Read Nepali New Revised Version, 2012 नहेम्‍याह 3 Bible Online

नहेम्‍याह 3 - Nepali New Revised Version, 2012 bible

नहेम्‍याह 3

¹प्रधान पूजाहारी एल्‍यासीब र तिनका सङ्गी-पूजाहारीहरूले काम सुरु गरेर भेड़ा ढोकाको पुनर्निर्माण गरे। तिनीहरूले त्‍यसका ढोकाहरू खड़ा गरे। तिनीहरूले यो काम सयको बुर्जा र हननेलको बुर्जासम्‍मै सके र त्‍यसलाई अर्पण गरे।

²यरीहोका मानिसहरूले त्‍यसैसँग जोड़िएको भाग बनाए, र इम्रीका छोरा जक्‍कूरले अर्को भाग बनाए।

³माछा ढोकाचाहिँ हस्‍सेनाका छोराहरूले पुनर्निर्माण गरे। तिनीहरूले त्‍यसका सत्तरीहरू बसाले, र त्‍यसका छेस्‍किनी र आग्‍लाहरू लगाएर ढोकाहरू खड़ा गरे।

⁴उरियाहका छोरा, हक्‍कोसका नाति मरेमोतले अर्को भाग मरम्‍मत गरे। बेरेक्‍याहका छोरा, मशेजेबेलका नाति मशुल्‍लामले अर्को भाग मरम्‍मत गरे, र त्‍यसका छेउको भाग बानाका छोरा सादोकले मरम्‍मत गरे।

⁵तकोका मानिसहरूले अर्को भाग मरम्‍मत गरे, तर तिनीहरूका भारदारहरूचाहिँ आ-आफ्‍ना नाइकेहरूको निर्देशनमा काम गरेर आफैलाई नीच तुल्‍याउन मानेनन्‌।

⁶येशना [1] ढोका पसेहका छोरा योयादा र बसोदयाहका छोरा मशुल्‍लामले मरम्‍मत गरे। तिनीहरूले त्‍यसका सत्तरीहरू बसालेर छेस्‍किनी र आग्‍लाहरू लगाएर ढोकाहरू खड़ा गरे।

⁷तिनीहरूका छेउमा गिबोनी मलत्‍याह र मेरोनोती यादान, गिबोन र मिस्‍पाका मानिसहरूले मरम्‍मत गरे। तिनीहरू यूफ्रेटिस पारिको प्रान्‍तका राज्‍यपालको अधिकारमुनि थिए।

⁸सुनार हरयाहका छोरा उज्‍जीएलले अर्को भाग मरम्‍मत गरे। त्‍यसका छेउको भाग अत्तर बनाउने हनन्‍याहले मरम्‍मत गरे। तिनीहरूले चौड़ा पर्खालसम्‍मै यरूशलेमको पुनर्निर्माण गरे।

⁹यरूशलेमको आधा जिल्‍लाका शासक हूरका छोरा रपायाहले अर्को भाग मरम्‍मत गरे।

¹⁰त्‍यससँग जोड़िएको भाग हरूमापका छोरा यदायाहले आफ्‍नो घरको सामुन्‍नेको अर्को भाग मरम्‍मत गरे। हशबन्‍याहको छोरा हत्तूशले अर्को भाग मरम्‍मत गरे।

¹¹अर्को भागचाहिँ भट्टीको बुर्जासमेत हारीमका छोरा मल्‍कियाह र पहत-मोआबका छोरा हश्‍शूबले मरम्‍मत गरे।

¹²यरूशलेमको आधा जिल्‍लाका शासक हल्‍लोहेशका छोरा शल्‍लूमले आफ्‍ना छोरीहरूको सहायताले अर्को भाग मरम्‍मत गरे।

¹³बेँसी ढोकाचाहिँ हानून र जानोहका बासिन्‍दाहरूले मरम्‍मत गरे। तिनीहरूले त्‍यो पुनर्निर्माण गरे, र छेस्‍किनीहरू र आग्‍लाहरू लगाएर त्‍यसका ढोकाहरू बसाले, र फोहोर ढोकासम्‍मै चार सय पचास मिटर लामो पर्खाल मरम्‍मत गरे।

¹⁴फोहोर ढोकाचाहिँ बेथ-हक्‍केरेम जिल्‍लाका शासक रेकाबका छोरा मल्‍कियाहले मरम्‍मत गरे। तिनले त्‍यो पुनर्निर्माण गरी छेस्‍किनीहरू र आग्‍लाहरू लगाएर त्‍यसका ढोकाहरू बसाले।

¹⁵फुहारा ढोकाचाहिँ मिस्‍पा जिल्‍लाका शासक कोल-होजेका छोरा शल्‍लूनले मरम्‍मत गरे। तिनले त्‍यो पुनर्निर्माण गरेर त्‍यसका छाना लगाए, र त्‍यसका छेस्‍किनीहरू र आग्‍लाहरू लगाएर त्‍यसका ढोकाहरू बसाले। तिनले राजाका बगैँचाको छेउमा भएको सिलोआमको तलाउको पर्खाल दाऊदको सहरबाट ओर्लने खुट्‌किलाहरूसम्‍मै मरम्‍मत गरे।

¹⁶तिनको छेउमा बेथ-सरको आधा जिल्‍लाका शासक अज्‍बूकका छोरा नहेम्‍याहले दाऊदका चिहानको सामुको एउटा जग्‍गा, बनावटी पोखरी र वीरहरूको घरसम्‍म मरम्‍मत गरे।

¹⁷तिनको छेउमा बानीका छोरा रेहूमको अधीनमा लेवीहरूले मरम्‍मत गरे। तिनको छेउमा कीलाहको आधा जिल्‍लाका शासक हशब्‍याहले आफ्‍नो जिल्‍लाको निम्‍ति मरम्‍मत गरे।

¹⁸तिनको छेउमा तिनका देशवासीहरूले कीलाहको आधा जिल्‍लाका शासक हेनादादका छोरा बिन्‍नूईको अधीनमा मरम्‍मत गरे।

¹⁹तिनको छेउमा मिस्‍पाका शासक येशूअका छोरा एसेरले अर्को एउटा भाग हतियारखानाका भिरालोको सामुन्‍नेदेखि मरम्‍मत गरे।

²⁰तिनको छेउमा जब्‍बैका छोरा बारूकले जोशिला भई अर्को एउटा भाग कुनादेखि प्रधान पूजाहारी एल्‍यासीबका घरको ढोकासम्‍म मरम्‍मत गरे।

²¹तिनको छेउमा उरियाहका छोरा, हक्‍कोसका नाति मरेमोतले अर्को एउटा भाग एल्‍यासीबका घरको ढोकादेखि तिनका घरको छेउसम्‍मै मरम्‍मत गरे।

²²तिनको छेउमा यरूशलेमका छेउछाउका क्षेत्रमा बस्‍ने पूजाहारीहरूले मरम्‍मत गरे।

²³तिनका छेउमा बेन्‍यामीन र हश्‍शूबले आफ्‍नो घरको सामुन्‍ने मरम्‍मत गरे। तिनका छेउमा मासेयाहका छोरा, हननियाका नाति अजर्याहले आफ्‍नो घरको छेउमा मरम्‍मत गरे।

²⁴तिनको छेउमा हेनादादका छोरा बिन्‍नूईले अर्को एउटा भाग अजर्याहको घरदेखि कुनाको कोणसम्‍म मरम्‍मत गरे।

²⁵उज्‍जैका छोरा पालालले कोण र रक्षकहरूका चोकनेरको माथिल्‍लो महलदेखि बाहिर निस्‍केको बुर्जाको सामुन्‍ने मरम्‍मत गरे।

²⁶तिनको छेउमा परोशका छोरा पदायाह र ओफेल डाँड़ामा बस्‍ने मन्‍दिरका सेवकहरूले पूर्वपट्टिको पानी ढोका र बाहिर निस्‍केको बुर्जाको सामुन्‍ने एउटा ठाउँसम्‍म मरम्‍मत गरे।

²⁷तिनका छेउमा तकोका मानिसहरूले बाहिर निस्‍केको ठूलो बुर्जादेखि ओफेलको पर्खालसम्‍म अर्को एउटा भाग मरम्‍मत गरे।

²⁸अश्‍व ढोकाको मास्‍तिर पूजाहारीहरूले आ-आफ्‍नो घरको सामु मरम्‍मत गरे।

²⁹तिनीहरूका छेउमा इम्‍मेरका छोरा सादोकले आफ्‍नो घरको सामु मरम्‍मत गरे। तिनको छेउमा पूर्व ढोकाका द्वारपाल शकन्‍याहका छोरा शमायाहले मरम्‍मत गरे।

³⁰तिनको छेउमा शेलेम्‍याहका छोरा हनन्‍याह र सालापका जन्‍तरे छोरा हानूनले अर्को एउटा भाग मरम्‍मत गरे। तिनका छेउमा बेरेक्‍याहका छोरा मशुल्‍लामले आफ्‍नो डेराको सामु मरम्‍मत गरे।

³¹तिनको छेउमा सुनार मल्‍कियाहले निरीक्षण ढोकाका सामुन्‍नेको, मन्‍दिरका सेवकहरू र व्‍यापारीहरूको घरसम्‍म र कुनाका मास्‍तिरको कोठासम्‍म मरम्‍मत गरे।

³²कुनाका मास्‍तिरको कोठा र भेड़ा ढोकाको बीचमा चाहिँ सुनारहरू र व्‍यापारीहरूले मरम्‍मत गरे।