Read Nepali New Revised Version, 2012 एज्रा 7 Bible Online

एज्रा 7 - Nepali New Revised Version, 2012 bible

एज्रा 7

¹यी घटनापछि फारसका राजा अर्तासास्‍तको राजत्‍वकालमा एज्रा बेबिलोनबाट उक्‍लेर आए। तिनी सरायाहका छोरा, जो अजर्याहका छोरा, जो हिल्‍कियाहका छोरा,

²जो शल्‍लूमका छोरा, जो सादोकका छोरा, जो अहीतूबका छोरा,

³जो अमर्याहका छोरा, जो अजर्याहका छोरा, जो मरायोतका छोरा,

⁴जो जरयाहको छोरा, जो उज्‍जीका छोरा, जो बुक्‍कीका छोरा,

⁵जो अबीशूका छोरा, जो पीनहासका छोरा, जो एलाजारका छोरा, जो प्रधान पूजाहारी हारूनका छोरा थिए।

⁶परमप्रभु इस्राएलका परमेश्‍वरले मोशाद्वारा दिनुभएको व्‍यवस्‍थामा एज्राचाहिँ एक निपुण अध्‍यापक थिए। तिनले मागेका सबै कुरा राजाले मन्‍जूर गरिदिए, किनभने परमप्रभु तिनका परमेश्‍वरको हात तिनीमाथि थियो।

⁷अर्तासास्‍त राजाको सातौँ वर्षमा केही इस्राएलीहरू, केही पूजाहारीहरू र लेवीहरू, गवैयाहरू र द्वारपालहरू र मन्‍दिरका सेवकहरू तिनको साथमा यरूशलेममा आए।

⁸ती नै राजाको सातौँ वर्षको पाँचौँ महिनामा एज्रा यरूशलेममा पुगे।

⁹पहिलो महिनाको पहिलो दिनमा तिनले बेबिलोनबाट यात्रा सुरु गरेका थिए, र पाँचौँ महिनाको पहिलो दिनमा तिनी यरूशलेममा आइपुगे, किनभने परमप्रभुको कृपालु हात तिनीमाथि थियो।

¹⁰किनकि एज्राले परमप्रभुको व्‍यवस्‍था अध्‍ययन गर्न र पालन गर्न, र इस्राएलमा धर्म-विधि र धार्मिक शिक्षा सिकाउन आफैलाई समर्पण गरेका थिए।

¹¹इस्राएललाई दिनुभएका परमप्रभुका आज्ञा र धर्म-विधिको विषय र धार्मिक प्रश्‍नमा निपुण पूजाहारी-शास्‍त्री एज्रालाई अर्तासास्‍त राजाले दिएको राजकीय पत्रको नकल यही हो:

¹²“राजाहरूका महाराजा अर्तासास्‍तबाट स्‍वर्गका परमेश्‍वरको व्‍यवस्‍थामा निपुण पूजाहारी-शास्‍त्री एज्रालाई अभिवादन:

¹³“म यो उर्दी दिँदैछु कि मेरो देशमा भएका कुनै इस्राएलीहरू, पूजाहारीहरू र लेवीहरूसमेत, जो राजी-खुशीसित यरूशलेममा जान चाहन्‍छन्, तिनीहरू तिमीसँग जान सक्‍छन्‌।

¹⁴तिम्रो जिम्‍मामा भएको तिम्रा परमेश्‍वरको व्‍यवस्‍थाको सम्‍बन्‍धमा यहूदा र यरूशलेममा के भइरहेछ सो हेर-विचार गर्न राजा र तिनका सात जना सल्‍लाहकारहरूले तिमीलाई पठाएका हुन्‌।

¹⁵राजा र तिनका सल्‍लाहकारहरूले यरूशलेममा वासस्‍थान गर्नुहुने इस्राएलका परमेश्‍वरलाई सित्तैँमा दिएका सुन र चाँदी पनि तिमीले लानू।

¹⁶साथै बेबिलोनको प्रदेशभरि तिमीले लैजान सक्‍ने जति सुन र चाँदी र साथै यरूशलेममा तिनीहरूका परमेश्‍वरका भवनको निम्‍ति मानिसहरू र पूजाहारीहरूले राजीखुशीसित जो भेटीहरू दिन्‍छन्‌ ती पनि तिमीले लैजान सक्‍छौ।

¹⁷यस रकमबाट साँढ़ेहरू, भेड़ाहरू, थुमाहरू र तिनका साथ अन्‍नबलि र अर्घ-बलिका सामानहरू तिमीले निश्‍चय किन्‍नू, र तिनलाई यरूशलेममा तिम्रा परमेश्‍वरका मन्‍दिरको वेदीमा बलि चढ़ाउनू।

¹⁸“त्‍यसबाहेक कुनै सुन वा चाँदी उब्य्रो भने तिम्रा परमेश्‍वरको इच्‍छाबमोजिम तिमी र तिम्रा दाजुभाइहरूले जस्‍तो ठीक लाग्‍छ त्‍यसरी नै त्‍यो चलाउन सक्‍छौ।

¹⁹तिम्रा परमेश्‍वरको मन्‍दिरमा आराधनाको निम्‍ति तिम्रो जिम्‍मामा दिएका भाँड़ाहरूचाहिँ तिमीले यरूशलेमका परमेश्‍वरलाई सुम्‍पिदिनू।

²⁰र तिम्रा परमेश्‍वरका भवनको निम्‍ति चाहिएका कुनै पनि अरू चीजबीज तिमीले राजकोषबाट जुटाउन सक्‍छौ।

²¹“अब म, राजा अर्तासास्‍त, यूफ्रेटिस पारिको प्रान्‍तका सबै कोषाध्‍यक्षहरूलाई यो हुकुम दिँदैछु: स्‍वर्गका परमेश्‍वरको व्‍यवस्‍थामा निपुण पूजाहारी-शास्‍त्री एज्राले तिमीसँग मागेको जुनसुकै थोक निश्‍चय जुटाइदिनू,

²²अर्थात्‌ एक सय तोड़ा, [1] चाँदी, एक सय कोर [2] गहूँ, एक सय बाथ दाखमद्य, [3] एक सय बाथ तेल, र नूनचाहिँ जत्ति चाहिन्‍छ दिइहाल्‍नू।

²³स्‍वर्गका परमेश्‍वरले जे आज्ञा गर्नुभएको छ त्‍यो स्‍वर्गका परमेश्‍वरका मन्‍दिरको निम्‍ति निश्‍चय पूरा गरिओस्, नत्रता राजा र तिनका छोराहरूको राज्‍यमाथि क्रोध आइपर्ला।

²⁴हामी यो पनि तिमीहरूलाई जनाउँदछौं कि कुनै पनि पूजाहारीहरू, लेवीहरू, गवैयाहरू, द्वारपालहरू, मन्‍दिरका सेवकहरू अथवा परमेश्‍वरको यस भवनका अरू काम गर्नेहरूलाई राजकर वा आयकर वा महसूल लाउने तिमीहरूलाई अधिकार छैन।

²⁵“तिमी, एज्राले चाहिँ तिमीसित भएको तिम्रा परमेश्‍वरको बुद्धिअनुसार यूफ्रेटिस पारिको प्रान्‍तका तिम्रा परमेश्‍वरका विधिविधानलाई जान्‍ने सबै मानिसमाथि न्‍याय गर्न हाकिमहरू र न्‍यायकर्ताहरू नियुक्त गर्नू। ती नजान्‍नेहरूलाई चाहिँ तिमीले सिकाउनू।

²⁶तिम्रा परमेश्‍वरको व्‍यवस्‍था र राजाको कानून पालन नगर्ने जुनसुकैलाई पनि कठोर दण्‍ड दिइनैपर्छ— मृत्‍युदण्‍ड, वा देश निष्‍कासन, वा सम्‍पत्ति जफत वा कैद।”

²⁷परमप्रभु हाम्रा पुर्खाहरूका परमेश्‍वरको प्रशंसा होस्, जसले यसरी यरूशलेममा भएको परमेश्‍वरका भवनको महिमा बढ़ाउन राजाको मनमा यो विचार हालिदिनुभयो,

²⁸अनि राजा, उनका सल्‍लाहकारहरू र उनका सबै उच्‍च पदाधिकारीहरूका सामुन्‍ने मप्रति आफ्‍नो कृपा-दृष्‍टि प्रकट गर्नुभयो। यसैले परमप्रभु मेरा परमेश्‍वरको हात ममाथि रहेको छ भनी जानेर मैले साहस गरें, र मसँग जान इस्राएलका मुख्‍य-मुख्‍य मानिसहरूलाई मैले भेला गरें।