Read Nepali New Revised Version, 2012 अय्‍यूब 14 Bible Online

अय्‍यूब 14 - Nepali New Revised Version, 2012 bible

अय्‍यूब 14

¹“स्‍त्रीबाट जन्‍मेको मानिस अल्‍पआयुको र अशान्‍तिले भरिएको हुन्‍छ,

²त्‍यो फूलझैँ फक्रन्‍छ र ओइलाइहाल्‍छ। त्‍यो क्षणिक छायाजस्‍तै हराइहाल्‍छ, रहँदैन।

³के तपाईं यस्‍तो प्राणीमाथि दृष्‍टि राख्‍नुहुन्‍छ? के त्‍यसलाई तपाईं आफ्‍नो सामुन्‍ने न्‍यायको लागि ल्‍याउनुहुन्‍छ?

⁴अशुद्धबाट कसले शुद्ध निकाल्‍न सक्‍छ? कसैले सक्‍दैन!

⁵मानिसको जीवनका दिनहरू तोकिएका छन्, अनि त्‍यसका महिनाको संख्‍या तपाईंले निर्धारण गर्नुभएको छ। र तपाईंले त्‍यसको सीमा ठहराउनुभएको छ, त्‍यसले त्‍यो नाघ्न सक्‍दैन।

⁶यसकारण त्‍यसबाट तपाईं आफ्‍नो मुख फर्काउनुहोस्, र ज्‍यालादार मजदूरले जस्‍तै आफ्‍नो समय पूरा नगरेसम्‍म त्‍यसलाई एकलै छोड़िदिनुहोस्‌।

⁷रूखको लागि आशा हुन्‍छ: काटियो भने त्‍यो फेरि पलाउने हुन्‍छ, र त्‍यसमा नयाँ पालुवा आउन थामिँदैन।

⁸त्‍यसका जराहरू भूइँमा छिपिसके र त्‍यसको ठुटा जमिनभित्र मरे तापनि

⁹पानीको गन्‍ध पाएपछि, त्‍यो फेरि पलाउन थाल्‍छ, र कलिलो बोटझैँ त्‍यो पलाएर आउँछ।

¹⁰तर मान्‍छे त मरिहाल्‍छ, र लोप हुन्‍छ। मानिस आफ्‍नो आखिरी अवस्‍थामा आइपुग्‍छ, र त्‍यो रहँदैन।

¹¹जसरी समुद्रको पानी बिस्‍तार-बिस्‍तार घट्‌दैजान्‍छ, अथवा जसरी नदी घटेर सुकिहाल्‍छ,

¹²त्‍यसरी नै मरणशील मानिस ढल्‍छ, र कहिल्‍यै उठ्‌दैन, जबसम्‍म आकाशहरू मेटिदैँनन्, मानिसहरू ब्‍यूँझनेछैनन्‌ अथवा आफ्‍ना निद्राबाट तिनीहरू फेरि कहिल्‍यै उठ्‌नेछैनन्‌।

¹³“तपाईंले मलाई चिहानमा [1] लुकाउनुभए, अनि तपाईंको रीस नहटेसम्‍म मलाई गुप्‍तमा राख्‍नुभए त, तपाईंले मेरो समयको सीमा तोकिदिएर, मलाई सम्‍झनु भए त हुनेथियो!

¹⁴के मानिस मरेपछि ऊ फेरि जिउँछ? मेरो कठिन सेवा जतिसुकै लामो भए पनि मेरो नवीकरणको निम्‍ति म प्रतीक्षा गर्नेछु।

¹⁵तपाईंले मलाई बोलाउनुहुनेछ। म तपाईंको जवाफ दिनेछु। आफूले सृजनुभएको प्राणीलाई हेर्न तपाईंले इच्‍छा गर्नुहुनेछ।

¹⁶निश्‍चय तपाईंले मेरा सबै चाल हेर्नुहुनेछ तर तपाईं मेरो पापको लेखा राख्‍नुहुन्‍न।

¹⁷मेरो हरेक कसूर तपाईंको थैलोमा सञ्‍चय गरिएको हुनेछ। तपाईंले मेरो अधर्म छोपेर राख्‍नुहुनेछ।

¹⁸“तर पहाड़ खिइएर चूर्ण भएझैँ र चट्टान त्‍यसको ठाउँबाट हटाइएझैँ,

¹⁹पानीले ढुङ्गाहरूलाई खियाएझैँ, तथा वर्षाको पानीले भूइँको माटोलाई खाएझैँ, तपाईंले मानिसको आशा टुटाइदिनुभएको छ।

²⁰आखिरमा तपाईंले त्‍यसलाई जित्‍नुहुन्‍छ, र त्‍यो रहँदैरहँदैन, त्‍यसको अनुहारको रूप तपाईंले बदल्‍नुहुन्‍छ। र त्‍यो तपाईंको दृष्‍टिबाट बहिष्‍कृत हुन्‍छ।

²¹त्‍यसका छोराहरू मान पाएर आदरणीय बने तापनि, त्‍यसले चाहिँ त्‍यो थाहा पाउनेछैन, तिनीहरू होच्‍याइए भने पनि त्‍यसलाई त्‍यो थाहा हुनेछैन।

²²त्‍यसले केवल आफ्‍नै शरीरको कष्‍ट मात्र थाहा गर्छ, र त्‍यसले आफ्‍नै निम्‍ति मात्र विलाप गर्छ।”