Read Nepali New Revised Version, 2012 २ राजाहरू 24 Bible Online

२ राजाहरू 24 - Nepali New Revised Version, 2012 bible

२ राजाहरू 24

¹यहोयाकीमको राजकालमा बेबिलोनका राजा नबूकदनेसरले देशलाई आक्रमण गरे, र तीन वर्षसम्‍म यहोयाकीम उनका अधीनमा रहे। तर तीन वर्षपछि तिनले आफ्‍नो मन बद्‌लेर नबूकदनेसरको विरोधमा विद्रोह गरे।

²परमप्रभुले तिनको विरुद्धमा बेबिलोनी, अरामी, मोआबी र अम्‍मोनीहरूका लूटपीट गर्ने दलहरू पठाउनुभयो। परमप्रभुले आफ्‍ना दास अगमवक्ताहरूद्वारा अगमवाणी गरेअनुसार यहूदालाई नाश गर्न उनीहरूलाई पठाउनुभयो।

³मनश्‍शेले गरेका पापहरू र तिनले गरेका सबै काम अनि तिनले निर्दोषी रगत बगाएको कारणले तिनीहरूलाई आफ्‍नो सामुबाट निकालिदिने परमप्रभुको अभिप्राय पूरा हुन निश्‍चय नै परमप्रभुको आज्ञाअनुसार यी सबै यहूदामाथि हुन आए।

⁴किनकि मनश्‍शेले निर्दोषी रगतले यरूशलेमलाई भरिदिएका थिए, र परमप्रभुले क्षमा गर्न चाहनुभएन।

⁵यहोयाकीमको राजकालका अरू घटनाहरू र तिनले गरेका सबै कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

⁶यहोयाकीम आफ्‍ना पित्रहरूसित सुते, र तिनीपछि तिनका छोरा यहोयाकीन राजा भए।

⁷मिश्रदेशका राजा उनको आफ्‍नै देश छोड़ेर फेरि आएनन्, किनभने बेबिलोनका राजाले मिश्रको खोलादेखि लिएर यूफ्रेटिस नदीसम्‍म उनका सबै इलाकाहरू उनीबाट लिएका थिए।

⁸जब यहोयाकीन राजा भए तब तिनी अठाह्र वर्षका थिए, र तिनले यरूशलेममा तीन महिना राज्‍य गरे। तिनकी आमाको नाउँ एल्‍नातानकी छोरी नहूश्‍ता थियो। तिनी यरूशलेमकी थिइन्‌।

⁹आफ्‍ना पिताले गरेझैँ तिनले परमप्रभुको दृष्‍टिमा जे कुरो खराब थियो त्‍यही गरे।

¹⁰त्‍यस बेला बेबिलोनका राजा नबूकदनेसरका अधिकृतहरू यरूशलेमतिर बढ़ेर त्‍यस सहरलाई घेरा हाले,

¹¹अनि आफ्‍ना अधिकृतहरूले त्‍यसलाई घेरा हालिरहेको बेलामा नबूकदनेसर स्‍वयम्‌ सहरमा आइपुगे।

¹²यहूदाका राजा यहोयाकीन, तिनकी आमा, तिनका टहलुवाहरू, तिनका भारदारहरू र तिनका अधिकृतहरू सबैले आफू-आफूलाई उनको हातमा सुम्‍पिदिए। बेबिलोनका राजाले आफ्‍नो शासनको आठौँ वर्षमा यहोयाकीनलाई कैद गरे।

¹³परमप्रभुले घोषणा गर्नुभएझैँ परमप्रभुको मन्‍दिरका र राजमहलका भण्‍डारहरूका सबै थोकहरू उनले हटाए, र परमप्रभुका मन्‍दिरको निम्‍ति इस्राएलका राजा सोलोमनले बनाएका सुनका सबै सामानहरू लगे।

¹⁴उनले जम्‍मै यरूशलेमलाई निर्वासनमा लगे— जम्‍मै अधिकृतहरू र योद्धाहरू र सबै कारीगरहरू र कलाकारहरूलाई— सबै जम्‍मा दश हजार जनालाई कैद गरेर लगे। केवल साह्रै कङ्गालीहरूलाई मात्र उनले छोड़े।

¹⁵नबूकदनेसरले यहोयाकीनलाई कैद गरेर बेबिलोनमा लगे। उनले यरूशलेमबाट राजमाता, तिनका पत्‍नीहरू, तिनका अधिकारीहरू र देशका अग्रगण्‍य मानिसहरूलाई यरूशलेमबाट बेबिलोनमा लगे।

¹⁶बेबिलोनका राजाले सात हजार बलिया र लड़ाइँको निम्‍ति सुयोग्‍य योद्धाहरू र एक हजार कारीगर र कलाकारहरूलाई पनि बेबिलोनमा निर्वासन गरेर लगे।

¹⁷उनले यहोयाकीनका काका मत्तन्‍याहलाई तिनको सट्टामा राजा तुल्‍याए, र तिनको नाउँ सिदकियाह राखे।

¹⁸जब सिदकियाह राजा भए तब तिनी एक्‍काईस वर्षका थिए, र तिनले यरूशलेममा एघार वर्ष राज्‍य गरे। तिनकी आमाको नाउँ यर्मियाकी छोरी हमुतल थियो। तिनी लिब्‍नाकी थिइन्‌।

¹⁹तिनले यहोयाकीमले गरेझैँ परमप्रभुको दृष्‍टिमा जे कुरो खराब थियो त्‍यही गरे।

²⁰परमप्रभुको क्रोधले गर्दा यी सबै यरूशलेम र यहूदालाई हुन आए। आखिरमा उहाँले तिनीहरूलाई आफ्‍नो दृष्‍टिबाट निकालिदिनुभयो। तब सिदकियाह बेबिलोनका राजाको विरुद्धमा बागी भए।