Read Nepali New Revised Version, 2012 एस्‍तर 6 Bible Online

एस्‍तर 6 - Nepali New Revised Version, 2012 bible

एस्‍तर 6

¹त्‍यस रात राजालाई निद्रै लागेन। उनले आफ्‍नो राज्‍यकालका विवरण भएको इतिहासको पुस्‍तक ल्‍याएर पढ़िसुनाउने हुकुम गरे, र त्‍यो राजालाई पढ़ेर सुनाइयो।

²त्‍यसमा दुई जना ढोके, बिग्‍थाना र तेरेशले राजा अहासूरसलाई मार्ने षड्‌यन्‍त्र गरेका र मोर्दकैले त्‍यो जाहेर गरिदिएका विषयमा लेखिएको थियो।

³तब राजाले भने, “यसको निम्‍ति मोर्दकैले कुन सम्‍मान अथवा पद पाए त?” त्‍यहाँ उपस्‍थित भएका राजाका सेवकहरूले भने, “मोर्दकैको निम्‍ति त केही गरिएको छैन।”

⁴राजाले सोधे, “त्‍यहाँ चोकमा को छ?” त्‍यस बेला हामान भर्खरै आफूले तयार गरेको फाँसीको काठमा मोर्दकैलाई झुण्‍ड्याउन भनी राजासित बिन्‍ती गर्न महलको बाहिर चोकमा आइपुगेका थिए।

⁵राजाका सेवकहरूले जवाफ दिए, “हामान चोकमा उभिरहेका छन्‌।” राजाले तिनलाई भित्र ल्‍याउने हुकुम गरे।

⁶जब हामान भित्र आए, तब राजाले तिनलाई सोधे, “राजा आफैले सम्‍मान दिन इच्‍छा गरेको मानिसलाई के गर्नुपर्छ?” हामानले मनमनै सोचे, “मबाहेक राजाले अरू कसलाई सम्‍मान दिन इच्‍छा गर्नुभएको होला र?”

⁷यसकारण तिनले राजालाई भने, “जुन मानिसलाई राजाले सम्‍मान दिने इच्‍छा गरिबक्‍सिन्‍छ,

⁸त्‍यसको निम्‍ति राजा आफैले लाउने पोशाक र राजाले सवार गर्ने घोड़ा ल्‍याईओस्, जसको शिरमा राजसी चिन्‍ह लगाइएको छ।

⁹त्‍यो पोशाक र घोड़ा राजाका सबैभन्‍दा माननीय पदाधिकारीहरूमा एक जनाको हातमा सुम्‍पिओस्, अनि राजाले सम्‍मान गर्न इच्‍छा गर्नुभएको त्‍यस मानिसलाई तिनीहरूले पहिराइदेऊन्, र त्‍यही घोड़ामा सवार गराएर सहरका सड़कहरूमा तिनीहरू जाँदा यसो भन्‍दै कराऊन्, ‘राजाले सम्‍मान गर्न इच्‍छा गर्नुभएको मानिसको निम्‍ति के गरिएको छ, सो हेर’।”

¹⁰तब राजाले हामानलाई भने, “झट्टै गएर तिमीले भनेझैँ पोशाक र घोड़ा ल्‍याऊ, र यहूदी मोर्दकैको निम्‍ति त्‍यसै गर। उनी दरबारको मूल ढोकामा रहन्‍छन्‌। तिमीले भनेबमोजिम सबै कुरामध्‍ये केही नछुटोस्‌।”

¹¹यसकारण हामानले त्‍यो पोशाक मोर्दकैलाई पहिराइदिए, र घोड़ा लिएर उनलाई चढ़ाई सहरका सड़कहरूमा यसो भन्‍दै तिनी कराए, “राजाले सम्‍मान गर्न खुशी हुनुभएका मानिसलाई के गरिन्‍छ, हेर।”

¹²त्‍यसपछि मोर्दकै राजदरबारको मूल ढोकामा फर्किआए। हामानचाहिँ मुख छोपेर अफसोस गर्दै हतार-हतार आफ्‍नो घर गए।

¹³तिनले आफ्‍नी पत्‍नी जेरेश र आफ्‍ना सबै मित्रहरूलाई तिनीमाथि भएका सबै कुरा बताए। तिनका सल्‍लाहकारहरू र तिनकी पत्‍नीले यो भने, “यदि मोर्दकै, जसको सामुन्‍ने तपाईंको पतन सुरु भएको छ, ती यहूदी जातिका हुन्‌ भने तपाईं उनको विरुद्धमा केही पनि गर्न सक्‍नुहुन्‍न। तपाईंको निश्‍चय नै पतन हुनेछ।”

¹⁴हामानसित तिनीहरू कुरा गरिरहँदा राजाका नपुंसकहरू आइपुगे, र तिनलाई एस्‍तरले तयार गरेको भोजमा लगिहाले।