Read Nepali New Revised Version, 2012 २ इतिहास 3 Bible Online

२ इतिहास 3 - Nepali New Revised Version, 2012 bible

२ इतिहास 3

¹तब सोलोमनले तिनका पिता दाऊदले परमप्रभुको दर्शन पाएर यबूसी अरौनाको खलामा एउटा स्‍थान तयार पारेका यरूशलेमको मोरीयाह डाँड़ामा परमप्रभुको मन्‍दिर निर्माण गर्न सुरु गरे।

²तिनले आफ्‍नो राजकालको चौथो वर्षको दोस्रो महिनाको दोस्रो दिनमा त्‍यो निर्माण गर्न सुरु गरे।

³परमेश्‍वरको मन्‍दिर निर्माण गर्न सोलोमनले राखेका जग यस्‍तो थियो: हातको पुरानो नापअनुसार लमाइ साठी हात र चौड़ाइ बीस हात थियो।

⁴मन्‍दिरको अगाड़ि त्‍यसको चौड़ाइ जत्तिकै बीस हात लामो र बीस हात अल्‍गो एउटा दलान थियो। भित्रपट्टि चाहिँ तिनले त्‍यसलाई निखुर सुनले मोहोरे।

⁵तिनले मुख्‍य सभाकक्षका भित्तामा सल्‍लाका फलेकहरू लगाए, र तिनलाई निखुर सुनले मोहोरे, अनि तिनमा खजूरका बोटहरू र सिक्रीहरूका बुट्टा बनाए।

⁶त्‍यसको शोभाको लागि तिनले त्‍यस मन्‍दिरलाई बहुमूल्‍य पत्‍थरहरूले जड़े। त्‍यसमा तिनले पर्वेमबाट ल्‍याएका सुन प्रयोग गरे।

⁷तिनले त्‍यसका सत्तरी, चौखुट, भित्ता र ढोकाहरू सुनले मोहोरे, अनि तिनले भित्ताहरूमा करूबहरू कुँदेर बनाए।

⁸तिनले मन्‍दिरको चौड़ाइबमोजिम नै महा-पवित्रस्‍थान बीस हात लमाइ र बीस हात चौड़ाइको बनाए। तिनले भित्रपट्टि त्‍यसलाई बीस टन निखुर सुनले मोहोरे।

⁹सुनका कीलाहरूको ओजन आधा किलोग्राम थियो। तिनले माथिल्‍ला भागहरू पनि सुनले मोहोरे।

¹⁰तिनले महा-पवित्रस्‍थानमा दुई करूबका प्रतिरूप कुँदेर सुनले मोहोरे।

¹¹यी करूबका पखेटाहरू एक छेउदेखि अर्को छेउसम्‍म बीस हातसम्‍म फिँजिएका थिए। एउटा करूबको एउटा पखेटा पाँच हातको थियो, र मन्‍दिरको भित्तामा छोयो। त्‍यसको अर्को पखेटाचाहिँ अर्को करूबको पखेटा छुने गरी पाँच हातकै थियो।

¹²त्‍यस्‍तै गरी दोस्रो करूबको एउटा पखेटा मन्‍दिरको भित्ता छुने गरी पाँच हातको थियो, अनि त्‍यसको अर्को पखेटाचाहिँ अर्को करूबको पखेटा छुने गरी पाँच हातकै थियो,

¹³करूबका पखेटा बीस हातसम्‍म फिँजिएका थिए। तिनीहरू आफ्‍ना खुट्टामा उभिएका थिए, र तिनीहरूका मुख मन्‍दिरको मुख्‍य खण्‍डतिर फर्केका थिए।

¹⁴तिनले नीलो, बैजनी र रातो रङ्गको धागो र मलमलको कपड़ाको पर्दा बनाए, र त्‍यसमा बुट्टा भरेका करूबहरू बनाए।

¹⁵मन्‍दिरको अगाड़िपट्टि तिनले अठार-अठार हात अल्‍गा दुई वटा स्‍तम्‍भ बनाए। प्रत्‍येकको टुप्‍पामा पाँच हात अल्‍गो स्‍तम्‍भ-शिर थियो।

¹⁶तिनले जाली स्‍वरूप झुण्‍डिएका सिक्रीहरू बनाएर स्‍तम्‍भका टुप्‍पा-टुप्‍पामा राखे। तिनले सय वटा दारिम बनाएर ती सिक्रीहरूमा लगाए।

¹⁷तिनले मन्‍दिरको अगाड़ि ती दुई वटा स्‍तम्‍भ खड़ा गरे— एउटा दक्षिणपट्टि र अर्को उत्तरपट्टि। दक्षिणपट्टिको स्‍तम्‍भको नाउँ तिनले याकीन र उत्तरपट्टिको स्‍तम्‍भको नाउँ बोअज राखे।