Read Nepali New Revised Version, 2012 १ इतिहास 18 Bible Online

१ इतिहास 18 - Nepali New Revised Version, 2012 bible

१ इतिहास 18

¹केही बेरपछि दाऊदले पलिश्‍तीहरूलाई जितेर परास्‍त गरे, र उनीहरूबाट गात र त्‍यसका वरिपरिका गाउँहरू लिए।

²तिनले मोआबीहरूलाई पनि जिते, र उनीहरू तिनको अधीनमा भएर तिनलाई कर तिर्ने गरे।

³यूफ्रेटिस नदीको किनारमा आफ्‍नो अधिकार कायम राख्‍न जाँदा दाऊदले सोबाका राजा हददेजेरसँग हमातसम्‍म लड़ाइँ गरे।

⁴उनीबाट दाऊदले एक हजार रथ, सात हजार सारथिहरू र बीस हजार पैदल सिपाहीहरू कैद गरे। तिनले एक सय घोड़ाबाहेक अरू सबै रथका घोड़ाहरूका खुट्टाका नशा काटिदिए।

⁵जब सोबाका राजा हददेजेरलाई सहायता गर्नलाई दमस्‍कसका अरामीहरू आए, तब दाऊदले उनीहरूका बाईस हजार जनालाई नाश गरे,

⁶र ती अरामीहरूको राज्‍य दमस्‍कसमा छाउनी बसाले। उनीहरू तिनका अधीनमा भएर तिनलाई कर तिर्ने गरे। यसरी दाऊद जहाँ गए तापनि परमप्रभुले तिनलाई विजयी तुल्‍याउनुभयो।

⁷हददेजेरका अधिकृतहरूले भिरेका सुनका ढालहरू दाऊदले खोसेर यरूशलेममा ल्‍याए।

⁸तिनले हददेजेरका सहरहरू तेबह र कूनबाट पनि धेरै मात्रामा काँसा ल्‍याए। यसैबाट सोलोमनले काँसाको एउटा विशाल खड्‌कुँलो, स्‍तम्‍भहरू र काँसाका विभिन्‍न भाँड़ाहरू बनाए।

⁹जब दाऊदले सोबाका राजा हददेजेरका जम्‍मै सेनालाई परास्‍त गरेको कुरा हमातका राजा तोऊले सुने,

¹⁰तब दाऊदले हददेजेरलाई लड़ाइँमा जितेको कारण तिनलाई अभिवादन र बधाई दिन उनले आफ्‍ना छोरा हदोरमलाई दाऊद राजाकहाँ पठाए, किनभने हददेजेर र तोऊका बीचमा युद्ध चलेको थियो। हदोरमले आफूसँग सुन, चाँदी र काँसका सबै किसिमका भाँड़ाहरू ल्‍याए।

¹¹दाऊद राजाले यी भाँड़ाहरू परमप्रभुमा समर्पण गरे। तिनले अरू सबै जातिहरू— एदोम, मोआब, अम्‍मोनीहरू, पलिश्‍तीहरू र अमालेक— तीबाट लिएका सुन र चाँदी पनि समर्पण गरे।

¹²एदोमचाहिँ सरूयाहका छोरा अबीशैले परास्‍त गरे। तिनले नूनको उपत्‍यकामा उनीहरूका अठाह्र हजारलाई नाश गरे।

¹³उनीहरूको देशमा छाउनी बसाले, सबै एदोमीहरू अब दाऊदका अधीनमा भए। जहाँ-जहाँ तिनी गए परमप्रभुले दाऊदलाई विजयी तुल्‍याउनुभयो।

¹⁴दाऊदले सारा इस्राएलमाथि राज्‍य गरे, र आफ्‍ना सबै प्रजामाथि ऐन र न्‍याय कायम गरे।

¹⁵सरूयाहका छोरा योआब सेनापति थिए। अहीलूदका छोरा यहोशापात लेखापाल थिए।

¹⁶अहीतूबका छोरा सादोक र अबियाथारका छोरा अहीमेलेक पूजाहारीहरू थिए। शब्‍शा सचिव थिए।

¹⁷यहोयादाका छोरा बनायाह करेती र पेलेथीहरूका जिम्‍मावाल थिए। दाऊदका छोराहरूचाहिँ राजाका मुख्‍य अधिकारीहरू थिए।