Read Nepali New Revised Version, 2012 २ इतिहास 4 Bible Online

२ इतिहास 4 - Nepali New Revised Version, 2012 bible

२ इतिहास 4

¹तिनले बीस हात लामो, बीस हात चौड़ा र दश हात अल्‍गो काँसाको एउटा वेदी बनाए।

²तिनले ढालेर बनाइएको धातुको एउटा गोलाकार विशाल खड्‌कुँलो पनि बनाए। त्‍यसको बिट एक किनारदेखि अर्को किनारसम्‍म दश हात थियो, र त्‍यो पाँच हात अल्‍गो थियो। त्‍यसको वरिपरि फेरो नाप्‍नलाई तीस हातको नाप्‍ने फित्ता चाहिन्‍थ्‍यो।

³खड्‌कुँलोको चारैतिर बाहिरपट्टि बिटमुनि साँढ़ेहरू, एक हातमा दश वटा, दुई लहरमा थिए। खड्‌कुँलो र साँढ़ेहरू एउटै टुक्रा धातुबाट बनाइएका थिए।

⁴त्‍यो खड्‌कुँलो बाह्र वटा साँढ़ेहरूमाथि बसालिएको थियो— तीन वटा उत्तरतिर फर्केका, तीन वटा पश्‍चिमतिर फर्केका, तीन वटा दक्षिणतिर फर्केका र तीन वटा पूर्वतिर फर्केका थिए। तिनीहरूका पछाड़िका भागचाहिँ भित्रपट्टि फर्केका थिए। त्‍यो खड्‌कुँलोचाहिँ तिनैमाथि बसालिएको थियो।

⁵त्‍यसको मोटाई चार अङ्‌गुल थियो। त्‍यसको बिट कचौराको बिटजस्‍तो फक्रेको लिली फूलजस्‍तै थियो। त्‍यसमा प्राय: छयसट्ठी हजार लिटर पानी अटाउँथ्‍यो।

⁶तिनले दश वटा स्‍नान-भाँड़ाहरू पनि बनाए। ती तिनले पाँच वटा दक्षिणपट्टि र पाँच वटा उत्तरपट्टि राखे। यिनैमा तिनीहरूले होमबलिका सबै चीजहरू धुन्‍थे। खड्‌कुँलोचाहिँ पूजाहारीहरूले नुहाउनलाई प्रयोग गर्थे।

⁷तिनले तोकिएबमोजिम दश वटा सुनका सामदान बनाए। ती तिनले मन्‍दिरमा राखे— पाँच वटा दक्षिणपट्टि र पाँच वटा उत्तरपट्टि।

⁸तिनले दश वटा टेबिलहरू पनि बनाएर मन्‍दिरमा राखे— पाँच वटा दक्षिणपट्टि र पाँच वटा उत्तरपट्टि। तिनले एक सय वटा सुनका छर्कने बाटाहरू बनाए।

⁹तिनले पूजाहारीहरूको चोक, र ठूलो चोक र त्‍यसका ढोकाहरू बनाए, अनि ढोकाहरू काँसाले मोहोरे।

¹⁰त्‍यो विशाल खड्‌कुँलोचाहिँ तिनले दक्षिणपट्टि, अर्थात्‌ मन्‍दिरको दक्षिण-पूर्व कुनामा राखे।

¹¹तिनले भाँड़ा, बेल्‍चा र छर्कने बाटाहरू पनि बनाए। यसरी हुरामले परमेश्‍वरको मन्‍दिरमा सोलोमन राजाको निम्‍ति आफूले जिम्‍मा लिएको काम सिद्ध्याए:

¹²दुई स्‍तम्‍भहरू, स्‍तम्‍भका टुप्‍पामा कचौराको आकारका दुई स्‍तम्‍भ-शिरा, स्‍तम्‍भमाथि स्‍तम्‍भ-शिराहरू सजाउने दुई बुट्टादार र जालीहरू,

¹³दुई जालीहरूका निम्‍ति चार सय दारिमहरू (दुई स्‍तम्‍भहरूका कचौराको आकार भएका स्‍तम्‍भ-शिरालाई ढाक्‍ने प्रत्‍येक जालीको निम्‍ति दुई लहर दारिमहरू),

¹⁴ठेला-गाड़ीहरू, तिनका बाटाहरूसमेत,

¹⁵एउटा विशाल खड्‌कुँलो र त्‍यसको मुन्‍तिर बाह्र वटा साँढ़ेहरू,

¹⁶भाँड़ाहरू, बेल्‍चाहरू, मासु उठाउने काँटाहरू र अरू सम्‍बन्‍धित सामानहरू। हुराम-अब्‍बीले परमेश्‍वरका मन्‍दिरको निम्‍ति सोलोमनका लागि बनाएका यी सबै थोक टल्‍काइएका काँसाका थिए।

¹⁷राजाले ती यर्दन नदीको मैदानमा सुक्‍कोत र सार्तानको बीचमा साँचाहरूमा ढालेर बनाउन लगाएका थिए।

¹⁸यी सबै थोक सोलोमनले यति धेरै संख्‍यामा बनाएका थिए, कि त्‍यसमा लागेको काँसाका ओजनको हिसाबै थिएन।

¹⁹सोलोमनले परमेश्‍वरको मन्‍दिरका सबै सजाउने सामग्रीहरू पनि बनाए: सुनको वेदी, उपस्‍थितिको रोटी राखिने टेबिलहरू,

²⁰कञ्‍चन सुनका सामदानहरू, जसका बत्तीहरू विधिपूर्वक भित्री पवित्रस्‍थानमा बालिन्‍थे,

²¹फूलको आकारका सुनका बुट्टाहरू, बत्तीहरू र असल सुनका चिम्‍टाहरू,

²²कञ्‍चन सुनका सलेदाका चिम्‍टाहरू, बाटाहरू, कचौराहरू र धुपौराहरू, अनि मन्‍दिरका सुनका ढोकाहरू र महा-पवित्रस्‍थानमा पस्‍ने भित्रका ढोकाहरू र मुख्‍य खण्‍डका ढोकाहरू।