Read Nepali New Revised Version, 2012 २ इतिहास 35 Bible Online

२ इतिहास 35 - Nepali New Revised Version, 2012 bible

२ इतिहास 35

¹योशियाहले परमप्रभुको निम्‍ति यरूशलेममा निस्‍तार-चाड़ मनाए। पहिलो महिनाको चौधौँ दिनमा निस्‍तार-चाड़को थुमा मारियो।

²तिनले पूजाहारीहरूलाई आ-आफ्‍नो काममा नियुक्त गरिदिए, अनि परमप्रभुका मन्‍दिरको सेवा गर्न तिनीहरूलाई प्रोत्‍साहन दिए।

³तिनले परमप्रभुमा समर्पित भएका सारा इस्राएललाई सिकाउने लेवीहरूलाई भने, “इस्राएलका राजा दाऊदका छोरा सोलोमनले निर्माण गरेको मन्‍दिरमा पवित्र सन्‍दूक राख। त्‍यो तिमीहरूले बोकिहिँड्‌नुहुँदैन।

⁴अब त परमप्रभु तिमीहरूका परमेश्‍वर र उहाँको प्रजा इस्राएलको सेवा गर। इस्राएलका राजा दाऊद र तिनका छोरा सोलोमनले दिएका लिखित निर्देशनहरू पालन गर्दै तिमीहरूका दल-दलअनुसार परिवार-परिवार गरी तयार होओ।

⁵“लेवीहरूको एक भाग तिमीहरूका दाजुभाइहरू, अर्थात्‌ साधारण मानिसका परिवारहरूका दल-दलका प्रतिनिधि भई पवित्र स्‍थानमा खड़ा होओ।

⁶निस्‍तार-चाड़को थुमा मार। तिमीहरू आफू-आफूलाई शुद्ध गर, र मोशाद्वारा परमप्रभुले दिनुभएको वचन पालन गरेर तिमीहरूका दाजुभाइहरूका निम्‍ति थुमाहरू तयार पार।

⁷योशियाहले निस्‍तार-चाड़को निम्‍ति त्‍यहाँ उपस्‍थित भएका सर्वसाधारणका लागि तीन हजार साँढ़े र तीस हजार भेड़ाबाख्रा दान दिए। यी सबै राजाले आफ्‍नै आमदानीबाट दिए।

⁸तिनका अधिकारीहरूले पनि मानिसहरू, पूजाहारीहरू र लेवीहरूका निम्‍ति राजीखुशी दान दिए। परमप्रभुको मन्‍दिरका प्रशासन गर्ने, हिल्‍कियाह, जकरिया र यहीएलले पूजाहारीहरूलाई निस्‍तार-चाड़को निम्‍ति दुई हजार छ सय ससाना पशुहरू र तीन सय साँढ़े दिए।

⁹अनि लेवीहरूलाई चाहिँ कोनन्‍याह र तिनका भाइहरू शमायाह र नतनेल, अनि लेवीहरूका नायकहरू हशब्‍याह, यहीएल र योजाबादले पाँच हजार ससाना पशुहरू र पाँच सय साँढ़ेहरू दिए।

¹⁰सेवाको बन्‍दोबस्‍त भइसकिएपछि पूजाहारीहरू आ-आफ्‍नो स्‍थानमा अनि लेवीहरूचाहिँ आ-आफ्‍नो दलअनुसार राजाको हुकुमबमोजिम खड़ा भए।

¹¹तब तिनीहरूले निस्‍तार-चाड़का थुमाहरू मारे, अनि पूजाहारीहरूले वेदीमा रगत छर्के, र लेवीहरूले चाहिँ ती पशुहरूका छाला काढ़े।

¹²तिनीहरूले मोशाको पुस्‍तकमा लेखिएबमोजिम मानिसका परिवारहरूका दल-दललाई परमप्रभुमा चढ़ाउन होमबलिहरूचाहिँ अलग गरेर दिए, अनि साँढ़ेहरूलाई पनि त्‍यसै गरे।

¹³तिनीहरूले विधिअनुसार निस्‍तारका पशुको मासु आगोमा पोले, र पवित्र भेटीचाहिँ खड्‌कुँला, तसला र कराहीमा उसिने, अनि ती सबै मानिसहरूलाई चाँड़ो-चाँड़ो गरी बाँड़े।

¹⁴त्‍यसपछि हारूनका वंशका पूजाहारीहरू साँझसम्‍मै होमबलि र बोसो चढ़ाउनमा व्‍यस्‍त हुनाले तिनीहरूले आफ्‍ना निम्‍ति र पूजाहारीहरूका निम्‍ति यथोचित तयारी गरे। यसरी लेवीहरूले आफ्‍ना लागि र हारूनको वंशका पूजाहारीहरूका निम्‍ति यथोचित तयारी गरे।

¹⁵आसापका सन्‍तानहरू, अर्थात्‌ गवैयाहरूचाहिँ दाऊद, आसाप, हेमान र राजाका दर्शी यदूतूनले तोकेको नियमबमोजिम आ-आफ्‍नो स्‍थान लिए। आफ्‍ना कुटुम्‍ब लेवीहरूले तिनीहरूका निम्‍ति तयारी गरेका हुनाले हरेक मूल ढोकाका द्वारपालहरूले आ-आफ्‍नो काम छोड्‌नुपरेन।

¹⁶यस किसिमले योशियाह राजाको हुकुमअनुसार निस्‍तार-चाड़ मान्‍न र परमप्रभुको वेदीमा होमबलि चढ़ाउनका निम्‍ति परमप्रभुको पूरा सेवा त्‍यस बेला गरियो।

¹⁷उपस्‍थित भएका इस्राएलीहरूले त्‍यस बेला निस्‍तार-चाड़ मनाए, र सात दिनसम्‍म अखमिरी रोटीको चाड़ मनाए।

¹⁸शमूएल अगमवक्ताको समयदेखि यसो यस प्रकारले निस्‍तार-चाड़ इस्राएलमा कहिल्‍यै मनाइएको थिएन। पूजाहारीहरू, लेवीहरू र यरूशलेमका बासिन्‍दाहरूसँग उपस्‍थित भएका सबै यहूदा र इस्राएलका साथमा योशियाहले मानेझैँ इस्राएलका अरू कुनै राजाहरूले कहिल्‍यै यस्‍तो किसिमले निस्‍तार-चाड़ मानेका थिएनन्‌।

¹⁹योशियाहका राजकालको अठारौँ वर्षमा यो निस्‍तार-चाड़ मनाइएको थियो।

²⁰योशियाहले यसरी मन्‍दिरका सबै कामहरू मिलाइसकेपछि मिश्रदेशका राजा नेको यूफ्रेटिस नदीको किनारको कर्कमीश सहरमाथि आक्रमण गर्न निस्‍के, र योशियाह उनको सामना गर्न गए।

²¹तर नेकोले यसो भनेर तिनीकहाँ राजदूतहरू पठाए, “हे यहूदाका राजा, तपाईं र मेरो बीचमा के झगड़ा छ? आज मेरो तपाईंसित केही झगड़ा छैन, तर तिनीहरूसित मात्र छ जोसँग म युद्ध गरिरहेछु। मलाई चाँड़ो जानू भनी परमेश्‍वरको आज्ञा छ। यसकारण परमेश्‍वरको विरुद्धमा खड़ा नहुनुहोस्, जो मतर्फ हुनुहुन्‍छ, नत्रता उहाँले तपाईंलाई नाश गर्नुहुनेछ।”

²²तापनि योशियाह आफ्‍नो अभिप्रायबाट हट्‌न मानेनन्, तर नेकोसँग लड़ाइँ गर्न तिनले भेष धारण गरे। परमेश्‍वरको आज्ञाद्वारा नेकोको वचन सुन्‍न तिनले इन्‍कार गरे, र मगिद्दोको बेँसीमा लड़ाइँ गर्न तिनी झट्टै गए।

²³तब धनुर्धारीहरूले योशियाह राजालाई हाने, अनि तिनले आफ्‍ना अङ्गरक्षकहरूलाई भने, “मलाई रणभूमिबाट बाहिर लग, किनकि मलाई साह्रै चोट लाग्‍यो।”

²⁴यसैले तिनीहरूले तिनलाई आफ्‍नो रथबाट उठाएर तिनको दोस्रो रथमा चढ़ाएर यरूशलेममा ल्‍याए। अनि तिनी त्‍यहीँ नै मरे, र तिनका पित्रहरूका चिहानहरूमा तिनी गाड़िए। अनि सारा यहूदा र यरूशलेमले तिनको निम्‍ति शोक मनाए।

²⁵यर्मियाले पनि योशियाहको निम्‍ति विलापका गीतहरू रचे। गवैयाहरू, पुरुष र स्‍त्री दुवैले आजको दिनसम्‍म यी विलापका गीतहरूमा योशियाहको स्‍मरण गर्दछन्‌। यी विलापका गीतहरू इस्राएलमा एउटा परम्‍परा भएका छन्, अनि विलापको पुस्‍तकमा यी पाइन्‍छन्‌।

²⁶योशियाहको राजकालका अरू घटनाहरू, अनि परमप्रभुको व्‍यवस्‍थामा लेखिएअनुसार

²⁷तिनले गरेका भक्तिका कामहरू सुरुदेखि अन्‍त्‍यसम्‍मै इस्राएल र यहूदाका राजाहरूका इतिहासको पुस्‍तकमा लेखिएका छन्‌।