Read Nepali New Revised Version, 2012 २ राजाहरू 25 Bible Online

२ राजाहरू 25 - Nepali New Revised Version, 2012 bible

२ राजाहरू 25

¹यसैले सिदकियाहका शासनको नवौँ वर्षको दशौँ महिनाको दशौँ दिनमा बेबिलोनका राजा नबूकदनेसर आफ्‍नो सबै सेनाको साथ यरूशलेमको विरुद्धमा अगि बढ़े, र त्‍यसको वरिपरि घेरा-मचान खड़ा गरे।

²सिदकियाह राजाको एघारौँ वर्षसम्‍म सहर घेराभित्र रह्यो।

³चौथो महिनाको नवौँ दिनमा सहरमा यति चर्को अनिकाल पर्‍यो, कि मानिसहरूलाई केही खानेकुरा थिएन।

⁴त्‍यही बेला सहरको पर्खाल भत्‍काएर बेबिलोनीहरूले सहरलाई घेरामा राखेकैमा सारा सेना राजाको बगैँचानेरका दुई पर्खालका बीचको ढोकाबाट राती भागे। तिनीहरू अराबातिर भागे,

⁵तर बेबिलोनी सेनाले राजालाई खेदे र तिनलाई यरीहोको मैदानमा फेला पारे। तिनका सबै सिपाहीहरू तिनीबाट अलग भएर तितरबितर भए।

⁶अनि तिनी पक्राउ परे। तिनी रिब्‍लामा बेबिलोनका राजाकहाँ ल्‍याइए, जहाँ तिनलाई सजायको फैसला भयो।

⁷उनीहरूले सिदकियाहका छोराहरूलाई तिनकै नजरको सामुन्‍ने मारे। त्‍यसपछि उनीहरूले आँखा फुटाइदिए, र तिनलाई काँसाको साङ्‌लाले बाँधेर बेबिलोनमा लगे।

⁸बेबिलोनका राजा नबूकदनेसरको उन्‍नाईसौँ वर्षको पाँचौँ महिनाको सातौँ दिनमा राजकीय अङ्गरक्षकहरूका सेनापति नबूजरदान, बेबिलोनका राजाका एक अधिकारी यरूशलेममा आए।

⁹उनले परमप्रभुको मन्‍दिर र राजमहल र सहरका सबै घरहरूमा आगो लगाइदिए। सबै मुख्‍य-मुख्‍य भवनहरूलाई उनले जलाइदिए।

¹⁰राजकीय अङ्गरक्षकहरूका सेनापतिको नेतृत्‍वमुनि सारा बेबिलोनी सेनाले यरूशलेमको वरिपरिका पर्खाल भत्‍काइदिए।

¹¹सेनापति नबूजरदानले सहरमा बाँकी रहेकाहरू र बाँकी रहेका अरू मानिसहरूलाई र बेबिलोनका राजाकहाँ गएकाहरूलाई निर्वासनमा लगे।

¹²तर ती सेनापतिले दाखबारी र खेतको काम गर्नका निम्‍ति अति दरिद्र मानिसहरूमा केही जनालाई त्‍यहाँ छोड़े।

¹³बेबिलोनीहरूले परमप्रभुको मन्‍दिरमा भएका काँसाका स्‍तम्‍भहरू, गुड्‌ने आधारहरू, र काँसाको विशाल खड्‌कुँलो ढाले, र काँसाचाहिँ बेबिलोनमा लगे।

¹⁴उनीहरूले भाँड़ाहरू, बेल्‍चाहरू, सलेदाका चिम्‍टाहरू, र कचौराहरू, र मन्‍दिरको सेवामा प्रयोग गरिने काँसाका सबै सरसामानहरू लगे।

¹⁵राजकीय अङ्गरक्षकहरूका सेनापतिले धुपौराहरू र छर्कने बाटाहरू, कञ्‍चन सुन वा चाँदीले बनाइएका जति सबै लगे।

¹⁶सोलोमनले परमप्रभुका मन्‍दिरको निम्‍ति बनाएका दुई वटा स्‍तम्‍भहरू, विशाल खड्‌कुँलो र गुड्‌ने आधारहरूको काँसो जोख्‍न नसक्‍ने थियो।

¹⁷प्रत्‍येक स्‍तम्‍भ अठाह्र हात अल्‍गो थियो। एउटा स्‍तम्‍भमाथिको स्‍तम्‍भ-शिर तीन हात अल्‍गो थियो, र काँसाको जाली र दारिमका बुट्टाले चारैतिर भरिएको थियो। अर्को स्‍तम्‍भ त्‍यसको जालीसमेत ठीक त्‍यही किसिमको थियो।

¹⁸अङ्गरक्षकहरूका सेनापतिले मुख्‍य पूजाहारी सरायाह र दोस्रो दर्जाका पूजाहारी सपन्‍याहलाई र तीन जना ढोकेहरूलाई पनि कैद गरेर लगे।

¹⁹सहरमा अझै रहेकाहरूमध्‍ये उनले योद्धाहरूका प्रमुख अधिकृत र पाँच जना राजकीय सल्‍लाहकारहरूलाई लगे। उनले देशका मानिसहरूलाई सेनामा भर्ना गर्ने मुख्‍य अधिकृत-सचिव र सहरमा फेला पारेका तिनका साठी जना मानिसहरूलाई पनि लगे।

²⁰अङ्गरक्षकका सेनापति नबूजरदानले रिब्‍लामा बेबिलोनका राजाकहाँ तिनीहरू सबैलाई ल्‍याए।

²¹त्‍यहाँ हमातका देशको रिब्‍लामा बेबिलोनका राजाले तिनीहरूलाई मार्न लाए। यसरी यहूदा आफ्‍नो देशबाट कैदमा लगियो।

²²बेबिलोनका राजा नबूकदनेसरले शापानका नाति, अहीकामका छोरा गदल्‍याहलाई यहूदामा आफूले छोड़ेका मानिसहरूमाथि नियुक्त गरे।

²³जब सेनाका सबै अधिकृतहरू र तिनीहरूका मानिसहरूले बेबिलोनका राजाले गदल्‍याहलाई राज्‍यपाल नियुक्त गरेको कुरा सुने, तब तिनीहरू मिस्‍पामा गदल्‍याहकहाँ आए— नतन्‍याहका छोरा इश्‍माएल, कारेहका छोरा योहानान, नतोपाती तन्‍हूमेतका छोरा सरायाह र माकातीका छोरा याजन्‍याह, र तिनीहरूका मानिसहरू।

²⁴गदल्‍याहले तिनीहरू र तिनीहरूका मानिसहरूलाई शपथ खाएर आश्‍वासन दिए, र तिनले भने, “बेबिलोनी अधिकारीहरूसँग नडराओ। देशमा बसोबास गर, र बेबिलोनका राजाको सेवा गर, र तिमीहरूको भलो हुनेछ।”

²⁵तर सातौँ महिनामा एलीशामाका नाति, नतन्‍याहका छोरा इश्‍माएल, जो राजकीय खूनका थिए, दश जना मानिसहरूलाई लिएर आए, अनि गदल्‍याह र तिनीसँग मिस्‍पामा भएका यहूदा र बेबिलोनका मानिसहरूलाई हत्‍या गरे।

²⁶यसैले बेबिलोनीहरूको डरले गर्दा सानादेखि लिएर ठूलासम्‍म, सेनाका अधिकृतहरूसमेत सबै मिश्रदेशमा भागे।

²⁷यहूदाका राजा यहोयाकीन निर्वासनमा लगिएको सैँतीसौँ वर्षमा एबील-मरोदक बेबिलोनका राजा भए। बाह्रौँ महिनाको सत्ताईसौँ दिनमा राजा एबील-मरोदकले यहोयाकीनलाई कैदबाट मुक्त गरिदिए।

²⁸उनले तिनीसँग दयालु कुरा गरे, र बेबिलोनमा आफूसँग भएका अरू राजाहरूभन्‍दा अझ उच्‍च सम्‍माननीय स्‍थानमा तिनलाई राखे।

²⁹यसरी यहोयाकीनले आफ्‍ना कैदको लुगा उतारे र आफ्‍नो बाँकी जीवनभरि राजाकै टेबिलमा बसेर बारम्‍बार खाने गरे।

³⁰राजाले तिनको निम्‍ति नियमित भत्ता तिनको जीवनकालभरि नै दिए।