Read Nepali New Revised Version, 2012 अय्‍यूब 12 Bible Online

अय्‍यूब 12 - Nepali New Revised Version, 2012 bible

अय्‍यूब 12

¹तब अय्‍यूबले जवाफ दिए:

²“निस्‍सन्‍देह तपाईंहरू मानिस हुनुहुन्‍छ, र सम्‍पूर्ण बुद्धि तपाईंहरूसितै मर्नेछ!

³तर तपाईंहरूको जस्‍तो मेरो पनि मन छ, केही कुरामा पनि म तपाईंहरूभन्‍दा कम छैनँ। यस्‍ता कुरा कसले जान्‍दैन र?

⁴“तापनि म मेरा मित्रहरूको निम्‍ति एउटा हाँसोको पात्र भएको छु, यद्यपि मैले परमेश्‍वरलाई पुकारें, र उहाँले उत्तर दिनुभयो— निर्दोष र निरपराध भए पनि हाँसोको पात्र।

⁵सुखमा बस्‍ने मानिसहरू दुर्भाग्‍यलाई घृणा गर्दछन्‌। चिप्‍लन लागेका पाउजस्‍तै तिनीहरू हुन्‍छन्‌।

⁶लूटपीट गर्नेहरूका पालमा खलबल हुँदैन, र परमेश्‍वरलाई रीस उठाउनेहरूचाहिँ सुरक्षित रहन्‍छन्‌— तिनीहरू जसले आफ्‍ना देवहरूलाई आफ्‍ना हातमा बोक्‍छन्‌।

⁷“तर गएर पशुलाई सोध्‍नुहोस्‌ र तिनीहरूले तपाईंलाई सिकाउनेछन्, अथवा आकाशका चराहरूलाई, अनि उनीहरूले तपाईंलाई बताउनेछन्,

⁸अथवा पृथ्‍वीसित बोल्‍नुहोस्, र त्‍यसले तपाईंलाई सिकाउनेछ, वा समुद्रका माछालाई तपाईंलाई सिकाउन दिनुहोस्‌।

⁹परमेश्‍वरको आफ्‍नै हातले यी सबै गर्नुभएको हो भनी यी सबैमध्‍येबाट कसले जान्‍दैन र?

¹⁰जीवितहरू सबैका प्राण, सबै मानिस-जातिका आत्‍मा परमेश्‍वरकै हातमा छ।

¹¹के जिब्रोले खानेकुराको स्‍वाद लिएझैँ बोलेका वचन कानले जाँच गर्दैन र?

¹²के पाकाहरूका बीचमा बुद्धि पाइँदैन र? के लामो आयुले समझ ल्‍याउँदैन?

¹³“बुद्धि र पराक्रम परमेश्‍वर कै हुन्, उहाँसँगै सल्‍लाह र समझ छन्‌।

¹⁴उहाँले भत्‍काउनुभयो भने त्‍यो पुनर्निर्माण हुँदैन, उहाँले कैद गर्नुभएको मानिसको छुटकारा हुँदैन।

¹⁵उहाँले पानी रोक्‍नुभयो भने खड़ेरी पर्छ, उहाँले त्‍यो छोड़िदिनुभयो भने त्‍यसले भूमिलाई सर्वनाश पार्छ।

¹⁶सामर्थ्‍य र विजय उहाँ कै हुन्, धोका दिने र धोका खाने दुवै उहाँकै हुन्‌।

¹⁷उहाँले सल्‍लाहकारहरूलाई निर्बुद्धि तुल्‍याउनुहुन्‍छ, र न्‍यायाधीशहरूलाई मूर्ख बनाइदिनुहुन्‍छ।

¹⁸राजाहरूले लगाइदिएका बन्‍धनलाई उहाँले फुकाल्‍नुहुन्‍छ, अनि तिनीहरूका कम्‍मरमा अधिकारको पटुका लगाइदिनुहुन्‍छ।

¹⁹उहाँले पूजाहारीहरूलाई नाङ्गो पारी डोर्‍याउनुहुन्‍छ, र चिरकालदेखि काम गर्ने मानिसहरूलाई उहाँले खारिज गरिदिनुहुन्‍छ।

²⁰भर पर्न सक्‍ने सल्‍लाहकारलाई उहाँले चूप तुल्‍याउनुहुन्‍छ, वृद्ध मानिसको बुद्धि उहाँले रद्द गर्नुहुन्‍छ।

²¹उहाँले शासकहरूमाथि निन्‍दा खन्‍याउनुहुन्‍छ, र शक्तिशालीलाई नि:शस्‍त्र पार्नुहुन्‍छ।

²²उहाँले अन्‍धकारका गहिरा रहस्‍यहरू प्रकट गर्नुहुन्‍छ, र निस्‍पट्ट अँध्‍यारोमा उहाँले प्रकाश ल्‍याउनुहुन्‍छ।

²³उहाँले जाति-जातिहरूलाई महान्‌ बनाउनुहुन्‍छ र तिनीहरूलाई नाश गर्नुहुन्‍छ उहाँले जातिहरूलाई विस्‍तार गर्नुहुन्‍छ र तिनीहरूलाई तितरबितर पार्नुहुन्‍छ।

²⁴उहाँले पृथ्‍वीका शासकहरूका बुद्धि खोस्‍नुहुन्‍छ, र बाटो नभएको उजाड़-स्‍थानमा यताउता बरालिन तिनीहरूलाई छोड़िदिनुहुन्‍छ।

²⁵उज्‍यालोविना तिनीहरू अन्‍धकारमा छामछाम-छुमछुम गरिहिँड्‌छन्, र मताहा मानिसझैँ धरमरिँदै हिँड्‌नलाई उहाँले तिनीहरूलाई त्‍यागिदिनुहुन्‍छ।