Read Nepali New Revised Version, 2012 २ इतिहास 16 Bible Online

२ इतिहास 16 - Nepali New Revised Version, 2012 bible

२ इतिहास 16

¹आसाका राजकालको छत्तीसौँ वर्षमा इस्राएलका राजा बाशाले यहूदामाथि चढ़ाइ गरे। यहूदाका राजा आसाको देशमा सबै प्रवेश गर्ने ठाउँहरू रोक्‍न भनी बाशाले रामालाई मजबूत बनाए।

²आसाले परमप्रभुको मन्‍दिर र राजाको महलका भण्‍डारका सुन र चाँदीहरू निकालेर दमस्‍कसमा राज्‍य गर्ने अरामका राजा बेन-हददकहाँ यसो भनेर बिन्‍ती गरिपठाए,

³“हाम्रा पुर्खाहरूका बीचमा भएझैँ हाम्रा बीचमा एउटा सन्‍धि होस्‌। अब म यो सुन र चाँदीको सौगात पठाउँदैछु। यसैकारण इस्राएलका राजा बाशासँग तपाईंको सन्‍धि तोड़िदिनुहोस्, र मेरो विरुद्धमा गरेको यो धावा तिनले छोड़िदेऊन्।”

⁴बेन-हददले आसा राजाको कुरा स्‍वीकार गरे। तिनले आफ्‍ना सेनापतिहरूलाई इस्राएलका सहरहरूका विरुद्धमा लड्‌न हुकुम दिए, र तिनीहरूले इयोन, दान, हाबिल-मैम अनि नप्‍तालीका सबै भण्‍डार राख्‍ने सहरहरूलाई कब्‍जा गरे।

⁵जब बाशाले यो कुरा सुने तब तिनले रामालाई मजबूत बनाउन छोड़िदिए, र त्‍यसमा गरिराखेका सबै काम बन्‍द गरिदिए।

⁶त्‍यसपछि आसा राजाले यहूदाका सबै मानिसहरूलाई आफूसित लगेर बाशाले सुरक्षित गरेको रामा सहरका ढुङ्गा र काठहरू उठाएर लगे। अनि गेबा र मिस्‍पालाई मजबूत पार्न ती प्रयोग गरे।

⁷त्‍यस बेला दर्शी हनानी यहूदाका राजा आसाकहाँ आएर भने, “तपाईंले परमप्रभु आफ्‍ना परमेश्‍वरमाथि होइन तर अरामका राजामाथि भरोसा गर्नुभएकोले गर्दा इस्राएलका राजाको सेना तपाईंको हातबाट भागेको छ।

⁸के कूशीहरू र लिबियालीहरू असंख्‍य रथहरू र घोड़चढ़ीहरू भएको विशाल सेना थिएनन्‌? तापनि जब तपाईंले परमप्रभुमाथि भरोसा राख्‍नुभयो, तब उहाँले उनीहरूलाई तपाईंको हातमा सुम्‍पिदिनुभयो।

⁹किनकि जसका हृदय उहाँप्रति भक्त छन्, तिनीहरूलाई सहायता दिन सारा पृथ्‍वीभरि नै परमप्रभुको दृष्‍टि रहिरहन्‍छ। यस कुरामा तपाईंले मूर्खता गर्नुभयो। अब उप्रान्‍त तपाईंले युद्ध गरिरहनुपर्नेछ।”

¹⁰यी कुराले आसा ती दर्शीसँग रिसाए, यतिसम्‍म कि आसाले तिनलाई थुनामा राखे। त्‍यस बेला तिनले कोही-कोही मानिसहरूमाथि साह्रै अत्‍याचार गरे।

¹¹आसाको शासनकालका अरू घटनाहरू सुरुदेखि अन्‍त्‍यसम्‍मै यहूदा र इस्राएलका राजाहरूका इतिहासको पुस्‍तकमा लेखिएका छन्‌।

¹²आफ्‍नो शासनकालको उनन्‍चालीसौँ वर्षमा तिनलाई खुट्टा कुहुने रोगले आक्रमण गर्‍यो। त्‍यो रोग साह्रो भए तापनि तिनले परमप्रभुको सहायता खोजेनन्, तर वैद्यहरूको मात्र सल्‍लाह लिए।

¹³तब आफ्‍नो राजकालको एकचालीसौँ वर्षमा तिनी आफ्‍ना पित्रहरूसित सुते।

¹⁴तिनी त्‍यस चिहानमा गाड़िए, जो तिनले दाऊदको सहरमा आफ्‍नो निम्‍ति बनाएका थिए। त्‍यसमा निपुणतासाथ मिसाएर बनाएका सबै किसिमका मसला मिलाइएका थिए। अनि मानिसहरूले तिनको सम्‍झनामा एउटा ठूलो आगो बाले।