Read Nepali New Revised Version, 2012 प्रस्‍थान 33 Bible Online

प्रस्‍थान 33 - Nepali New Revised Version, 2012 bible

प्रस्‍थान 33

¹तब परमप्रभुले मोशालाई भन्‍नुभयो, “मिश्रबाट ल्‍याएका यी मानिसहरूसँग त्‍यस देशमा जा, जसको विषयमा ‘तेरा सन्‍तानलाई दिनेछु’ भनेर मैले अब्राहाम, इसहाक र याकूबसित शपथ खाएको थिएँ।

²म तिमीहरूका अगिअगि एउटा दूत पठाउनेछु, र कनानी, एमोरी, हित्ती, परिज्‍जी, हिव्‍वी र यबूसीहरूलाई धपाउनेछु।

³दूध र मह बग्‍ने त्‍यो देशमा जाओ। तर तिमीहरू हठी मानिस हौ, यसकारण म तिमीहरूका बीचमा हिँड्‌नेछैनँ, नत्रता बाटैमा म तिमीहरूलाई नाश गरुँला।”

⁴जब मानिसहरूले यो नराम्रो समाचार सुने, तब तिनीहरूले अफसोस गरे, र कसैले आफ्‍ना गहनाहरू लगाएन।

⁵किनकि परमप्रभुले मोशालाई भन्‍नुभएको थियो, “इस्राएलीहरूलाई भन्, ‘तिमीहरू हठी मानिस हौ। म एक क्षणको निम्‍ति पनि तिमीहरूका बीचमा आएँ भने म तिमीहरूलाई भस्‍म पार्नेछु। अब तिमीहरूले आफ्‍ना गहनाहरू फुकाल, र तिमीहरूसित के गर्नुपर्ने हो, सो म विचार गरुँला’।”

⁶यसैले होरेब पर्वतमा इस्राएलीहरूले आफ्‍ना गहनाहरू फुकाले।

⁷मोशाले चाहिँ छाउनीदेखि बाहिर धेरै टाढ़ामा पाल टाँग्‍ने गर्थे। तिनले त्‍यसलाई “भेट हुने पाल” भन्‍थे। परमप्रभुसित भेट गर्न चाहने प्रत्‍येक व्‍यक्ति छाउनीको बाहिर भएको त्‍यही भेट हुने पालमा जान्‍थ्‍यो।

⁸जब मोशा निस्‍केर भेट हुने पालमा जान्‍थे, तब सबै मानिसहरू उठेर आफ्‍नो पालको ढोकामा खड़ा भई मोशा त्‍यस पालभित्र नपसुञ्‍जेलसम्‍म तिनीतिर नै हेरिरहन्‍थे।

⁹जब मोशा त्‍यस पालभित्र पस्‍थे तब बादलको खामो ओर्लेर पालको ढोकामा खड़ा रहन्‍थ्‍यो। तब परमप्रभु मोशासित कुरा गर्नुहुन्‍थ्‍यो।

¹⁰जब मानिसहरूले बादलको खामो पालको ढोकामा खड़ा भएको देख्‍तथे, तब तिनीहरू उठेर आ-आफ्‍नो पालको ढोकामा आराधना गर्थे।

¹¹परमप्रभु मोशासित यसरी आमने-सामने कुरा गर्नुहुन्‍थ्‍यो, जसरी कोही आफ्‍ना मित्रसित कुरा गर्दछ। तब मोशा फर्केर छाउनीमा आउँथे, तर तिनको जवान सहायक, नूनका छोरा यहोशू, त्‍यस पालबाट निस्‍कँदैनथे।

¹²अनि मोशाले परमप्रभुलाई भने, “तपाईंले मलाई ‘यी मानिसहरूलाई लिएर जा’ भन्‍नुहुन्‍छ, तर मसित को-को पठाउनुहुन्‍छ तपाईंले मलाई थाहा दिनुभएको छैन। तपाईंले भन्‍नुभएको छ, ‘म त तँलाई तेरो नाउँले नै चिन्‍छु: र तँमाथि मेरो निगाह भएको छ’।

¹³यदि तपाईंको निगाह ममाथि भएको छ भने, अब मलाई तपाईंको मार्ग देखाउनुहोस्, र म तपाईंलाई चिन्‍न सकूँ र तपाईंको दृष्‍टिमा निगाह पाइरहन सकूँ। यो जाति तपाईंकै हो भनी सम्‍झनुहोस्‌।”

¹⁴अनि परमप्रभुले भन्‍नुभयो, “मेरो उपस्‍थिति तँसँग जानेछ, र म तँलाई विश्राम दिनेछु।”

¹⁵तब मोशाले उहाँलाई भने, “यदि तपाईंको उपस्‍थिति हामीसित गएन भने हामीलाई यहाँबाट उता नलानुहोस्‌।

¹⁶तपाईं हामीसितै नगएसम्‍म म र तपाईंका यी मानिसहरूले तपाईंको निगाह पाएका छौं भनेर हामीले कसरी जान्‍ने? अरू के कुराले म र तपाईंका मानिसहरू पृथ्‍वीका सारा मानिसहरूदेखि भिन्‍नै हुन्‍छौं?”

¹⁷तब परमप्रभुले मोशालाई भन्‍नुभयो, “तैंले भनेकै कुरा म गर्नेछु, किनकि तैंले मेरो दृष्‍टिमा निगाह पाएको छस्, र मैले तँलाई नाउँले नै चिनेको छु।”

¹⁸तिनले भने, “अब मलाई तपाईंको महिमा देखाउनुहोस्‌।”

¹⁹उहाँले भन्‍नुभयो, “म तेरै सामुन्‍ने मेरो सारा श्रेष्‍ठता देखाउनेछु, र तेरै सामुन्‍ने ‘परमप्रभु’ नाउँको घोषणा गर्नेछु। जसलाई म अनुग्रह गर्न चाहन्‍छु त्‍यसलाई म अनुग्रह गर्नेछु। जसलाई म कृपा देखाउन चाहन्‍छु, त्‍यसलाई म कृपा देखाउनेछु।”

²⁰अनि उहाँले भन्‍नुभयो, “तर तैंले मेरो अनुहार हेर्न सक्दैनस्, किनकि मेरो अनुहार हेरेर मानिस जीवितै रहन सक्‍दैन।”

²¹तब परमप्रभुले भन्‍नुभयो, “मेरो छेउमा एउटा ठाउँ छ, जहाँ तँ एउटा चट्टानमा खड़ा हो।

²²मेरो महिमा त्‍यहाँबाट भएर जाँदा तँलाई म त्‍यस चट्टानको धाँदोमा राख्‍नेछु, र म त्‍यहाँबाट भएर नजाउञ्‍जेल तँलाई मेरै हातले छोपिराख्‍नेछु।

²³त्‍यसपछि म मेरो हात उठाउनेछु, र तैंले मेरो पछिको भाग देख्‍नेछस्, तर मेरो अनुहारचाहिँ देखिनेछैन।”