Read Nepali New Revised Version, 2012 २ इतिहास 31 Bible Online

२ इतिहास 31 - Nepali New Revised Version, 2012 bible

२ इतिहास 31

¹जब यो उत्‍सव भइसकियो तब उपस्‍थित भएका सबै इस्राएलीहरू यहूदाका सहरहरू हुँदो गएर ती सबै खतम नहोउञ्‍जेल तिनीहरूले चोखा ढुङ्गाहरू टुक्रा-टुक्रा पारिदिए र अशेरा देवीका मूर्तिहरू ढालिदिए। सारा यहूदा र बेन्‍यामीन, र एफ्राइम र मनश्‍शेका अल्‍गा-अल्‍गा थानहरू र वेदीहरू भत्‍काइदिए। त्‍यति गरिसकेपछि इस्राएलीहरू हरेक आ-आफ्‍नो सहर र पैतृक भूमिमा फर्के।

²त्‍यसपछि हिजकियाले पूजाहारीहरू र लेवीहरूलाई दल-दल गरी होमबलि र मेलबलि चढ़ाउन, सेवा गर्न, धन्‍यवाद दिन र परमप्रभुको मन्‍दिरका ढोकाहरूमा प्रशंसा गर्न आ-आफ्‍ना विशेष कामहरू हरेकलाई खटाइदिए।

³राजाले आफ्‍नै भण्‍डारबाट बिहान र बेलुकाका होमबलिका निम्‍ति, अनि शबाथ, औंसी र तोकिएका चाड़हरूका निम्‍ति परमप्रभुको व्‍यवस्‍थामा लेखिएबमोजिम जुटाइदिए।

⁴पूजाहारीहरू र लेवीहरू परमप्रभुको व्‍यवस्‍थामा नै लागिरहून्‌ भनेर राजाले यरूशलेममा बस्‍ने मानिसहरूलाई तिनीहरूले दिनुपर्ने भाग जुटाइदेऊन् भनी हुकुम गरे।

⁵राजाको हुकुम इस्राएलीहरूलाई दिने बित्तिकै तिनीहरूले आफ्‍ना अन्‍न, नयाँ दाखमद्य, तेल, मह र जमिनका सबै उब्‍जनीका अगौटे फल दिए। तिनीहरूले प्रशस्‍त मात्रामा— थोकको पूरा दशांश ल्‍याए।

⁶यहूदाका सहरमा बस्‍ने इस्राएलीहरू र यहूदीहरूले पनि गाईबस्‍तुको दशांश, अनि परमप्रभु तिनीहरूका परमेश्‍वरमा अर्पण गरिएका सबै थोकको दशांश ल्‍याएर थुपारे।

⁷तिनीहरूले तेस्रो महिनामा थुपार्न सुरु गरे, र सातौँ महिनामा सिद्ध्याए।

⁸हिजकिया र तिनका अधिकारीहरू आएर ती थुपारिएका कुरा देख्‍दा, तिनीहरूले परमप्रभु र उहाँको प्रजा इस्राएललाई धन्‍यवाद दिए।

⁹यी थुपारिएका कुराहरूको विषयमा हिजकियाले पूजाहारीहरू र लेवीहरूसित सोधपूछ गरे।

¹⁰सादोकको वंशका प्रधान पूजाहारी अजर्याहले जवाफ दिए, “मानिसहरूले परमप्रभुको मन्‍दिरमा आ-आफ्‍नो भेटी ल्‍याएको समयदेखि यसो हामीहरूलाई खानका निम्‍ति प्रशस्‍त भयो अनि उब्रेका पनि छन्, किनभने परमप्रभुले उहाँको प्रजालाई यति धेरै आशिष्‌ दिनुभएको छ, कि यी धेरै कुरा उब्रेका पनि छन्‌।”

¹¹तब हिजकियाले परमप्रभुको मन्‍दिरमा भण्‍डारहरू तयार गर्न हुकुम गरे, र ती तयार गरिए।

¹²अनि मानिसहरूले ईमानदारीसाथ आ-आफ्‍ना भेटीहरू, दशांश र तिनीहरूले अर्पण गरेका दानहरू ल्‍याए। तिनको जिम्‍मा लिने अधिकृत लेवी कोनन्‍याह थिए, अनि तिनका भाइ शिमीचाहिँ उपअधिकृत थिए।

¹³राजा हिजकिया र परमेश्‍वरको मन्‍दिरका अधिकारी अजर्याहले कोनन्‍याह र तिनका भाइ शिमीलाई सहायता गर्न यहीएल, अजज्‍याह, नहत, असाहेल, यरीमोत, योजाबाद, एलीएल, यिस्‍मक्‍याह, महत र बनायाहलाई नियुक्त गरेका थिए।

¹⁴परमप्रभुलाई दिएका थोकहरू र अर्पण गरिएका दानहरू बाँड्‌न परमेश्‍वरको निम्‍ति ल्‍याएका राजीखुशीका भेटीहरू लेवी यिम्‍नाका छोरा पूर्व ढोकाका द्वारपाल कोरेको जिम्‍मामा थिए।

¹⁵दल-दलअनुसार ठूला-साना सङ्गी-पूजाहारीहरूलाई ठीक-ठीक हिस्‍सा बाँड्‌न पूजाहारीहरूका सहरहरूमा अदन, मिन्‍यामीन, येशूअ, शमायाह, अमर्याह र शकन्‍याहले कोरेलाई ईमानदारीसाथ सहायता गरे।

¹⁶वंशावलीमा नाउँ लेखिएका परमप्रभुको मन्‍दिरमा नित्‍य खटिएका काम गर्ने तीन वर्ष र त्‍यसभन्‍दा बढ़ी उमेरका पुरुषहरू सबैलाई आ-आफ्‍ना दल र जिम्‍माअनुसार तिनीहरूले भाग बाँड़िदिए।

¹⁷त्‍यसबाहेक वंशावलीमा आफ्‍ना परिवार-परिवारअनुसार नाउँ लेखिएका पूजाहारीहरू अनि बीस वर्ष र त्‍यसभन्‍दा बढ़ी उमेरका लेवीहरू सबैलाई आ-आफ्‍ना दल र जिम्‍माअनुसार तिनीहरूले भाग बाँड़िदिए।

¹⁸यी वंशावलीका पुस्‍तकहरूमा नाउँ लेखिएका सारा समुदाय, तिनीहरूका पत्‍नी र छोराछोरीहरूसमेत, सबैलाई भाग बाँड़िएको थियो। किनभने तिनीहरूले आफू-आफूलाई विधिपूर्वक शुद्ध गर्दथे।

¹⁹अनि सहरहरूका छेउछाउका बस्‍तीहरूमा र अरू कुनै गाउँमा बस्‍ने हारूनका वंशका पूजाहारीहरूमध्‍ये हरेक पुरुषलाई अनि लेवीहरूका वंशावलीमा नाउँ लेखिएका पूजाहारीहरू सबैलाई पनि आ-आफ्‍नो भाग दिन विशेष मानिसहरू खटाइए।

²⁰हिजकियाले यहूदाभरि नै यसरी काम गरे। परमप्रभु आफ्‍ना परमेश्‍वरका दृष्‍टिमा जे असल, ठीक र विश्‍वासयोग्‍य थिए, ती नै तिनले गरे।

²¹परमप्रभुका मन्‍दिरको सेवामा र आफ्‍ना परमेश्‍वरको अगुवाइ खोज्‍न उहाँका व्‍यवस्‍था र आज्ञाहरू मानेर गरेका सबै काममा तिनले आफ्‍ना परमेश्‍वरलाई खोजे र आफ्‍ना तनमनले काम गरे। अनि तिनी सफल पनि भए।