Read Nepali New Revised Version, 2012 प्रस्‍थान 26 Bible Online

प्रस्‍थान 26 - Nepali New Revised Version, 2012 bible

प्रस्‍थान 26

¹“तैंले दश वटा पर्दा भएको पवित्र वासस्‍थान बनाउनू। ती पर्दा मसिनो गरी बाटेको सूती कपड़ाका र नीलो, बैजनी र रातो रङ्गको धागोका होऊन्‌। तिनमा सिपालु शिल्‍पकारको काम भएका करूबहरूसमेत तैंले बनाउनू।

²हरेक पर्दाको लमाइ अट्ठाइस हात र चौड़ाइ चार हातको होस्‌। सबै पर्दा एकै नापका होऊन्‌।

³पाँच वटा पर्दा एक-अर्कोसित गाँस्‍नू, र अर्का पाँच वटा पनि एक-अर्कोसित गाँस्‍नू।

⁴पहिलो गाँसिएको भागको पल्‍लो पर्दाको छेउमा नीलो सुर्काउनी बनाउनू। दोस्रो गाँसिएको भागको पल्‍लो पर्दाको छेउमा पनि त्‍यस्‍तै बनाउनू।

⁵एउटा पर्दामा पचास वटा सुर्काउनी बनाउनू, अनि दोस्रो गाँसिएको भागको पल्‍लो पर्दामा पचास वटा सुर्काउनी बनाउनू। ती सुर्काउनीहरू आमनेसामने होऊन्‌।

⁶तब सुनका पचास वटा अङ्‌कुसे बनाएर पर्दाहरू एक-अर्कोसित ती अङ्‌कुसेहरूले जोड्‌नू, र यसरी पवित्र वासस्‍थान एउटै हुनेछ।

⁷“पवित्र वासस्‍थानमाथिका पालको निम्‍ति बाख्राको भुत्‍लाका पर्दाहरू बनाउनू। तैंले एघार वटा पर्दा बनाउनू।

⁸प्रत्‍येक पर्दाको लमाइ तीस हात र चौड़ाइ चार हातको होस्‌। एघारै पर्दाको नाप एउटै हुनुपर्छ।

⁹पाँच वटा पर्दा एकसाथ र छ वटा पर्दा एकसाथ जोड्‌नू। छैटौँ पर्दालाई चाहिँ पालको अगिल्‍तिर दोबर पार्नू।

¹⁰पहिलो गाँसिएको भागको पल्‍लो पर्दाको छेउमा पचास वटा सुर्काउनी बनाउनू, र अर्को गाँसिएको भागको पल्‍लो पर्दाको छेउमा पनि पचास वटा सुर्काउनी बनाउनू।

¹¹पाल जोड़ेर एउटै बनाउनलाई तैंले काँसाका पचास वटा अङ्‌कुसे बनाउनू, र ती अङ्‌कुसे सुर्काउनीहरूमा लगाउनू।

¹²पालका पर्दाहरूका बाँकी रहेको भाग, अर्थात्‌ आधा पर्दाचाहिँ पवित्र वासस्‍थानको पछिल्‍तिर झुण्‍डिरहोस्‌।

¹³पालका पर्दाहरूको बाँकी रहेको एक हात यतातिर र एक हात उतातिर पवित्र वासस्‍थान ढाक्‍नलाई त्‍यसका दुवै छेउ-छेउमा झुण्‍डिरहून्‌।

¹⁴रातो रङ्गले लगाएको भेड़ाका छालाको छत पाल ढाक्‍नलाई बनाउनू, र त्‍यसको माथि ढाक्‍नलाई सीलका छालाको अर्को एउटा छत बनाउनू।”

¹⁵“पवित्र वासस्‍थानको निम्‍ति बबुल काठका फल्‍याकहरू ठाड़ो-ठाड़ो बनाउनू।

¹⁶हरेक फल्‍याकको लमाइ दश हात र चौड़ाइ एक हात आधाको होस्‌।

¹⁷हरेक फल्‍याकमा दुई-दुई वटा चोसाहरू एकअर्कोको सामुन्‍ने राखिएका होऊन्‌। पवित्र वासस्‍थानका सबै फल्‍याकहरू तैंले यसरी नै बनाउनू।

¹⁸पवित्र वासस्‍थानको दक्षिण भागको निम्‍ति बीस वटा फल्‍याक बनाउनू।

¹⁹ती बीसै वटा फल्‍याकहरूका मुन्‍तिर चाँदीका चालीस वटा आधार बनाउनू— दुई आधारहरू एक फल्‍याकको मुन्‍तिर र हरेक चोसोमुनि एउटा।

²⁰पवित्र वासस्‍थानको अर्कोपट्टि, अर्थात्‌ उत्तरपट्टिको निम्‍ति बीस वटा फल्‍याक,

²¹र तिनका चालीस चाँदीका आधारहरू बनाउनू— एउटा फल्‍याकको मुन्‍तिर दुई वटा आधार।

²²पवित्र वासस्‍थानको टाढ़ाको भाग, अर्थात्‌ पश्‍चिमी भागको निम्‍ति छ वटा फल्‍याक बनाउनू।

²³टाढ़ाको भागका कुनाहरूका निम्‍ति तैंले दुई वटा फल्‍याक बनाउनू।

²⁴ती तलदेखि माथिसम्‍म दोबर खप्‍टाइएका होऊन्, र यसरी ती एउटै मुन्‍द्रामा जोड़िऊन्‌। ती दुवै फल्‍याक यस्‍तै होऊन्‌।

²⁵त्‍यहाँ आठ वटा फल्‍याक होऊन्, र तिनका निम्‍ति चाँदीका सोह्र वटा आधार होऊन्‌। एउटा फल्‍याकको मुन्‍तिर दुई वटा आधार होऊन्‌।”

²⁶“तैंले बबुल काठका बारहरू बनाउनू— पवित्र वासस्‍थानका एकातिरका फल्‍याकहरूका निम्‍ति पाँच वटा बार,

²⁷र अर्कोतिरका फल्‍याकहरूका निम्‍ति पाँच वटा बार, र पश्‍चिमतिर टाढ़ाको भागका फल्‍याकहरूका निम्‍ति पाँच वटा बार।

²⁸फल्‍याकहरूका बीचमा भएको बारचाहिँ एक छेउदेखि अर्को छेउसम्‍म पुगोस्‌।

²⁹फल्‍याकहरू सुनले मोहोर्नू। बारहरू पक्रनका निम्‍ति सुनका मुन्‍द्राहरू बनाउनू। बारहरू पनि सुनले मोहोर्नू।”

³⁰“तँलाई पर्वतमा देखाएको नमूनाअनुसार पवित्र वासस्‍थान खड़ा गर्नू।”

³¹“अनि नीलो, बैजनी, रातो धागो र मसिनो गरी बाटेको सूती कपड़ाको एउटा छेक्‍ने पर्दा बनाउनू, र त्‍यसमा सिपालु शिल्‍पकारले बनाएका करूबहरू भएका होस्‌।

³²सुनले मोहोरिएका बबुल काठका चार वटा खम्‍बामा सुनका अङ्‌कुसेहरूले त्‍यो टाँग्‍नू। ती खम्‍बाहरू चार वटा चाँदीका आधारमाथि होऊन्‌।

³³तैंले त्‍यो छेक्‍ने पर्दा अङ्‌कुसेहरूबाट झुण्‍ड्याउनू र त्‍यसको पछाड़ि गवाहीको सन्‍दूक राख्‍नू। त्‍यस पर्दाले तिमीहरूका निम्‍ति पवित्रस्‍थानलाई महा-पवित्रस्‍थानबाट अलग गर्नेछ।

³⁴महा-पवित्रस्‍थानमा गवाहीको सन्‍दूकमाथि कृपा-आसन राख्‍नू।

³⁵छेक्‍ने पर्दाको बाहिरपट्टि चाहिँ पवित्र वासस्‍थानको उत्तरतिर टेबिल राख्‍नू, र पवित्र वासस्‍थानको दक्षिणतिर टेबिलको सामुन्‍ने सामदान राख्‍नू।”

³⁶“पालको ढोकाको निम्‍ति तैंले नीलो, बैजनी, रातो धागो र मसिनो गरी बाटेको सूती कपड़ाको, बुट्टा भर्नेको काम भएको एउटा पर्दा बनाउनू।

³⁷त्‍यस पर्दाको निम्‍ति बबुल काठका पाँच वटा खम्‍बा बनाउनू, र तिनलाई सुनले मोहोर्नू। तिनका अङ्‌कुसे सुनका होऊन्, र तिनका निम्‍ति काँसाका पाँच वटा आधार बनाउनू।”