Read Nepali New Revised Version, 2012 २ इतिहास 2 Bible Online

२ इतिहास 2 - Nepali New Revised Version, 2012 bible

२ इतिहास 2

¹सोलोमनले परमप्रभुका नाउँको सम्‍झनाको निम्‍ति एउटा मन्‍दिर र आफ्‍नै निम्‍ति एउटा महल निर्माण गर्ने अठोट गरे।

²तिनले सत्तरी हजार भारी बोक्‍नेहरू, असी हजार ढुङ्गा काट्‌नेहरू र तिनीहरूमाथि हेर-विचार गर्ने छत्तीस सय नाइकेहरूलाई नियुक्त गरे।

³सोलोमनले टुरोसका राजा हीरामलाई यसो भनेर समाचार पठाए: “तपाईंले दया गरी मेरा पिता दाऊदलाई तिनको राजकीय निवासस्‍थान निर्माण गर्न देवदारुका काठहरू पठाइदिनुभएको थियो।

⁴अब मैले पनि परमप्रभु मेरा परमेश्‍वरका नाउँको निम्‍ति एउटा मन्‍दिर निर्माण गर्न र उहाँको सामुन्‍ने सुगन्‍धित धूप बाल्‍न, र अर्पण गरिएको रोटी नित्‍य लहर-लहर गरी राखेर चढ़ाउन, अनि बिहान, बेलुकी, शबाथ, औंसीको चाड़ र परमप्रभु हाम्रा परमेश्‍वरका तोकिएका चाड़हरूमा बलि चढ़ाउन त्‍यो मन्‍दिर उहाँको निम्‍ति समर्पण गर्न लागेको छु। इस्राएलको निम्‍ति यो एउटा अनन्‍तको विधि हो।

⁵“मैले निर्माण गर्न लागेको मन्‍दिर एउटा अत्‍यन्‍तै ठूलो भवन हुनेछ, किनभने हाम्रा परमेश्‍वर सबै देवताहरूभन्‍दा महान्‌ हुनुहुन्‍छ।

⁶तर स्‍वर्ग, अर्थात्‌ सर्वोच्‍च स्‍वर्ग नै उहाँको निम्‍ति सानो छ भने कसले उहाँको निम्‍ति मन्‍दिर निर्माण गर्न सक्‍छ? उहाँको सामु बलिदान चढ़ाउनुबाहेक उहाँको निम्‍ति मन्‍दिर निर्माण गर्ने म को हुँ र?

⁷“यसकारण मेरो निम्‍ति एक निपुण कारीगर पठाइदिनुहोस्‌— एउटा यस्‍तो मानिस जसले सुन, चाँदी, काँसो र फलाम, अनि बैजनी, रातो र नीलो धागोको काम गर्न सक्‍छ, र तिनी निपुण कुँद्‌ने मानिस पनि होऊन्‌। तिनले मेरा पिता दाऊदले जुटाइदिनुभएका निपुण कारीगरहरूसँग यहूदा र यरूशलेममा काम गर्नेछन्‌।

⁸“मलाई लेबनानबाट देवदारु, सल्‍ला र चन्‍दनका काठहरू पनि पठाइदिनुहोस्, किनभने मलाई थाहा छ कि तपाईंका मानिसहरू लेबनानमा काठहरू काट्‌न निपुण छन्‌।

⁹मेरा मानिसहरू तपाईंका मानिसहरूसँग धेरै काठ तयार गर्न काम गर्नेछन्, किनभने जुन मन्‍दिर म निर्माण गर्नेछु, त्‍यो भव्‍य आश्‍चर्यको हुनेछ।

¹⁰म तपाईंका कर्मीहरू, अर्थात्‌ रूख ढाल्‍नेहरूका निम्‍ति पचास हजार मुरी गहूँ, पचास हजार मुरी जौ, एक लाख पाथी दाखमद्य र एक लाख पाथी भद्राक्षको तेल जुटाइदिनेछु।”

¹¹टुरोसका राजा हीरामले पत्रद्वारा सोलोमनलाई यो समाचार पठाए: “परमप्रभुको प्रेम आफ्‍नो प्रजामाथि रहेको कारण उहाँले तपाईंलाई तिनीहरूमाथि राजा तुल्‍याउनुभयो।”

¹²पत्रमा हीरामले यस्‍तो पनि लेखे: “स्‍वर्ग र पृथ्‍वीका सृष्‍टिकर्ता परमप्रभु इस्राएलका परमेश्‍वरको प्रशंसा होस्‌। उहाँले दाऊद राजालाई तीव्र बुद्धि र समझशक्तिले पूर्ण भएका एउटा बुद्धिमान्‌ छोरा दिनुभएको छ, जसले परमप्रभुको निम्‍ति एउटा मन्‍दिर र आफ्‍नै निम्‍ति एउटा महल बनाउनुहुनेछ।

¹³“अब म तपाईंको निम्‍ति एक जना निपुण र खूबै अनुभवी कारीगर, हुराम-अब्‍बीलाई पठाउँदैछु।

¹⁴तिनी दानवंशी स्‍त्रीका छोरा हुन्‌। तिनका पिताचाहिँ एक टुरोसवासी हुन्‌। तिनी सुन र चाँदी, काँसो र फलाम, ढुङ्गा र काठका काम र बैजनी, रातो र नीलो धागो र मलमलका कपड़ाका काममा पनि अनुभवी कारीगर हुन्‌। तिनी बुट्टाका काममा तालीम पाएका मानिस हुन्, र तिनलाई दिएको कुनै पनि नमूनाको काम गर्न सक्‍छन्‌। तिनी तपाईंका निपुण कारीगरहरूका साथमा, र मेरा स्‍वामी तपाईंका पिता दाऊदका कारीगरहरूका साथमा काम गर्नेछन्‌।

¹⁵“यसकारण अब मेरा स्‍वामीले आफ्‍ना चाकरहरूका निम्‍ति आफूले प्रतिज्ञा गर्नुभएको गहूँ, जौ, तेल र दाखमद्य पठाइदिनुहोस्‌।

¹⁶तपाईंलाई चाहिएका सबै काठ हामी लेबनानमा ढाल्‍नेछौ, र मूढ़ाहरू बाँधेर योप्‍पासम्‍म बगाएर पठाइदिनेछौं। तपाईंले चाहिँ त्‍यहाँबाट यरूशलेमसम्‍म लाने बन्‍दोबस्‍त मिलाउनुहोला।”

¹⁷आफ्‍ना पिता दाऊदले मानिसहरूको जनगणना लिएझैँ सोलोमनले इस्राएलमा बस्‍ने विदेशीहरूको जनगणना लिए। यिनीहरू १,५३,६०० जना थिए।

¹⁸तिनले यिनीहरूमध्‍येका सत्तरी हजारलाई भारी बोक्‍ने र असी हजारलाई ढुङ्गा काट्‌ने र यिनीहरूलाई काममा लगाउन छत्तीस सयलाई चाहिँ हेर-विचार गर्ने काममा नियुक्त गरे।