Read Nepali New Revised Version, 2012 १ इतिहास 13 Bible Online

१ इतिहास 13 - Nepali New Revised Version, 2012 bible

१ इतिहास 13

¹दाऊदले आफ्‍ना हरेक अधिकृत, हजारका सेनानीहरू र सयका कप्‍तानहरूसँग सल्‍लाह लिन्‍थे।

²तब तिनले इस्राएलका जम्‍मै समुदायलाई भने, “यदि तपाईंहरू सम्‍मति दिनुहुन्‍छ, र यदि परमप्रभु हाम्रा परमेश्‍वरले बाटो खोलिदिनुभयो भने, हामी इस्राएलका सबै इलाकाहरूमा बाँकी रहेका हाम्रा कुटुम्‍बहरू र तिनीहरूका सहर र चरनहरूमा बस्‍ने पूजाहारी र लेवीहरूलाई हामीसँग मिल्‍न आऊन्‌ भनी समाचार पठाऔं।

³हाम्रा परमेश्‍वरको सन्‍दूक हामी ल्‍याऔं, किनकि शाऊल बाँचुञ्‍जेल हामीले कहिल्‍यै त्‍यसको वास्‍ता गरेनौं।”

⁴तब सबै समुदायले त्‍यसो गर्ने निश्‍चय गरे, किनभने समस्‍त मानिसहरूले यसो गर्ने सम्‍मति दिए।

⁵यसैले किर्यत-यारीमबाट परमेश्‍वरको सन्‍दूक ल्‍याउन मिश्रदेशको शिहोर नदीदेखि लेबो-हमातसम्‍मका जम्‍मै इस्राएलीहरूलाई दाऊदले भेला गराए।

⁶तब दाऊद र सबै इस्राएलीहरू यहूदामा पर्ने बाला, अर्थात्‌ किर्यत-यारीममा करूबहरूका बीचमा विराजमान हुनुहुने परमेश्‍वर परमप्रभुको उहाँकै नाउँले कहलाएको सन्‍दूक लिनलाई उक्‍लेर गए।

⁷तिनीहरूले अबीनादाबको घरबाट परमेश्‍वरको सन्‍दूक लिएर एउटा नयाँ गाड़ामा राखे, र उज्‍जाह र अहियोले चाहिँ त्‍यो गाड़ा हाँक्‍दै लगे।

⁸दाऊद र सबै इस्राएलीहरू परमेश्‍वरको सामु गीत, वीणा, सारङ्गी, खैँजड़ी, झ्‍याली र तुरहीसित खूब जोशले रमाए।

⁹तिनीहरू कीदोनको खलामा आइपुग्‍दा ती गोरुहरूले ठक्‍कर खाए, र उज्‍जाहले सन्‍दूक समात्‍न आफ्‍नो हात बढ़ाए।

¹⁰तर परमप्रभु उज्‍जाहसँग क्रोधित भएर तिनलाई प्रहार गर्नुभयो। किनभने तिनले आफ्‍नो हात बढ़ाएर सन्‍दूक छोएका थिए। यसैले तिनी परमेश्‍वरको सामुन्‍ने त्‍यहीँ नै मरे।

¹¹परमप्रभुको क्रोध उज्‍जाहमाथि परेकोले दाऊद अप्रसन्‍न भए, र तिनले त्‍यस ठाउँको नाउँ फारेस-उज्‍जाह राखे। त्‍यो नाउँ अझसम्‍मै छ।

¹²त्‍यस दिन दाऊद परमेश्‍वरसँग डराए, र तिनले सोधे, “त्‍यसो भएपछि मैले परमेश्‍वरको सन्‍दूकलाई मेरो जिम्‍मामा कसरी राख्‍न सक्‍छु?”

¹³यसैले तिनले सन्‍दूक आफूसित दाऊदको सहरमा लगेनन्, तर एकातिर लागेर गित्ती ओबेद-एदोमको घरमा लगे।

¹⁴यसरी सन्‍दूक ओबेद-एदोमको घरानासित तिनकै घरमा तीन महिनासम्‍म रह्यो, अनि परमेश्‍वरले ओबेद-एदोमको घराना र तिनका घरमा भएका सबैलाई आशिष् दिनुभयो।