइएको रकमको हरहिसाब तिनीहरूले नलिऊन्, किनभने तिनीहरू विश्‍वाससित काम गरिरहेका छन्‌।”

⁸प्रधान पूजाहारी हिल्‍कियाहले सचिव शापानलाई भने, “मैले परमप्रभुको मन्‍दिरमा व्‍यवस्‍थाको पुस्‍तक भेट्टाएको छु।” तिनले त्‍यो शापानलाई दिए, र तिनले त्‍यो पढ़े।

⁹तब सचिव शापान राजाकहाँ गएर तिनलाई भने, “हजूरका अधिकारीहरूले परमप्रभुको मन्‍दिरमा भएको रकम लिएर मन्‍दिरमा काम गर्नेहरू र कामको हेरचाह गर्नेहरूलाई दिएका छन्‌।”

¹⁰त्‍यसपछि सचिव शापानले राजालाई यो सूचना दिए, “प्रधान पूजाहारी हिल्‍कियाहले मलाई एउटा पुस्‍तक दिएका छन्‌।” अनि शापानले त्‍यो राजाको सामुन्‍ने पढ़ेर सुनाए।

¹¹जब राजाले व्‍यवस्‍थाको पुस्‍तकमा लेखिएका कुरा सुने, तब तिनले आफ्‍ना लुगा च्‍याते।

¹²तिनले पूजाहारी हिल्‍कियाह, शापानका छोरा अहीकाम, मीकायाका छोरा अक्‍बोर, सचिव शापान र राजाका टहलुवा असायाहलाई यो हुकुम गरे:

¹³“मेरो आफ्‍नै लागि, प्रजाको लागि र सबै यहूदाको लागि यो फेला पारेको पुस्‍तकमा के लेखिएको छ भनी गएर परमप्रभुसित सोधपूछ गर। हाम्रा विरुद्धमा परमप्रभुको भयानक रीस उठेको छ, किनभने हाम्रा पिता-पुर्खाहरूले यस पुस्‍तकका वचनहरू पालन गरेका छैनन्‌। हाम्रा विषयमा त्‍यहाँ लेखिएका सबै कुराअनुसार तिनीहरूले व्‍यवहार गरेका छैनन्‌।”

¹⁴यसैले पूजाहारी हिल्‍कियाह, अहीकाम, अक्‍बोर, शापान र असायाह राजमहलको लुगाफाटो हेरचाह गर्ने हरहसका नाति, तिक्‍भाका छोरा शल्‍लूमकी पत्‍नी अगमवादिनी हुल्‍दाकहाँ सोधपूछ गर्नलाई गए। तिनी यरूशलेमको दोस्रो टोलमा बस्‍थिन्‌।

¹⁵तिनले तिनीहरूलाई भनिन्, “परमप्रभु इस्राएलका परमेश्‍वर यही भन्‍नुहुन्‍छ: तिमीहरूलाई मकहाँ पठाउने मानिसलाई भन,

¹⁶“परमप्रभु यसो भन्‍नुहुन्‍छ: यहूदाका राजाले पढ़ेको यस पुस्‍तकमा लेखिएको हरेक कुराबमोजिम म यस स्‍थान र त्‍यसका मानिसहरूमाथि सर्वनाश ल्‍याउनेछु।

¹⁷तिनीहरूले मलाई त्‍यागेका छन्, र अरू देवताहरूलाई धूप बालेका छन्, र आफ्‍नै हातले बनाएका सबै मूर्तिहरूद्वारा मलाई रीस उठाएका छन्‌। यसैकारण यस स्‍थानको विरुद्धमा मेरो रीस उठेको छ, र त्‍यो शान्‍त हुनेछैन’।

¹⁸परमप्रभुलाई सोधपूछ गर्न पठाउने यहूदाका राजालाई तिमीहरूले यही कुरा भन, ‘तपाईंले सुन्‍नुभएको वचनको विषयमा परमप्रभु इस्राएलका परमेश्‍वर यही भन्‍नुहुन्‍छ:

¹⁹तेरो हृदय जवाफ दिनलाई उत्‍सुक भएकोले, र मैले यो देश र यसका मानिसहरूका विषयमा भनेको कुरा कि तिनीहरू श्रापित र उजाड़ हुनेछन्‌ भन्‍ने सुनेर परमप्रभुको सामुन्‍ने तँ विनम्र भएकाले, र तैंले आफ्‍नो पोशाक च्‍यातेर मेरो उपस्‍थितिमा विलाप गरेको हुनाले, तँलाई मैले सुनेको छु, परमप्रभु भन्‍नुहुन्‍छ’।

²⁰यसैकारण म तँलाई तेरा पित्रहरूसित जम्‍मा गर्नेछु, र तँ शान्‍तिसित गाड़िनेछस्‌। यस ठाउँमाथि ल्‍याउने सबै सर्वनाश तेरा आँखाले देख्‍नेछैनन्‌।” तब तिनीहरूले राजाकहाँ यो जवाफ ल्‍याए।