Read Nepali New Revised Version, 2012 २ इतिहास 5 Bible Online

२ इतिहास 5 - Nepali New Revised Version, 2012 bible

२ इतिहास 5

¹सोलोमनले परमप्रभुका मन्‍दिरको निम्‍ति गरेका सबै कामहरू सिद्ध्याएपछि आफ्‍ना पिता दाऊदले पवित्र कामको लागि अलग राखेका चीजहरू, अर्थात्‌ सुन, चाँदी, र सबै सरसामानहरू ल्‍याए र ती परमप्रभुको मन्‍दिरका भण्‍डारहरूमा राखे।

²त्‍यसपछि सोलोमनले इस्राएलका धर्म-गुरुहरू र कुल-कुलका सबै नायकहरू र इस्राएलका परिवारका मुख्‍य-मुख्‍य व्‍यक्तिहरूलाई परमप्रभुका करारको सन्‍दूक दाऊदको सहर, अर्थात्‌ सियोनबाट ल्‍याउन यरूशलेममा भेला हुन भनी बोलाए।

³अनि इस्राएलका सबै मानिसहरू सातौँ महिनामा भएको चाड़को समयमा राजाको सामुन्‍ने भेला भए।

⁴इस्राएलका सबै धर्म-गुरुहरू आइसकेपछि,

⁵लेवीहरूले सन्‍दूक उठाए, अनि सन्‍दूक र भेट हुने पाल र त्‍यसमा भएका सबै पवित्र सामानहरू उठाएरमाथि लगे। पूजाहारीले, जो लेवीहरू थिए, ती बोकेर माथि लगे।

⁶सोलोमन राजा र इस्राएलका सारा समुदाय, जो तिनको अगाड़ि भेला भएका थिए, तिनीहरू अनगन्‍ती भेड़ा र साँढ़ेहरू बलिदान चढ़ाउँदै सन्‍दूकको सामुन्‍ने थिए।

⁷त्‍यसपछि पूजाहारीहरूले परमप्रभुका करारको सन्‍दूक मन्‍दिरको भित्री पवित्रस्‍थान, अर्थात्‌ महा-पवित्रस्‍थानमा त्‍यसकै ठाउँमा ल्‍याएर करूबहरूका पखेटामुनि राखे।

⁸करूबहरूका पखेटा सन्‍दूक राखिएको ठाउँमाथि फैलिएका थिए, अनि तिनले सन्‍दूक र त्‍यसका डन्‍डाहरू ढाकेका थिए।

⁹डन्‍डाहरूचाहिँ यति लामा गरी निस्‍केका थिए, कि तिनका टुप्‍पाहरू भित्री पवित्रस्‍थानबाट देखिन सकिन्‍थे, तर पवित्रस्‍थानको बाहिरबाट देखिन सकिँदैनथे। ती आजको दिनसम्‍म त्‍यहीँ नै छन्‌।

¹⁰त्‍यस सन्‍दूकभित्र अरू केही थिएन, केवल दुई वटा पाटीहरू, जुन मोशाले होरेब पर्वतमा सन्‍दूकमा राखेका थिए, जहाँ इस्राएलीहरूले मिश्रदेश छोड्‌दा परमप्रभुले तिनीहरूसित करार बाँध्‍नुभएको थियो।

¹¹पूजाहारीहरू पवित्रस्‍थानबाट बाहिर निस्‍केर आए। त्‍यहाँ हाजिर भएका सबै पूजाहारीहरूले आ-आफ्‍नो दलअनुसार नगरीकनै आफैलाई पवित्र गरेका थिए।

¹²सबै लेवी गायकहरू, अर्थात्‌ आसाप, हेमान र यदूतून, तिनीहरूका छोराहरू र कुटुम्‍बहरूसमेत मलमलका कपड़ा लगाएर झ्‍याली, वीणा र सारङ्गीहरू लिएर वेदीको पूर्वपट्टि उभिए। अनि तिनीहरूका साथमा एक सय बीस जना पूजाहारीहरू पनि थिए। तिनीहरूले चाहिँ तुरही बजाए।

¹³तुरही बजाउनेहरू र गीत गाउनेहरूले परमप्रभुको प्रशंसा र धन्‍यवादको निम्‍ति एक सोर गरी आवाज निकाले। अनि तुरही, झ्‍याली र अरू बाजाहरूसित परमप्रभुको प्रशंसा गर्नलाई तिनीहरूले यसो भनेर गीतको आवाज निकाले: “उहाँ असल हुनुहुन्‍छ, किनकि उहाँको प्रेम सदासर्वदै रहिरहन्‍छ।” तब परमप्रभुको मन्‍दिर बादलले भरियो,

¹⁴अनि बादलले गर्दा पूजाहारीहरूले सेवा गर्न सकेनन्, किनकि परमेश्‍वरको मन्‍दिर परमप्रभुको महिमाले भरिएको थियो।