Read Nepali New Revised Version, 2012 २ इतिहास 11 Bible Online

२ इतिहास 11 - Nepali New Revised Version, 2012 bible

२ इतिहास 11

¹जब रहबाम यरूशलेममा आइपुगे, तब तिनले आफ्‍नो निम्‍ति राज्‍य फिर्ता लिन इस्राएलको विरुद्धमा लड़ाइँ गर्नलाई यहूदा र बेन्‍यामीनका घरानाका एक लाख असी हजार योद्धाहरू भेला गरे।

²तर परमप्रभुको यो वचन परमेश्‍वरका जन शमायाहकहाँ आयो:

³“सोलोमनको छोरो यहूदाको राजा रहबामलाई र यहूदा र बेन्‍यामीनमा भएका सबै इस्राएलीहरूलाई भन्,

⁴‘परमप्रभु यसो भन्‍नुहुन्‍छ: तिमीहरू आफ्‍ना दाजुभाइहरूको विरुद्धमा युद्ध गर्न उक्‍लेर नजाओ। तिमीहरू हरेक आ-आफ्‍नो घरमा फर्केर जाओ, किनभने यो काम मैले गरेको हो’।” यसैकारण तिनीहरूले परमप्रभुका वचन पालन गरे, र यारोबामको विरुद्धमा आफ्‍नो धावा त्‍यागिदिए।

⁵रहबाम यरूशलेममा वास गरे, र तिनले यहूदाका कुनै-कुनै सहरका गढ़ीहरू सुरक्षित बनाए।

⁶तिनले सुरक्षित बनाएका यहूदा र बेन्‍यामीनमा भएका सहरहरू यी नै थिए:

⁷बेथलेहेम, एताम, तको,

⁸बेथ-सर, सोखो, अदुल्‍लाम, गात, मारेशा, जीप,

⁹अदोरेम, लाकीश, आजेका,

¹⁰सोरा, अय्‍यालोन र हेब्रोन।

¹¹तिनले ती सहरका गढ़ीहरू सुदृढ़ पारे, र तिनमा राज्‍यपालहरूलाई नियुक्त गरे, अनि खानेकुरा, तेल र दाखमद्य पनि तिनमा सञ्‍चय गरिदिए।

¹²तिनले प्रत्‍येक सहरमा ढाल र भालाहरू जम्‍मा गरेर राखे, र तिनका गढ़ीहरू सुदृढ़ पारे। यसरी तिनले यहूदा र बेन्‍यामीनमाथि आफ्‍नो अधिकार कायम राखे।

¹³जम्‍मै इस्राएलका चारैतिरबाट पूजाहारीहरू र लेवीहरू आ-आफ्‍ना इलाकाहरूबाट रहबामकहाँ आए।

¹⁴लेवीहरू आफ्‍ना सबै खर्क र पैतृक-जग्‍गाजमिनहरू छोड़ेर यहूदा र यरूशलेममा बस्‍न आए, किनकि यारोबाम र तिनका सन्‍तानहरूले तिनीहरूलाई परमप्रभुका पूजाहारीगिरीबाट वञ्‍चित गरेका थिए।

¹⁵डाँड़ाका अल्‍गा थानहरू र तिनले बनाएका बाख्रा र बाछाका मूर्तिहरू पूजा गर्न यारोबामले आफ्‍नै पूजाहारीहरू नियुक्त गरे।

¹⁶परमप्रभु इस्राएलका परमेश्‍वरलाई खोज्‍न अठोट गर्ने इस्राएलका सबै कुलबाट आएकाहरूचाहिँ परमप्रभु तिनीहरूका पुर्खाहरूका परमेश्‍वरलाई बलिदान चढ़ाउन यरूशलेममा जाने लेवीहरूका पछि लागे।

¹⁷तिनीहरूले यहूदाको राज्‍य स्‍थिर गरेर तीन वर्षसम्‍म सोलोमनका छोरो रहबामलाई समर्थन गरे, र त्‍यस बेला तिनीहरू दाऊद र सोलोमनका चालअनुसार हिँड़े।

¹⁸रहबामले महलतलाई विवाह गरे। तिनका पिता दाऊदका छोरा यरीमोत र आमाचाहिँ यिशैका छोरा एलीआबकी छोरी अबीहेल थिइन्‌।

¹⁹तिनीबाट रहबामका यी छोराहरू भए: येऊश, शमरयाह र साहम।

²⁰त्‍यसपछि तिनले अब्‍शालोमकी छोरी माकालाई विवाह गरे। तिनीबाट तिनका यी सन्‍तान भए: अबिया, अत्तै, जीजा र शलोमीत।

²¹आफ्‍ना सबै पत्‍नी र उपपत्‍नीहरूमध्‍ये रहबामले माकालाई ज्‍यादै प्रेम गर्थे। तिनका जम्‍मा अठाह्र पत्‍नी र साठी उपपत्‍नीहरू थिए। तिनी अट्ठाईस जना छोरा र साठी छोरीहरूका पिता भए।

²²रहबामले माकाका छोरा अबियालाई युवराज बनाएर आफूपछि सिंहासनमा बसाल्‍न योजना बनाई उनलाई आफ्‍ना सबै दाजुभाइहरूमध्‍ये सबैभन्‍दा मुख्‍य नियुक्त गरे।

²³यहूदा र बेन्‍यामीनका जम्‍मै इलाकाहरू र सबै सुरक्षित सहरहरूको जिम्‍मा आफ्‍ना कोही छोराहरूलाई दिएर तिनले आफ्‍नो बुद्धिमानी देखाए। तिनले तिनीहरूका निम्‍ति प्रशस्‍त खानेकुरा सञ्‍चय गरे, र तिनीहरूका निम्‍ति पत्‍नी पनि लिए।