Read Nepali New Revised Version, 2012 प्रस्‍थान 38 Bible Online

प्रस्‍थान 38 - Nepali New Revised Version, 2012 bible

प्रस्‍थान 38

¹तिनले बबुल काठको होम-वेदी बनाए। त्‍यसको लमाइ पाँच हात, चौड़ाइ पाँच हात, वर्गाकार, र त्‍यसको उचाइ तीन हातको थियो।

²त्‍यसका चारै कुनामा तिनले सीङहरू बनाए। ती सीङ र वेदी त्‍यही एउटै टुक्राका थिए, र तिनले त्‍यो काँसाले मोहोरे।

³तिनले वेदीका सबै पात्रहरू— भाँड़ाहरू, बेल्‍चाहरू, छर्कने बाटाहरू, मासु उठाउने काँटाहरू र आगो राख्‍ने पात्रहरू— काँसाका बनाए।

⁴वेदीको निम्‍ति त्‍यसको मुन्‍तिर चारैतिर बिटमुनि त्‍यसको बीचसम्‍मै पुग्‍ने काँसाका जालीको एउटा झिँजा तिनले बनाए।

⁵त्‍यस काँसाको झिँजाका चार कुनाका निम्‍ति डन्‍डाहरूको घर हुनलाई तिनले चार वटा मुन्‍द्रा ढाले।

⁶डण्‍डाहरू बबुल काठका बनाएर तिनले ती काँसाले मोहोरे।

⁷ती डन्‍डाहरू वेदीका किनाराका मुन्‍द्राहरूमा त्‍यो बोक्‍नलाई हाले। तिनले ती फल्‍याकबाट त्‍यो खोक्रो बनाए।

⁸तिनले भेट हुने पालको ढोकामा सेवा गर्ने स्‍त्रीहरूका ऐनाबाट काँसाका धुने भाँड़ा र त्‍यसका खुट्टा बनाए।

⁹तब तिनले चोक बनाए। त्‍यसको दक्षिण भागको लमाइ एक सय हातको थियो, र त्‍यसको मसिनो गरी बाटेको सूती कपड़ाका पर्दाहरू थिए।

¹⁰तिनका खम्‍बाहरू बीस वटा र तिनका आधारहरू पनि बीस वटै काँसाका थिए। खम्‍बाका अङ्‌कुसेहरू र तिनका फित्ताहरूचाहिँ चाँदीका थिए।

¹¹उत्तरका भागको निम्‍ति पनि सय हातका पर्दाहरू, र तिनका खम्‍बाहरू बीस वटा र तिनका आधारहरू पनि बीस वटै थिए, सबै काँसाका। तर खम्‍बाहरूका अङ्‌कुसे र फित्ताहरूचाहिँ चाँदीका थिए।

¹²पश्‍चिमतर्फको निम्‍ति पचास हातका पर्दाहरू थिए। तिनका खम्‍बाहरू दश वटा र आधारहरू दश वटै थिए, तर खम्‍बाहरूका अङ्‌कुसे र फित्ताहरू चाँदीका थिए।

¹³पूर्व वा सूर्योदयतर्फको चौड़ाइ पचास हातको थियो।

¹⁴मूल ढोकाको एकातर्फको निम्‍ति पन्‍ध्र हातका पर्दाहरू थिए। तिनका खम्‍बाहरू तीन वटा र आधारहरू पनि तीन वटै थिए।

¹⁵अर्को तर्फको निम्‍ति यस्‍तै थियो। चोकको ढोकाको दायाँ र बायाँ पन्‍ध्र-पन्‍ध्र हातका पर्दाहरू थिए। तिनका खम्‍बाहरू तीन वटा र तिनका आधारहरू तीन वटै थिए।

¹⁶चोकका चारैपट्टि सबै पर्दाहरू मसिनो गरी बाटेका सूती कपड़ाका थिए।

¹⁷खम्‍बाका आधारहरू काँसाका थिए, तर खम्‍बाका अङ्‌कुसे र फित्ताहरूचाहिँ चाँदीका थिए। तिनका टुप्‍पाहरू चाँदीले मोहोरिएका थिए। चोकका सबै खम्‍बाहरूका फित्ताहरू चाँदीका थिए।

¹⁸चोकको मूल ढोकाको पर्दा बुट्टा हाल्‍नेको काम भएको नीलो, बैजनी, रातो धागो र मसिनो गरी बाटेको सूती कपड़ाको बनिएको थियो। त्‍यसको लमाइ बीस हात र उचाइ चोकका पर्दाको बराबर पाँच हातको थियो।

¹⁹तिनका खम्‍बाहरू चार वटा र तिनका काँसाका आधारहरू चार वटै थिए। तिनका अङ्‌कुसे र फित्ताहरू चाँदीका थिए, र तिनका टुप्‍पाहरू पनि चाँदीले मोहोरिएका थिए।

²⁰पवित्र वासस्‍थान र त्‍यसको वरिपरिको चोकका सबै कीलाहरू काँसाका थिए।

²¹पवित्र वासस्‍थान, अर्थात्‌ गवाहीका मण्‍डपको निम्‍ति चलाइएका सामानको जुन गन्‍ती मोशाको आज्ञाबमोजिम हारून पूजाहारीका छोरा ईतामारद्वारा लेवीहरूले गरेका थिए, त्‍यसको वर्णन यही हो।

²²(परमप्रभुले मोशालाई आज्ञा गर्नुभएबमोजिम यहूदाको कुलका हूरका नाति, ऊरीका छोरा बजलेलले सबै थोक बनाए।

²³तिनीसित दानको कुलका अहीसामाकका छोरा ओहोलीआब थिए, जो शिल्‍पकारको काम गर्न, आकारहरू बनाउन, र नीलो, बैजनी, रातो धागो र मसिनो सूती कपड़ामा बुट्टा भर्न सिपालु थिए।)

²⁴पवित्रस्‍थानका सबै कामका निम्‍ति डोलाउने बलिको जम्‍मै सुन, पवित्रस्‍थानको शेकेलको [1] हिसाबअनुसार २९ तोड़ा र ७३० शेकेलको थियो।

²⁵समुदायमा गन्‍ती भएका मानिसहरूका चाँदी पवित्रस्‍थानको शेकेलको हिसाबअनुसार एक सय तोड़ा र सत्र सय पचहत्तर शेकेलको [2] थियो—

²⁶जति जना बीस वर्ष र त्‍यसभन्‍दा बढ़ी उमेरका मानिसहरूमा गनिएका थिए, ती छ लाख तीन हजार पाँच सय पचास मानिसहरू हरेकबाट एक-एक बेका, अर्थात्‌ पवित्रस्‍थानको शेकेलको हिसाबले आधा शेकेल थियो।

²⁷एक सय तोड़ाचाहिँ पवित्रस्‍थान र पर्दाका आधारहरू ढाल्‍नका निम्‍ति थियो। सब आधारहरूमा सय तोड़ा थियो— एक आधारको निम्‍ति एक तोड़ा।

²⁸ती सत्र सय पचहत्तर शेकेलबाट तिनीहरूले टुप्‍पाहरूका निम्‍ति अङ्‌कुसे बनाए, तिनका टुप्‍पाहरू मोहोरे र तिनका निम्‍ति फित्ताहरू बनाए।

²⁹डोलाइने बलिको काँसो सत्तरी तोड़ा र दुई हजार चार सय शेकेलको [3] थियो।

³⁰तिनैबाट तिनीहरूले भेट हुने पालको ढोकाको निम्‍ति आधारहरू, काँसाको वेदी र त्‍यसका काँसाको झिँजा र वेदीका सबै सामान,

³¹र चारैतर्फको चोकका आधारहरू र चोकको मूल ढोकाका आधारहरू, र पवित्र वासस्‍थानका सबै कीलाहरू र चोकका चारैतर्फका सबै कीलाहरू बनाए।