Read Nepali New Revised Version, 2012 २ राजाहरू 8 Bible Online

२ राजाहरू 8 - Nepali New Revised Version, 2012 bible

२ राजाहरू 8

¹अब जुन स्‍त्रीको छोरालाई एलीशाले पुनर्जीवित पारेका थिए, त्‍यस स्‍त्रीलाई तिनले भनेका थिए, “तिम्रो परिवारसमेत यहाँबाट गइहाल, र केही समयको लागि जहाँ हुन्‍छ त्‍यहीँ प्रवास गर, किनभने परमप्रभुले सात वर्षसम्‍म अनिकालको उर्दी घोषणा गर्नुभएको छ।”

²परमेश्‍वरका जनले भनेझैँ ती स्‍त्रीले गरिन्‌। तिनी आफ्‍नो परिवारसमेत गइहालिन्, र पलिश्‍तीहरूको देशमा सात वर्ष बसिन्‌।

³सात वर्षको आखिरमा तिनी पलिश्‍तीहरूको देशबाट फर्केर आइन्, र आफ्‍नो घर र जग्‍गाजमिन फिर्ता पाउनलाई बिन्‍ती गर्न राजाकहाँ गइन्‌।

⁴त्‍यस बेला राजाचाहिँ परमेश्‍वरका जनको चाकर गेहजीसँग यसो भनेर कुरा गर्दैथिए, “एलीशाले गरेका सबै महान्‌ कार्यहरूका विषयमा मलाई भन्‌।”

⁵जब गेहजीले एलीशाले मरेकालाई कसरी प्राण दिए भनी राजालाई वर्णन गरिरहेको थियो, त्‍यही स्‍त्री, जसको छोरालाई एलीशाले मरेकाहरूबाट जीवित पारेका थिए, आफ्‍नो घर र जग्‍गाजमिनको निम्‍ति राजालाई बिन्‍ती गर्नलाई आइन्‌। गेहजीले भन्‍यो, “हे मेरा प्रभु महाराजा, यिनै स्‍त्री हुन्, र एलीशाले पुनर्जीवित पारेको तिनको छोरो यही हो।”

⁶राजाले ती स्‍त्रीलाई त्‍यस विषयमा सोधे, र तिनले पनि बताइदिइन्‌। तब राजाले तिनको मुद्दा एउटा अधिकारीको जिम्‍मामा लगाइदिए, र तिनलाई भने, “तिनका सबै जग्‍गाजमिन र तिनले देश छोड़ेर गएको समयदेखि अहिलेसम्‍मका जग्‍गाजमिनबाट आएको आम्दानीसमेत तिनलाई फिर्ता गरिदिनू।”

⁷एलीशा दमस्‍कसमा गए, र त्‍यस बेला अरामका राजा बेन-हदद बिरामी परेका थिए। जब राजालाई “परमेश्‍वरका जन यहाँ आएका छन्‌” भनी सुनाइयो,

⁸तब उनले हजाएललाई भने, “आफूसित उपहार लिएर परमेश्‍वरका जनलाई भेट गर्न जाऊ। तिनीद्वारा परमप्रभुसित सल्‍लाह लेऊ, र सोध, “के यस रोगबाट म निको हुन्‍छु कि’?”

⁹हजाएल आफूसित दमस्‍कसमा सबै किसिमका असल-असल थोकहरू उपहार स्‍वरूप चालीस वटा ऊँटमाथि बोकाएर गए। उनी भित्र गए, र अगमवक्ताको सामुन्‍ने उभिए, र भने, “तपाईंका छोरा अरामका राजा बेन-हददले मलाई यो कुरा सोध्‍नलाई तपाईंकहाँ पठाउनुभएको छ।” “के म यस रोगबाट निको हुन्‍छु’?”

¹⁰एलीशाले जवाफ दिए, “गएर उनलाई भन, ‘तिमी निश्‍चय नै निको हुनेछौ।” तर परमप्रभुले मलाई यो कुरा प्रकट गर्नुभएको छ, कि वास्‍तवमा उनी मर्नेछन्‌।”

¹¹तिनले एक टक लाएर एकोहोरो हजाएललाई हेरिरहे, र उनलाई शर्म लाग्‍यो। तब परमेश्‍वरका जन रुन लागे।

¹²हजाएलले सोधे, “हे मेरा प्रभु, तपाईं किन रुँदैहुनुहुन्‍छ?” तिनले जवाफ दिए, “किनभने तिमीले इस्राएलीहरूमाथि गर्ने बुराइ म जान्‍दछु। तिमीले तिनीहरूका किल्‍लाहरूमा आगो लाउनेछौ, र तिनीहरूका जवान मानिसहरूलाई तरवारले मार्नेछौ, तिनीहरूका ससाना बालकहरूलाई भूँइमा पछारेर मार्नेछौ, र गर्भवती स्‍त्रीहरूका पेट चिर्नेछौ।”

¹³हजाएलले भने, “म त जाबो एउटा कुकुरले यस्‍तो ठूलो काम कसरी गर्न सकुँला र?” एलीशाले जवाफ दिए, “तिमी अरामका राजा हुनेछौ भनी परमप्रभुले मलाई देखाउनुभएको छ।”

¹⁴यसपछि हजाएल एलीशाबाट बिदा भए, र आफ्‍ना मालिककहाँ फर्केर आए। जब बेन-हददले “एलीशाले तिमीलाई के भने” भनी सोधे, उनले उत्तर दिए, “‘तपाईं निश्‍चय नै निको हुनुहुनेछ” भनी तिनले मलाई भने।”

¹⁵तर भोलिपल्‍ट उनले एउटा बाक्‍लो कम्‍बल लिई पानीमा चोपेर राजाको मुख छोपिदिए, र यसरी उनी मरे। त्‍यसपछि हजाएल राजा भए।

¹⁶इस्राएलका राजा आहाबका छोरा योरामको पाँचौँ वर्षमा, जब यहोशापात यहूदाका राजा थिए, तब यहोशापातका छोरा यहोरामले यहूदाका राजा भएर राज्‍य सुरु गरे।

¹⁷जब तिनी राजा भए तब यहोराम बत्तीस वर्षका थिए, र तिनले यरूशलेममा आठ वर्ष राज्‍य गरे।

¹⁸आहाबका घरानाले गरेझैँ तिनी इस्राएलका राजाहरूका चालमा हिँड़े, किनकि तिनले आहाबकी एउटी छोरीलाई विवाह गरे। परमप्रभुको दृष्‍टिमा जे कुरा खराब थियो त्‍यही तिनले गरे।

¹⁹तरै पनि आफ्‍ना दास दाऊदको खातिर परमप्रभुले यहूदालाई नाश गर्न इच्‍छा गर्नुभएन। उहाँले दाऊद र तिनका सन्‍तानहरूलाई सदासर्वदाको निम्‍ति बलिरहने एउटा दियो कायम राख्‍ने प्रतिज्ञा गर्नुभएको थियो।

²⁰यहोरामको समयमा यहूदाको विरुद्धमा बागी भएर एदोमले आफ्‍नै राजा खड़ा गर्‍यो।

²¹यसैले यहोराम आफ्‍ना सबै रथहरू लिएर जाईरमा गए। एदोमीहरूले तिनी र तिनका रथहरूका सेनापतिहरूलाई घेरे, तर तिनी उठेर राती भागे। तापनि तिनका सेनाचाहिँ भागेर घर फर्के।

²²एदोम आजको दिनसम्‍मै यहूदाको विरुद्धमा बागी भएको छ। लिब्‍ना पनि त्‍यसै बेला बागी भयो।

²³यहोरामको राजकालका अरू घटनाहरू र तिनले गरेका सबै कार्यहरू के ती यहूदाका राजाहरूका इतिहासको पुस्‍तकमा लेखिएका छैनन्‌ र?

²⁴तब यहोराम आफ्‍ना पित्रहरूसँग सुते, र तिनीहरूसित दाऊदको सहरमा गाड़िए। अनि तिनीपछि तिनका छोरा अहज्‍याह राजा भए।

²⁵इस्राएलका राजा आहाबका छोरा योरामको बाह्रौँ वर्षमा यहूदाका राजा यहोरामका छोरा अहज्‍याहले राज्‍य गर्न लागे।

²⁶जब तिनी राजा भए तब अहज्‍याह बाईस वर्षका थिए, र तिनले यरूशलेममा एक वर्ष राज्‍य गरे। तिनकी आमाको नाउँ अतल्‍याह थियो। तिनी इस्राएलका राजा ओम्रीकी एउटी नातिनी थिइन्‌।

²⁷अहज्‍याह आहाबको घरानाका चालहरूमा हिँड़े, अनि आहाबको घरानाले गरेझैँ परमप्रभुको दृष्‍टिमा जे खराब थियो त्‍यही तिनले गरे, किनकि विवाहले गर्दा तिनको सम्‍बन्‍ध आहाबको घरानासित थियो।

²⁸अरामका राजा हजाएलको विरुद्धमा रामोत-गिलादमा लड़ाइँ गर्नलाई अहज्‍याह आहाबका छोरा योरामसित गए। तर अरामीहरूले योरामलाई घाइते बनाए।

²⁹यसैले अरामका राजा हजाएलसित लड़ाइँ गर्न जाँदा रामोत-गिलादमा पाएको चोटबाट निको हुनलाई राजा योराम यिजरेलमा फर्किगए। तब यहूदाका राजा यहोरामका छोरा अहज्‍याह योरामलाई हेर्न भनी यिजरेलमा गए, किनभने तिनलाई चोट लागेको थियो।