Read Nepali New Revised Version, 2012 नहेम्‍याह 13 Bible Online

नहेम्‍याह 13 - Nepali New Revised Version, 2012 bible

नहेम्‍याह 13

¹त्‍यस दिन जनताको सामुन्‍ने मोशाको पुस्‍तक पढ़ेको बेलामा यस्‍तो कुरा लेखिएको भेट्टाइयो, कि कुनै पनि अम्‍मोनी अथवा मोआबी परमेश्‍वरको सभामा कहिल्‍यै पस्‍न पाउनेछैन।

²किनभने उनीहरू रोटी र पानी लिएर इस्राएलीहरूसित भेट गर्न आएनन्, तर तिनीहरूलाई सराप दिन बालामलाई ज्‍यालामा बोलाएका थिए। तापनि हाम्रा परमेश्‍वरले त्‍यस सरापलाई आशिष्‌मा परिवर्तन गरिदिनुभएको थियो।

³मानिसहरूले त्‍यो व्‍यवस्‍था सुनेर सबै पराई वंशका सन्‍तानलाई इस्राएलबाट अलग गराए।

⁴यो हुनुभन्‍दा पहिले नै पूजाहारी एल्‍यासीब हाम्रा परमेश्‍वरका भवनको भण्‍डारका अधिकारी नियुक्त भएका थिए। तिनको तोबियासँग घनिष्‍ठ सम्‍बन्‍ध थियो।

⁵तिनले उनलाई पहिले अन्‍नबलि, धूपहरू, मन्‍दिरका भाँड़ाहरू अनि लेवीहरू, गवैयाहरू र द्वारपालहरूका निम्‍ति तोकिएका अन्‍नको दशौँ अंश, नयाँ दाखमद्य र तेल तथा पूजाहारीहरूका निम्‍ति दान राख्‍ने एउटा ठूलो कोठा दिएका थिए।

⁶तर यी सबै भइरहेको बेला मचाहिँ यरूशलेममा थिइनँ, किनभने बेबिलोनका राजा अर्तासास्‍तको बत्तीसौँ वर्षमा म राजाकहाँ फर्केको थिएँ। केही समयपछि यरूशलेममा फर्किजानलाई मैले उहाँको अनुमति मागें,

⁷र यरूशलेममा फर्कें। त्‍यसपछि तोबियाको निम्‍ति परमप्रभुको भवनका चोकहरूमा एउटा कोठा दिएर एल्‍यासीबले गरेको खराब कुरो मैले थाहा पाएँ।

⁸म साह्रै अप्रसन्‍न भएँ। मैले त्‍यस कोठाबाट तोबियाका सबै सामानहरू फालिदिएँ।

⁹ती कोठाहरूलाई शुद्ध गरेर परमप्रभुको भवनका भाँड़ाहरू, अन्‍नबलि र धूपहरूसमेत तिनमा फेरि राख्‍न मैले आदेश दिएँ।

¹⁰लेवीहरूले आफ्‍ना भागहरू पाएका रहेनछन्‌ भन्‍ने कुरा पनि मैले थाहा पाएँ। यसैले मन्‍दिरका सेवाको जिम्‍मा लिने लेवीहरू र गवैयाहरू सबै आ-आफ्‍ना गाउँहरूमा फर्केछन्‌ भन्‍ने पनि मैले सुनें।

¹¹यसैकारण मैले अधिकारीहरूलाई हप्‍काएर प्रश्‍न गरें, “परमेश्‍वरका भवनको किन अवहेलना भएको छ?” अनि मैले ती मानिसहरूलाई बोलाएर फेरि तिनीहरूकै स्‍थानमा नियुक्त गरें।

¹²त्‍यसपछि सबै यहूदाले अन्‍नका आफ्‍ना दशौँ अंश, नयाँ दाखमद्य र तेल भण्‍डारमा ल्‍याए।

¹³मैले पूजाहारी शेलेम्‍याह, शास्‍त्री सादोक र पदायाह नाउँ गरेका एक जना लेवीलाई भण्‍डारका जिम्‍मावाल नियुक्त गरें, र जक्‍कूरका छोरा, मत्तन्‍याहका नाति हानानलाई तिनीहरूका सहायक नियुक्त गरें। किनभने तिनीहरू विश्‍वासी मानिसहरू गनिएका थिए। तिनीहरूको कामचाहिँ आफ्‍ना दाजुभाइहरूका भाग वितरण गर्नु थियो।

¹⁴हे परमेश्‍वर, यसको निम्‍ति मेरो सम्‍झना राख्‍नुहोस्, र मैले भक्तिसाथ मेरा परमेश्‍वरका भवनको र त्‍यसको सेवाको निम्‍ति गरेको काम नमेटाइदिनुहोस्‌।

¹⁵त्‍यस बेला यहूदामा मानिसहरूले शबाथमा कोल पेलिरहेका, र खेतको अन्‍न जम्‍मा गरेर दाखमद्य, दाख, नेभारा र सबै किसिमका भारी गधामा राख्‍दैगरेका मैले देखें। उनीहरूले यी सबै थोक शबाथमा यरूशलेममा ल्‍याउने गर्थे। त्‍यसैले त्‍यस दिनमा खाने कुरा बेचेको विरोधमा मैले तिनीहरूलाई चेताउनी दिएँ।

¹⁶यरूशलेममा बसोबास गर्ने टुरोसका मानिसहरूले पनि माछा र अरू सबै किसिमका व्‍यापारका मालहरू ल्‍याएर शबाथमा यहूदाका मानिसहरूलाई यरूशलेममा बेच्‍दारहेछन्‌।

¹⁷यहूदाका भारदारहरूलाई हप्‍काएर मैले भनें, “यस्‍तो दुष्‍ट चाल चलेर तिमीहरूले शबाथलाई अपवित्र गर्नुको अर्थ के हो?

¹⁸के तिमीहरूका पुर्खाहरूले पनि ठीक यस्‍तै काम गरेका हुनाले हाम्रा परमेश्‍वरले हामी र यस सहरमाथि यो विपत्ति ल्‍याउनुभएको होइन र? अब तिमीहरूले शबाथलाई अपवित्र पारेर झन्‌ परमप्रभुको क्रोध जगाउँदैछौ।”

¹⁹शबाथका तयारीको निम्‍ति यरूशलेमका मूल ढोकाहरूमा साँझको छाया परेपछि प्रवेश-द्वारहरू थुन्‍नू र शबाथ नसिद्धिञ्‍जेल नखोल्‍नू भनी मैले आज्ञा गरें। शबाथमा कुनै पनि भारी भित्र लान नपाओस्‌ भनेर मेरा कोही मानिसहरूलाई मूल ढोकाको जिम्‍मामा नियुक्त गरें।

²⁰एक-दुई पल्‍ट व्‍यापारीहरू र सबै किसिमका सामान ल्‍याउने पैकारीहरूले यरूशलेमको बाहिर रात बिताए।

²¹तर मैले तिनीहरूलाई यसो भनेर चेताउनी दिएँ, “तिमीहरू किन सहरको पर्खालकै सामुन्‍ने रात बिताउँछौ? यदि तिमीहरूले फेरि यसो गर्‍यौ भने म तिमीहरूको विरुद्धमा कड़ा कारबाही गर्नेछु।” त्‍यसपछि तिनीहरू फेरि कहिल्‍यै शबाथमा आएनन्‌।

²²अनि शबाथ-दिन पवित्र राख्‍न भनी मैले ती लेवीहरूलाई तिनीहरूले आफूलाई शुद्ध गरी मूल ढोकामा पहरा दिनू भन्‍ने आज्ञा गरें। हे मेरा परमेश्‍वर, यो पनि मेरो निम्‍ति सम्‍झना रहोस्, र तपाईंको महान्‌ प्रेममा आफ्‍नो कृपा ममाथि रहोस्‌।

²³त्‍यस बेला पनि कुनै-कुनै यहूदाका मानिसहरूले अश्‍दोद, अम्‍मोन र मोआबका स्‍त्रीहरूलाई विवाह गरेका मैले भेट्टाएँ।

²⁴तिनीहरूका बालकहरूमध्‍ये आधा अश्‍दोदी भाषा बोल्‍थे अथवा अरू मानिसहरूको भाषा बोल्‍थे, र तिनीहरू यहूदाको भाषा बोल्‍न जान्‍दैनथे।

²⁵मैले तिनीहरूलाई हप्‍काएँ र सराप दिएँ। मैले कुनै-कुनै मानिसहरूलाई पिटें र जगल्‍ट्याएँ। मैले यसो भनेर परमेश्‍वरको नाउँमा तिनीहरूलाई शपथ खान लाएँ, “तिमीहरू आफ्‍ना छोरीहरू उनीहरूका छोराहरूसित विवाह गरिदिनेछैनौ, अथवा उनीहरूका कुनै पनि छोरीहरू तिम्रा छोराहरूसित वा तिमीहरू आफै विवाह गर्नेछैनौ।

²⁶के यस्‍तै स्‍त्रीहरूको कारण इस्राएलका राजा सोलोमनले पाप गरेका थिएनन्‌? समस्‍त जातिहरूमा तिनीजस्‍तै अरू कुनै राजा थिएनन्‌। तिनलाई आफ्‍ना परमेश्‍वरले प्रेम गर्नुभएको थियो, र परमेश्‍वरले तिनलाई सम्‍पूर्ण इस्राएलमाथि राजा तुल्‍याउनुभएको थियो। तापनि विदेशी स्‍त्रीहरूले नै तिनलाई पाप गर्न लाए।

²⁷अहिले पनि हामीहरूले यो सुन्‍नुपर्छ कि तिमीहरूले पनि विदेशी स्‍त्रीहरूलाई विवाह गरी यो घोर अपराध गरेर हाम्रा परमेश्‍वरसितको विश्‍वास तिमीहरू तोड्‌दैछौ?”

²⁸प्रधान पूजाहारी एल्‍यासीबका छोरा योयादाको एक जना छोराले होरोनी सन्‍बलतकी एउटी छोरीलाई विवाह गरेको रहेछ। यसैकारण मैले त्‍यसलाई मेरो सामुबाट निकालिदिएँ।

²⁹हे परमेश्‍वर, तिनीहरूले पूजाहारी पदलाई र पूजाहारीगिरी र लेवीहरूको करारलाई अपवित्र गरेकामा तिनीहरूको सम्‍झना रहोस्‌।

³⁰यसरी मैले पूजाहारीहरू र लेवीहरूलाई हरेक विदेशी कुराबाट शुद्ध गरें, र तिनीहरूलाई आ-आफ्‍नो काममा नियुक्त गरें।

³¹ठहरिएको समयमा दाउराको दान ल्‍याउने र अगौटे फलको निम्‍ति पनि मैले व्‍यवस्‍था मिलाइदिएँ। हे परमेश्‍वर, तपाईंको निगाहमा मेरो सम्‍झना रहोस्‌।