Read Nepali New Revised Version, 2012 एज्रा 1 Bible Online

एज्रा 1 - Nepali New Revised Version, 2012 bible

एज्रा 1

¹फारसका राजा कोरेसको पहिलो वर्षमा यर्मियाद्वारा भनिएको परमप्रभुको वचन पूरा हुन परमप्रभुले फारसका राजा कोरेसको हृदयलाई उत्तेजित पार्नुभयो। फलस्‍वरूप उनले आफ्‍ना राज्‍यभरि मौखिक अनि लिखित रूपमा यस्‍तो घोषणा गरे:

²“फारसका राजा कोरेस यसो भन्‍छन्, ‘परमप्रभु, स्‍वर्गका परमेश्‍वरले पृथ्‍वीका सबै राज्‍य मलाई दिनुभएको छ। उहाँले नै मलाई यहूदाको यरूशलेममा उहाँको निम्‍ति एउटा मन्‍दिर बनाउन आज्ञा गर्नुभएको छ।

³तिमीहरूका बीचमा हुने उहाँका प्रजाको प्रत्‍येक मानिससँग परमेश्‍वर रहून्‌। सो यहूदाको यरूशलेममा उक्‍लेर जाओस्, र यरूशलेममा हुनुहुने परमेश्‍वर, इस्राएलका परमेश्‍वर, परमप्रभुको मन्‍दिर त्‍यसले पुनर्निर्माण गरोस्‌।

⁴बाँचेको प्रत्‍येक यहूदी जहाँ-जहाँ छ त्‍यस ठाउँका बासिन्‍दाहरूले यरूशलेम स्‍थित परमेश्‍वरका मन्‍दिरको निम्‍ति त्‍यसलाई सुन, चाँदी, धन-सम्‍पत्ति र गाईबस्‍तुहरू तथा राजीखुशीको भेटी जुटाउनुपर्नेछ’।”

⁵त्‍यसपछि यरूशलेममा परमप्रभुका भवनको पुनर्निर्माण गर्न परमेश्‍वरले उत्तेजित पार्नुभएका यहूदा र बेन्‍यामीनका परिवारका मुख्‍य मानिसहरू अनि पूजाहारीहरू र लेवीहरू सबै नै जानलाई तयार भए।

⁶तिनीहरूका छिमेकीहरू सबैले राजीखुशीले दिएका भेटीका साथ सुन र चाँदीका वस्‍तुहरू, धन-सम्‍पत्ति, गाईबस्‍तु र बहुमूल्‍य पदार्थहरू दिएर तिनीहरूलाई सहायता गरे।

⁷त्‍यसबाहेक नबूकदनेसरले यरूशलेमबाट ल्‍याएर आफ्‍नो देवताको मन्‍दिरमा राखेका परमप्रभुको भवनका भाँड़ाहरू राजा कोरेसले निकाले।

⁸अनि फारसका राजा कोरेसले ती भण्‍डारका जिम्‍मावाल मित्रेताको जिम्‍मामा दिए। तिनले यहूदाका राजकुमार शेशबस्‍सरको निम्‍ति ती चीजहरूको एउटा तालिका बनाइदिए।

⁹तालिका यही थियो: सुनका भाँड़ा ३० चाँदीका भाँड़ा १,००० चाँदीका बाटा २९

¹⁰सुनका कचौरा ३० चाँदीका विभिन्‍न किसिमका कचौरा ४१० अन्‍य भाँड़ाहरू १,०००

¹¹सुन र चाँदीका भाँड़ाहरू सबैको जम्‍मा संख्‍या ५,४०० थियो। कैदमा लगिएकाहरू बेबिलोनबाट यरूशलेम फर्कंदा शेशबस्‍सरले ती सबै यरूशलेममा ल्‍याए।