Read Nepali New Revised Version, 2012 २ इतिहास 19 Bible Online

२ इतिहास 19 - Nepali New Revised Version, 2012 bible

२ इतिहास 19

¹यहूदाका राजा यहोशापात यरूशलेममा आफ्‍नो महलमा कुशलसाथ फर्केपछि,

²हनानीका छोरा दर्शी येहू तिनलाई भेट्‌न आए। येहूले यहोशापातलाई भने, “के दुष्‍टलाई सहायता र परमप्रभुका शत्रुहरूसँग मित्रता गरेर तपाईं खुशी हुनुहुन्‍छ? यसैकारण परमप्रभुको क्रोध तपाईंमाथि आइपर्नेछ। तपाईंले दु:ख पाउनुहुनेछ।

³तापनि तपाईंमा केही असल कुरो छ, किनभने तपाईंले अशेरा देवीका मूर्तिहरूलाई देशबाट हटाइदिनुभएको छ, र परमप्रभुलाई खोज्‍न तपाईंले मन लाउनुभएको छ।”

⁴यहोशापातको निवासस्‍थान यरूशलेममा थियो। तिनी फेरि बेर्शेबाका मानिसहरूकहाँ एफ्राइमको पहाड़ी देशमा गएर तिनीहरूलाई परमप्रभु तिनीहरूका पुर्खाहरूका परमेश्‍वरकहाँ फर्काएर ल्‍याए।

⁵तिनले देशभरि नै यहूदाको हरेक सुरक्षित सहरमा तिनले न्‍यायकर्ताहरू नियुक्त गरे।

⁶तिनले तिनीहरूलाई भने, “तिमीहरू जे गर्छौ, त्‍यसमा सतर्क होओ। किनभने मानिसहरूका निम्‍ति होइन तर तिमीहरूले न्‍यायको फैसला सुनाउँदा तिमीहरूसित हुनुहुने परमप्रभुको निम्‍ति तिमीहरू न्‍याय गर्दछौ।

⁷अब परमप्रभुको भय तिमीहरूमा रहोस्‌। तिमीहरू होशियारीसाथ न्‍याय गर, किनभने परमप्रभु हाम्रा परमेश्‍वर अन्‍याय, पक्षपात र घूस लिएको सहनुहुन्‍न।”

⁸यहोशापातले यरूशलेममा पनि कति लेवी, पूजाहारी र इस्राएलका परिवार-परिवारका मुखियाहरूलाई परमप्रभुको व्‍यवस्‍था कायम राख्‍न र मानिसहरूका बीचमा न्‍याय गर्न नियुक्त गरे।

⁹तिनले तिनीहरूलाई यी आदेश दिए: “तिमीहरूले सधैँ परमेश्‍वरको भय राखेर विश्‍वाससित तनमनले काम गर्नुपर्छ।

¹⁰सबै मुद्दा जो सहरमा बस्‍ने तिमीहरूका कुटुम्‍बहरूबाट तिमीहरूका सामु आउँछन्‌— मुद्दाहरू हत्‍यासम्‍बन्‍धी होऊन्, अथवा व्‍यवस्‍था वा आज्ञा धर्म-विधि अथवा नियमहरूका विरुद्धमा होऊन्‌— तिमीहरूले तिनीहरूलाई परमप्रभुको विरुद्धमा कुनै किसिमको अपराध नगर्नू भनी चेताउनी दिनू। नत्रता तिमीहरू र तिमीहरूका कुटुम्‍बमा पनि त्‍यसको निम्‍ति उहाँको क्रोध आइपर्नेछ। तिमीहरूले यसो गर्‍यौ भने तिमीहरू सबै दोषी ठहरिनेछैनौ।

¹¹“परमप्रभुसम्‍बन्‍धी विषयमा मुख्‍य पूजाहारी अमर्याह तिमीहरूमाथि अधिकारी छन्‌। राज्‍यसम्‍बन्‍धी विषयमा यहूदाका कुलनायक इश्‍माएलका छोरा जबदियाह अधिकारी छन्‌। लेवीहरूचाहिँ तिमीहरूका सामुन्‍ने अधिकृतहरूझैँ सेवा गर्नेछन्‌। बलिया र दृढ़ होऊ। परमप्रभु असल गर्नेहरूका साथ होऊन्‌।”