Read Nepali New Revised Version, 2012 २ इतिहास 21 Bible Online

२ इतिहास 21 - Nepali New Revised Version, 2012 bible

२ इतिहास 21

¹त्‍यसपछि यहोशापात आफ्‍ना पित्रहरूसित सुते, र तिनीहरूसँग दाऊदको सहरमा गाड़िए।

²अनि तिनका छोरा यहोराम तिनीपछि राजा भए। यहोरामका [1] भाइहरू अजर्याह, यहीएल, जकरिया, अजर्याह, मिखाएल र शपत्‍याह थिए। यी सबै इस्राएलका राजा यहोशापातका छोराहरू थिए।

³तिनका पिताले तिनीहरूलाई सुन, चाँदी र बहुमूल्‍य थोकहरू अनि यहूदामा सुरक्षित सहरहरू पनि दान दिए। तर राज्‍यचाहिँ तिनले यहोरामलाई नै दिए, किनभने तिनीचाहिँ जेठा थिए।

⁴जब यहोराम आफ्‍ना पिताको सिंहासनमा सुदृढ़ भए, तब तिनले आफ्‍ना सबै भाइहरू र इस्राएलका कति जना राजकुमारहरूलाई पनि तरवारले काटेर मारे।

⁵तिनी राजगद्दी आरोहण गर्दा बत्तीस वर्षका थिए। तिनले यरूशलेममा आठ वर्ष राज्‍य गरे।

⁶आहाबको घरानाझैँ तिनी इस्राएलका राजाहरूका चालमा हिँड़े, किनभने तिनले आहाबकी छोरीलाई विवाह गरेका थिए। परमप्रभुको दृष्‍टिमा जे कुरो खराब थियो त्‍यही तिनले गरे।

⁷तर दाऊदसित परमप्रभुले गर्नुभएको करारको खातिर उहाँले दाऊदको घरानालाई नाश गर्ने इच्‍छा गर्नुभएन, किनभने दाऊद र तिनका छोराहरूलाई सधैँ प्रकाश दिइरहने एउटा बत्ती दिन्‍छु भनी उहाँले प्रतिज्ञा गर्नुभएको थियो।

⁸यहोरामको समयमा एदोम यहूदाको विरुद्धमा बागी भएर आफ्‍नै राजा खड़ा गरे।

⁹यसैले यहोराम आफ्‍ना अधिकृतहरू र सबै रथहरूका साथमा एदोमतिर बढ़े। एदोमीहरूले तिनी र तिनका रथका सेनापतिहरूलाई घेरे, तर तिनी उठेर राती नै भागे।

¹⁰एदोम आजको दिनसम्‍मै यहूदाको विरुद्धमा बागी भएको छ। त्‍यसै बेला लिब्‍नाले पनि विद्रोह गरे, किनभने यहोरामले परमप्रभु आफ्‍ना पुर्खाहरूका परमेश्‍वरलाई त्‍यागेका थिए।

¹¹तिनले यहूदाका पहाड़ी देशमा अल्‍गा-अल्‍गा थानहरू बनाए, र तिनले यरूशलेमका बासिन्‍दाहरूलाई मूर्तिपूजा (वेश्‍यावृत्ति) गर्न लगाई वेश्‍यासमानमा पारे र यहूदालाई कुपथतिर ढल्‍काए।

¹²यहोरामले एलिया अगमवक्ताबाट एउटा पत्र पाए। त्‍यसमा त्‍यो कुरो लेखिएको थियो: “तपाईंका पुर्खा दाऊदका परमप्रभु यसो भन्‍नुहुन्‍छ: ‘तेरा पिता यहोशापात र यहूदाका राजा आसाका चालमा तँ हिँड़िनस्‌।

¹³तर आहाबको घरानाले गरेझैँ इस्राएलका राजाहरूका चालमा हिँड़ेर तैंले यहूदा र यरूशलेमका बासिन्‍दाहरूलाई मूर्तिपूजा (वेश्‍यावृत्ति) गर्न लगाई वेश्‍यासमानमा पारिस्‌। अनि तेरा पिताका परिवारका छोराहरू, अर्थात्‌ आफ्‍नै भाइहरूलाई तैंले मारिस्‌। तिनीहरू तँभन्‍दा असल मानिसहरू थिए।

¹⁴ती सबै गरेकोले गर्दा परमप्रभुले तेरा प्रजा, तेरा छोराहरू, तेरा पत्‍नीहरू र तेरा सबै धन-सम्‍पत्तिमाथि प्रहार गर्न लाग्‍नुभएको छ।

¹⁵तँ आफैचाहिँ निको नहुने आन्‍द्रा-भुँड़ीको रोगले ग्रस्‍त हुनेछस्, र त्‍यस रोगले गर्दा तेरा आन्‍द्रा-भुँड़ी बाहिर निस्‍केर आउनेछन्‌’।”

¹⁶परमप्रभुले यहोरामको विरुद्धमा कूशीहरूनेर बस्‍ने पलिश्‍ती र अरबीहरूलाई उक्‍साउनुभयो। उनीहरूले यहूदालाई आक्रमण गरेर त्‍यसको भित्रसम्‍मै छिरिगए।

¹⁷सबै धन-सम्‍पत्ति जो उनीहरूले राजाको महलमा फेला पारे, तिनका छोराहरू र पत्‍नीहरूलाई समेत लगे। कान्‍छा छोरा अहज्‍याहबाहेक तिनका कुनै छोरा पनि बाँकी रहेन।

¹⁸यी सबै भएपछि परमप्रभुले यहोरामलाई निको नहुने आन्‍द्रा-भुँड़ीको रोगले ग्रस्‍त पार्नुभयो।

¹⁹त्‍यस रोगले तिनलाई केही समयसम्‍म सताइरह्यो। अनि दोस्रो वर्षको अन्‍तमा त्‍यही रोगले तिनका आन्‍द्रा-भुँड़ी निस्‍केर आए, र साह्रै दु:ख सहेर तिनी मरे। तिनका प्रजाले तिनका पुर्खाहरूका निम्‍ति गरेझैँ तिनको सम्‍मानमा आगो जलाएनन्‌।

²⁰तिनी राजगद्दी आरोहण गर्दा बत्तीस वर्षका थिए। तिनले यरूशलेममा आठ वर्ष राज्‍य गरे। तिनको मृत्‍युमा कसैले शोक प्रकट गरेन। र तिनी दाऊदको सहरमा गाड़िए, तर राजाहरूका चिहानमा होइन।