Read Nepali New Revised Version, 2012 १ इतिहास 27 Bible Online

१ इतिहास 27 - Nepali New Revised Version, 2012 bible

१ इतिहास 27

¹इस्राएलीहरूको सूची— अर्थात्‌ परिवार-परिवारका मुखियाहरू र हजार र सयका सेनापतिहरू, आफ्‍ना अधिकृतहरूसमेत, जसले सेनाका भागहरूका सम्‍बन्‍धमा वर्षभरि महिना-महिनामा राजाको सेवा गर्थे— प्रत्‍येक विभागमा २४,००० जना थिए।

²जब्‍दीएलका छोरा याशोबाम पहिलो महिनाको लागि पहिलो भागका जिम्‍मावाल थिए। तिनको भागमा २४,००० जना थिए।

³तिनी फारेसका सन्‍तान थिए, अनि पहिलो महिनाको लागि सेनाका अधिकृतहरूमध्‍ये तिनी प्रमुख थिए।

⁴अहोही दोदै दोस्रो महिनाको लागि त्‍यस भागका जिम्‍मावाल थिए। तिनको भागका नायक मिक्‍लोत थिए। तिनको भागमा २४,००० जना थिए।

⁵पूजाहारी यहोयादाका छोरा बनायाह तेस्रो महिनाको लागि तेस्रा सेनापति थिए। तिनी प्रमुख थिए, र तिनको भागमा २४,००० जना थिए।

⁶यिनी ती नै बनायाह थिए, जो तीस जना वीरहरूमध्‍येका थिए। तिनका छोरा अम्‍मीजाबाद तिनको भागका जिम्‍मावाल थिए।

⁷चौथो, चौथो महिनाको लागि योआबका भाइ असाहेल, जिम्‍मावाल थिए। तिनीपछि तिनका छोरा जबदियाह भए। तिनको भागमा २४,००० जना थिए।

⁸पाँचौँ, पाँचौँ महिनाको लागि यिज्‍याही शम्‍हूत सेनापति थिए। तिनको भागमा २४,००० जना थिए।

⁹छैटौँ, छैटौँ महिनाको लागि तकोका मानिस इक्‍केशका छोरा ईरा जिम्‍मावाल थिए। तिनको भागमा २४,००० जना थिए।

¹⁰सातौँ, सातौँ महिनाको लागि एफ्राइमका पेलोनी हेलेस जिम्‍मावाल थिए। तिनको भागमा २४,००० जना थिए।

¹¹आठौँ, आठौँ महिनाको लागि जेरहको घरानाका हूशाती सिब्‍बकै जिम्‍मावाल थिए। तिनको भागमा २४,००० जना थिए।

¹²नवौँ, नवौँ महिनाको लागि बेन्‍यामीनका अनातोती अबीएजेर जिम्‍मावाल थिए। तिनको भागमा २४,००० जना थिए।

¹³दशौँ, दशौँ महिनाको लागि जेरहको घरानाका नतोपाती महरै जिम्‍मावाल थिए। तिनको भागमा २४,००० जना थिए।

¹⁴एघारौँ, एघारौँ महिनाको लागि एफ्राइमका पिरातोनी बनायाह जिम्‍मावाल थिए। तिनको भागमा २४,००० जना थिए।

¹⁵बाह्रौँ, बाह्रौँ महिनाको लागि ओत्‍निएलको घरानाका नतोपाती हेल्‍दै जिम्‍मावाल थिए। तिनको भागमा २४,००० जना थिए।

¹⁶इस्राएलका कुलहरूका मुख्‍य अधिकृतहरू यी नै थिए: रूबेनको कुलका: जिक्रीका छोरा एलीएजर मुख्‍य अधिकृत थिए। शिमियोनका: माकाका छोरा शपत्‍याह।

¹⁷लेवीका: कमूएलका छोरा हशब्‍याह। हारूनका: सादोक।

¹⁸यहूदाका: दाऊदका दाजु एलीहू। इस्‍साखारका: मिखाएलका छोरा ओम्री।

¹⁹जबूलूनका: ओबदियाका छोरा यिश्‍मायाह। नप्‍तालीका: अज्रीएलका छोरा यरीमोत।

²⁰एफ्राइमका: अजज्‍याहका छोरा होशिया। मनश्‍शेको आधा कुलका: पदायाहका छोरा योएल।

²¹गिलादमा भएका मनश्‍शेको आधाकुलका: जकरियाका छोरा इद्दो। बेन्‍यामीनका: अबनेरका छोरा यासीएल।

²²दानका: अबनेरका छोरा अज्रेल। कुलहरूका मुख्‍य अधिकृतहरू यी नै थिए।

²³दाऊदले बीस वर्षदेखि उँधोकाहरूको जनसंख्‍या लिएनन्, किनभने परमप्रभुले इस्राएललाई आकाशका ताराहरूझैँ संख्‍यामा बढ़ाउनेछु भनी प्रतिज्ञा गर्नुभएको थियो।

²⁴सरूयाहका छोरा योआबले जनसंख्‍या लिन थालेका थिए, तर तिनले त्‍यो काम सिद्ध्याएनन्‌। यसले गर्दा इस्राएलमाथि क्रोध आइपर्‍यो, र यो जनसंख्‍या दाऊद राजाको इतिहासमा लेखिएन।

²⁵राजाका भण्‍डारहरू अदीएलका छोरा अज्‍मावेतको जिम्‍मामा थिए। देशका, सहरहरूका, गाउँहरूका र किल्‍लाहरूका भण्‍डारहरू उज्‍जियाहका छोरा जोनाथनको जिम्‍मामा थिए।

²⁶देशमा खेतीकिसानी गर्नेहरू कलूबको छोरा एस्रीको जिम्‍मामा थिए।

²⁷दाखबारीहरू रामती शिमीको जिम्‍मामा थिए। दाखमद्य राख्‍ने भण्‍डारको निम्‍ति दाखबारीको उब्‍जनी शेपेमी जब्‍दीको जिम्‍मामा थियो।

²⁸पश्‍चिमतिरको तराईमा भएका भद्राक्ष र अञ्‍जीरको हेरचाह गर्ने गेदेरी बाल-हानान थिए। तेल राख्‍ने भण्‍डार योआशको जिम्‍मामा थियो।

²⁹शारोनमा चर्ने गाई-गोरुहरू शारोनी शित्रैको जिम्‍मामा थिए। बेँसीमा गाई-गोरुहरू अदलैका छोरा शाफातको जिम्‍मामा थिए।

³⁰ऊँटहरू इश्‍माएली ओबीलको जिम्‍मामा थिए। गधाहरू मेरोनोती येहदयाहको जिम्‍मामा थिए।

³¹भेड़ाबाख्रा हग्री याजीजको जिम्‍मामा थिए। दाऊद राजाका आफ्‍नै निज सम्‍पत्ति यी नै अधिकारीहरूको जिम्‍मामा थिए।

³²दाऊदका काका जोनाथन एक सल्‍लाहकार, बुद्धिमानी र शास्‍त्री थिए। हक्‍मोनीका छोरा यहीएल राजाका छोराहरूको हेरचाह गर्ने थिए।

³³अहीतोपेल राजाका सल्‍लाहकार थिए। अरकी हूशै राजाका मित्र थिए।

³⁴अहीतोपेलपछि बनायाहका छोरा यहोयादा र अबियाथार सल्‍लाहकार भए। अनि योआबचाहिँ सेनापति थिए।