Read Nepali New Revised Version, 2012 १ इतिहास 22 Bible Online

१ इतिहास 22 - Nepali New Revised Version, 2012 bible

१ इतिहास 22

¹तब दाऊदले भने, “परमप्रभु परमेश्‍वरका भवनको स्‍थान यही हुनेछ, र यही नै इस्राएलको निम्‍ति होमबलिको वेदी पनि हुनेछ।”

²तब दाऊदले इस्राएलमा बसोबास गर्ने परदेशीहरूलाई भेला हुने हुकुम गरे, र तिनीहरूलाई ढुङ्गा काटेर तयार गर्न परमप्रभुको भवन बनाउने काममा खटाए।

³तिनले ढोकाहरू र चौकोसहरूका लागि कीला बनाउनका निम्‍ति धेरै फलाम दिए, र काँसा जोखी नसक्‍ने गरी पनि दिए।

⁴अनि देवदारुका काठ बेहिसाब थुपारे, किनभने सीदोनी र टुरोसका मानिसहरूले दाऊदको निम्‍ति प्रशस्‍त मात्रामा देवदारु ल्‍याइदिए।

⁵दाऊदले भने, “मेरो छोरो सोलोमन कलिलै छ। परमप्रभुको निम्‍ति निर्माण गरिने भवन अत्‍यन्‍तै शोभायमान र सबै देशमा प्रसिद्ध र नाउँ चलेको हुनुपर्छ। यसकारण त्‍यो निर्माण गर्नलाई मैले नै सबै तयारी गर्नेछु।” यसैले आफ्‍नो मृत्‍युअघि नै दाऊदले प्रचुर सामान तयार गर्न लागे।

⁶तिनले आफ्‍ना छोरा सोलोमनलाई बोलाइपठाए, र परमप्रभु इस्राएलका परमेश्‍वरको निम्‍ति एउटा भवन निर्माण गर्ने आज्ञा दिए।

⁷तिनले सोलोमनलाई भने, “हे मेरो छोरो, परमप्रभु मेरा परमेश्‍वरका नाउँको निम्‍ति एउटा भवन निर्माण गर्ने मेरो अभिप्राय थियो।

⁸तर परमप्रभुले मलाई मनाही गरेर भन्‍नुभयो, ‘तैंले धेरै रक्तपात र ठूला-ठूला युद्ध गरेको छस्‌। मेरो नाउँको निम्‍ति तैंले यो भवन निर्माण गर्नेछैनस्, किनभने मेरो दृष्‍टिमा तैंले पृथ्‍वीमा धेरै रक्तपात गरेको छस्‌।

⁹तर तेरो एउटा छोरो हुनेछ, जो शान्‍तिको मानिस हुनेछ। म चारैतिर त्‍यसका सबै शत्रुहरूबाट त्‍यसलाई शान्‍ति दिनेछु। त्‍यसको नाउँ सोलोमन हुनेछ। त्‍यसको राजकालमा म इस्राएललाई शान्‍ति र चैन दिनेछु।

¹⁰त्‍यसैले नै मेरो नाउँको निम्‍ति एउटा भवन बनाउनेछ। त्‍यो मेरो छोरो हुनेछ, र म त्‍यसका पिता हुनेछु। अनि म इस्राएलमा सदासर्वदाको लागि त्‍यसको राज्‍यको सिंहासन स्‍थिर गर्नेछु’।

¹¹“अब हे मेरो छोरो सोलोमन, परमप्रभु तँसँग रहून्‌। तैंले नै बनाउनुपर्छ भनी उहाँले भन्‍नुभएअनुसार तेरो उन्‍नति होस्, र तैंले परमप्रभु तेरा परमेश्‍वरको घर बना।

¹²परमप्रभुले तँलाई बुद्धि र ज्ञान देऊन्, कि उहाँले तँलाई इस्राएलमाथि अधिकार दिनुहुँदा तैंले परमप्रभु तेरा परमेश्‍वरको व्‍यवस्‍था पालन गर्‌।

¹³इस्राएलको निम्‍ति मोशालाई परमप्रभुले आदेश दिनुभएअनुसार यदि तँ उहाँका विधि र नियमहरू पालन गर्नलाई होशियार भइस्‌ भने तेरो उन्‍नति हुनेछ। साहसी र दृढ़ हो, निर्बल र निरुत्‍साहित नहो।

¹⁴“ज्‍यादै दु:ख उठाएर मैले परमप्रभुका मन्‍दिरको निम्‍ति एक लाख तोड़ा [1] सुन, दश लाख तोड़ा [2] चाँदी, जोख्‍नै नसकिने काँसा र फलाम जोहो गरिराखेको छु। काठपात र ढुङ्गा पनि तयार गरिराखेको छु। तैंले त्‍यसमा अरू थप्‍न सक्‍छस्‌।

¹⁵त्‍यसबाहेक तँसित धेरै कारीगर, डकर्मी, ढुङ्गा काट्‌ने, सिकर्मीहरू,

¹⁶अनि सुन, चाँदी, काँसा र फलामका सबै किसिमका काम गर्ने अनगन्‍ती निपुण मानिसहरू पनि छन्‌। यसैकारण अब काम सुरु गर्, र परमप्रभु तँसित होऊन्‌।”

¹⁷दाऊदले इस्राएलका सबै अगुवाहरूलाई आफ्‍ना छोरा सोलोमनलाई सघाउन भनी यसो भनेर हुकुम गरे,

¹⁸“के परमप्रभु तिमीहरूका परमेश्‍वर तिमीहरूसँग हुनुहुन्‍न? के उहाँले तिमीहरूलाई चारैतिर शान्‍ति दिनुभएको छैन? किनकि उहाँले यस देशका बासिन्‍दाहरूलाई मेरो अधीनमा राख्‍नुभएको छ। उनीहरू परमप्रभु र उहाँका प्रजाको अधीनमा छन्‌।

¹⁹अब परमप्रभु तिमीहरूका परमेश्‍वरको अगुवाइ खोज्‍न आफ्‍नो तनमन लगाओ। उहाँको पवित्रस्‍थान निर्माण गर्नमा लाग, ताकि तिमीहरूले परमप्रभुका करारको सन्‍दूक र परमेश्‍वरका पवित्र भाँड़ाकुँड़ाहरू उहाँको नाउँको निम्‍ति बनाइएको मन्‍दिरमा ल्‍याओ।”