Read Nepali New Revised Version, 2012 १ इतिहास 12 Bible Online

१ इतिहास 12 - Nepali New Revised Version, 2012 bible

१ इतिहास 12

¹कीशका छोरा शाऊलको सामुन्‍ने दाऊदलाई आउन मनाही हुँदा सिक्‍लगमा यी निम्‍न लेखिएका मानिसहरू तिनीसँग मिल्‍न आए। यिनीहरू युद्धमा वीर-वीर लड़ाकू मानिसहरूमध्‍ये गनिएका थिए।

²यिनीहरू धनुर्धारी थिए, र दाहिने वा देब्रे हातले घुयेँत्रो चलाउन अथवा काँड़ हान्‍न सक्‍थे। यिनीहरू बेन्‍यामीनको कुलका शाऊलका कुटुम्‍बहरू थिए।

³तिनीहरूका प्रधान अहीएजेर र योआश, जो गिबियाती शेमाहका छोराहरू थिए, अज्‍मावेतका छोराहरू यजीएल र पलेत, बराकाह, अनातोती येहू,

⁴गिबोनी यिश्‍मायाह, जो ती तीसमध्‍येका एक वीर र तिनीहरूका प्रधान थिए।

⁵यर्मिया, यहासेल, योहानान र गदेराती योजाबाद, एलूजै, यरीमोत, बाल्‍याह, शमरयाह, हारूपी शपत्‍याह,

⁶एल्‍काना, यिश्‍याह, अज्रेल, कोरहवंशी योएजेर र याशोबाम,

⁷गदोरका यरोहामका छोराहरू योएलह र जबदियाह थिए।

⁸गादका कुनै-कुनै मानिसहरू पनि उजाड़-स्‍थानमा भएको गढ़ीमा दाऊदसँग मिल्‍न आए। तिनीहरू वीर-वीर मानिसहरू र युद्धको निम्‍ति तयार भएकाहरू थिए, जसले ढाल बोक्‍न र भाला चलाउन सक्‍थे। तिनीहरू सिंहझैँ भयानक र पहाड़हरूमा चाहिँ हरिणझैँ तेजिला थिए।

⁹एसेर तिनीहरूका प्रधान थिए, दोस्रा ओबदिया, तेस्रा एलिआब,

¹⁰चौथा मिश्‍मन्‍ना, पाँचौँ यर्मिया,

¹¹छैटौँ अत्तै, सातौँ एलीएल,

¹²आठौँ योहानान, नवौँ एल्‍जाबाद,

¹³दशौँ यर्मिया र एघारौँ मकबन्‍ने थिए।

¹⁴यी गादीहरू सेनाका सेनापतिहरू थिए। तिनीहरूमध्‍येका सबैभन्‍दा साना एक सयको दाँजो गर्न सक्‍ने र सबैभन्‍दा ठूलाचाहिँ एक हजारको दाँजो गर्न सक्‍ने थिए।

¹⁵यिनीहरू ती नै मानिसहरू थिए, जसले पहिलो महिनामा जब यर्दन नदी त्‍यसका सबै किनारसम्‍म बढ़ेर भरिएको थियो तब यर्दन तरेर त्‍यसका पूर्व र पश्‍चिमका बेँसीहरूमा बस्‍ने सबै मानिसहरूलाई भगाएर धपाए।

¹⁶बेन्‍यामीन र यहूदाका कुनै-कुनै मानिसहरू पनि गढ़ीमा दाऊदकहाँ आए।

¹⁷दाऊद तिनीहरूलाई भेट्‌न बाहिर निस्‍केर भने, “यदि तिमीहरू मलाई सहायता गर्न शान्‍तिमा आएका हौ भने मतर्फ लाग, र म तिमीहरूलाई स्‍वागत गर्नेछु। तर यदि म कुनै हत्‍याको दोषी नहुँदै पनि तिमीहरू धोकाबाजी गरेर मलाई मेरा शत्रुहरूका हातमा दिन आएका हौ भने, हाम्रा पुर्खाहरूका परमेश्‍वरले यो हेरेर न्‍याय गरून्‌।”

¹⁸त्‍यसै बेलामा ती तीस जनामध्‍येका प्रधान अमासैलाई आत्‍माले प्रेरणा दिनुभयो, र तिनले यसो भने, “हे दाऊद, हामी तपाईंतर्फ छौं! हे यिशैका छोरा, हामी तपाईंका साथ छौं! तपाईंलाई सफलता, सफलता, र तपाईंका सहायकहरूलाई सफलता, किनभने तपाईंका परमेश्‍वर नै तपाईंका सहायक हुनुहुन्‍छ।” यसैकारण दाऊदले तिनीहरूलाई स्‍वागत गरे, र आफ्‍ना लूटपीट गर्ने दलहरूका अगुवा तुल्‍याए।

¹⁹जब दाऊद शाऊलको विरुद्ध पलिश्‍तीहरूसँग लागेर लड्‌नलाई गए, तब मनश्‍शेका कुनै-कुनै मानिसहरू दाऊदतर्फ लागे। यद्यपि वास्‍तवमा तिनी पलिश्‍तीहरूतर्फ लागेर लड़ाइँ त गरेनन्, किनभने पलिश्‍तीहरूका शासकहरूले आपसमा यस्‍तो सल्‍लाह गरेर तिनलाई फर्काइदिए, “तिनले त आफ्‍ना मालिक शाऊलको निम्‍ति हामीलाई त्‍याग्‍नेछन्, र यसले गर्दा हामीहरूले आफ्‍ना प्राण गुमाउनुपर्नेछ।”

²⁰दाऊद सिक्‍लगमा हुँदा तिनीतर्फ लागेर आउने मनश्‍शेका मानिसहरू यी नै थिए: अदनाह, योजाबाद, येदीएल, मिखाएल, योजाबाद, एलीहू र सिल्‍लतै। यिनीहरू मनश्‍शेका हरेक एक-एक हजारका सेनानीहरू थिए।

²¹यिनीहरूले नै लूटपीट गर्नेहरूका विरुद्धमा वीरतासँग दाऊदका साथ दिए, किनभने तिनीहरू सबै असल योद्धा थिए, र तिनीहरू दाऊदको फौजमा सेनापति थिए।

²²दाऊदले एउटा ठूलो सेना तयार नगरुञ्‍जेल मानिसहरू दिनदिनै तिनलाई सहायता गर्न आए।

²³परमप्रभुले भन्‍नुभएबमोजिम शाऊलको राज्‍याधिकार दाऊदलाई दिन हेब्रोनमा हतियारले सुसज्‍जित भएर दाऊदसँग मिल्‍न आएका दलहरूका संख्‍या यही हुन्‌:

²⁴यहूदाका— ढाल बोकेर भाला चलाउने ६,८०० लड़ाकू मानिसहरू।

²⁵शिमियोनका— लड़ाइँ गर्न सक्‍ने ७,१०० योद्धाहरू।

²⁶लेवीका— ४,६००।

²⁷तीबाहेक हारूनको घरानाका मुखिया यहोयादाको साथमा ३,७०० मानिसहरू थिए,

²⁸अनि एक वीर योद्धा सादोकको साथमा आफ्‍नै परिवारका बाईस अधिकृतहरू थिए।

²⁹शाऊलका कुटुम्‍ब बेन्‍यामीनका— ३,०००। तिनीहरूमध्‍येका धेरैजसो त्‍यस बेलासम्‍म शाऊलको घरानाका भक्त भई बसेका थिए।

³⁰एफ्राइमका— २०,८०० लड़ाकू मानिसहरू, जो आफ्‍ना गोत्रमा प्रसिद्ध थिए।

³¹मनश्‍शेका आधा कुलका— १८,०००। दाऊदलाई राजा बनाउन यिनीहरू नै चुनिएका थिए।

³²इस्‍साखारका— जुन कुलका मानिसहरू इस्राएलले कुनचाहिँ बाटो लिनुपर्ने हो सो थाहा पाउने र समयको चिन्‍ह बुझ्‍ने निपुण २०० जना प्रधानहरू, र तिनीहरूका अधीनमुनि भएका तिनीहरूका कुटुम्‍बहरू।

³³जबूलूनका— लड़ाइँको निम्‍ति तयार भएका सब किसिमका हतियार प्रयोग गर्न सक्‍ने अनुभवी, साहसी र एकोहोरा ५०,००० योद्धाहरू।

³⁴नप्‍तालीका— १,००० अधिकृतहरू, अनि ढाल र भाला बोक्‍ने ३७,००० मानिसहरू।

³⁵दानका— लड़ाइँको निम्‍ति तयार भएका २८,६०० मानिसहरू।

³⁶आशेरका— लड़ाइँको निम्‍ति तयार भएका अनुभवी ४०,००० योद्धाहरू।

³⁷रूबेन, गाद र यर्दनको पूर्वपट्टिका मनश्‍शेको आधा कुलका— सबै किसिमका हतियारले सुसज्‍जित भएका १,२०,००० मानिसहरू।

³⁸यी सबै योद्धाहरू, लड़ाइँको निम्‍ति सुसज्‍जित मानिसहरू सारा इस्राएलमाथि दाऊदलाई राजा तुल्‍याउन दृढ़ सङ्कल्‍प गरेर हेब्रोनमा आए। बाँकी इस्राएलीहरूको पनि तिनलाई राजा तुल्‍याउने एउटै विचार थियो।

³⁹तिनीहरू त्‍यहाँ खाँदै र पिउँदै तीन दिनसम्‍म दाऊदसँग बिताए, किनभने तिनीहरूका कुटुम्‍बहरूले तिनीहरूका निम्‍ति खानपानको बन्‍दोबस्‍त गरेका थिए।

⁴⁰तिनीहरूका चारैतिरका छिमेकीहरूले इस्‍साखार, जबूलून र नप्‍तालीसम्‍म टाढ़ाबाट गधा, ऊँट, खच्‍चर र गोरुहरूमा खानेकुरा ल्‍याए। पीठो, नेभाराका डल्‍ला, किसमिसका झुप्‍पा, दाखमद्य, तेल, गाई-गोरुहरू, भेड़ाहरू धेरै संख्‍यामा थिए, किनभने इस्राएल आनन्‍दले भरिएको थियो।