Read Nepali New Revised Version, 2012 एज्रा 9 Bible Online

एज्रा 9 - Nepali New Revised Version, 2012 bible

एज्रा 9

¹जब यी सबै गरिसिद्ध्याए तब अगुवाहरूले मकहाँ आएर भने, “इस्राएलका मानिस, पूजाहारीहरू र लेवीहरूसमेतले छिमेकका मानिसहरू, अर्थात्‌ कनानी, हित्ती, परिज्‍जी, यबूसी, अम्‍मोनी, मोआबी, मिश्री र एमोरीहरूका घिनलाग्‍दा कामहरूदेखि आफूलाई अलग राखेका छैनन्‌।

²तिनीहरूले यी जातिहरूका चेलीबेटीहरूलाई आफू र आफ्‍ना छोराहरूका निम्‍ति पत्‍नीहरू राखेका छन्, र यसरी पवित्र जाति विदेशी मानिसहरूसँग मिसिएका छन्‌। र यसमा अगुवाहरू र अधिकारीहरू नै खास दोषी छन्‌।”

³जब मैले यो कुरा सुनें तब आफ्‍नो पोशाक र खास्‍टो च्‍यातें, र आफ्‍नो कपाल र दाह्री उखेलें र अवाक्‌ भइरहें।

⁴अनि निर्वासनमा गएकाहरूको यस दोषको कारण इस्राएलका परमेश्‍वरका वचनदेखि डराउनेहरू सबै मेरो चारैतिर भएर जम्‍मा भए। म त्‍यहाँ बेलुकीका बलिदानको समयसम्‍मै अवाक्‌ भइरहें।

⁵तब बेलुकीका बलिदानको समयमा म फाटेको पोशाक र खास्‍टोमा नै आफूलाई स्‍वयम्‌ होच्‍याएको अवस्‍थाबाट उठें। मैले घुँड़ा टेकेर परमप्रभु मेरा परमेश्‍वरतिर हात पसारी यसो भनेर प्रार्थना गरें:

⁶“हे मेरा परमेश्‍वर, मेरो अनुहार तपाईंतिर उठाउन म साह्रै लज्‍जित र अपमानित भएको छु। किनभने हे मेरा परमेश्‍वर, हाम्रा पाप हाम्रो शिरभन्‍दा अल्‍गा भएका छन्‌ र हाम्रो दोष आकाशसम्‍मै पुगेको छ।

⁷हाम्रा पुर्खाहरूका दिनदेखि आजको दिनसम्‍मै हाम्रो दोष अत्‍यन्‍तै ठूलो भएको छ। हाम्रो अधर्मले गर्दा हामीहरू र हाम्रा राजा र हाम्रा पूजाहारीहरूलाई विदेशी राजाहरूका हातमा मृत्‍यु, कैद, लूटपीट र ठूलो बेइज्‍जतको शिकार हुनु परेको छ, र हाम्रो वर्तमान दशा पनि यस्‍तै छ।

⁸“तर अब परमप्रभु हाम्रा परमेश्‍वरले हाम्रा लागि केही बाँकी मानिसहरूलाई दिएर र हामीलाई आफ्‍नो पवित्रस्‍थानमा सुरक्षित स्‍थान दिएर हामीमाथि एक छिनको लागि कृपालु हुनुभएको छ। र यसरी हाम्रा परमेश्‍वरले हाम्रा आँखामा ज्‍योति दिनुभएको छ र हाम्रो दासत्‍वमा केही आराम दिनुभएको छ।

⁹हामी दासहरू भए तापनि हाम्रो दासत्‍वको बन्‍धनमा हाम्रा परमेश्‍वरले हामीलाई त्‍याग्‍नुभएको छैन। उहाँले फारसका राजाहरूका सामु हामीमाथि आफ्‍नो कृपा देखाउनुभएको छ। हामीले हाम्रा परमेश्‍वरको भवन पुन: मरम्‍मत गर्न र त्‍यसका भत्‍केका भागलाई पुनर्निर्माण गर्न उहाँले हामीलाई जीवन प्रदान गर्नुभएको छ, र यहूदा र यरूशलेममा रक्षाको निम्‍ति उहाँले एउटा पर्खाल दिनुभएको छ।

¹⁰“अब हे हाम्रा परमेश्‍वर, यति भएपछि हामी के भनौं?

¹¹तपाईंले आफ्‍ना दास अगमवक्ताहरूद्वारा दिनुभएका आज्ञाहरूको अवहेलना हामीले गरेका छौं, जब तपाईंले यसो भन्‍नुभएको थियो: तिमीहरूले अधिकार गर्नलाई प्रवेश गरिरहेको देश त्‍यसका मानिसहरूको दुष्‍टताले दूषित भएको छ। आफ्‍ना घिनलाग्‍दा चलनद्वारा ती अन्‍यजातिहरूले त्‍यस देशको कुना-कुनासम्‍मै आफ्‍नो अशुद्धताले भरेका छन्‌।

¹²यसकारण तिमीहरूले आफ्‍ना छोरीहरूलाई उनीहरूका छोराहरूसित र तिमीहरूका छोराहरूलाई उनीहरूका छोरीहरूसित विवाह नगरिदिनू। तिमीहरूले उनीहरूसित मित्रताको सम्‍झौता राख्‍न नखोज्‍नू। यसरी तिमीहरू शक्तिशाली भएर त्‍यस देशका असल-असल कुराहरूको भोग गर्नेछौ र तिमीहरूका सन्‍तानलाई त्‍यो चिरस्‍थायी अधिकार हुनलाई छोड़िराख्‍नेछौ।

¹³“अब हाम्रा दुष्‍ट कामहरू र हाम्रो ठूलो दोषको कारण हामीले दु:ख पाएका भए तापनि तपाईं, हाम्रा परमेश्‍वरले हामीलाई हाम्रा पापअनुसार पाउनुपर्नेभन्‍दा कम दण्‍ड दिनुभएको छ, र हामीलाई यस्‍तो बाँकी हिस्‍सा दिनुभएको छ।

¹⁴के हामी फेरि तपाईंका आज्ञाहरू उल्‍लङ्घन गरेर यस्‍ता घिनलाग्‍दा चालमा चल्‍ने मानिसहरूसँग वैवाहिक सम्‍बन्‍ध जोड़ौं? के तपाईं हाम्रा निम्‍ति कुनै अवशेष नराखी नाश गर्नसम्‍म रिसाउनुहुनेथिएन र?

¹⁵हे परमप्रभु इस्राएलका परमेश्‍वर, तपाईं धर्मी हुनुहुन्‍छ। आज हामी अवशेषको रूपमा छोड़िएका छौं। हामी आफ्‍नो दोषमा तपाईंको सामु उपस्‍थित छौं, यद्यपि हाम्रो दोषको कारण हामीमध्‍येको कोही पनि तपाईंको सामु टिक्‍न सक्‍दैनौं।”