Read Nepali New Revised Version, 2012 अय्‍यूब 18 Bible Online

अय्‍यूब 18 - Nepali New Revised Version, 2012 bible

अय्‍यूब 18

¹तब बिल्‍दद शुहीले यसो भनेर जवाफ दिए:

²“यी भाषणहरूलाई तपाईंले कहिले बन्‍द गर्नु हुन्‍छ? समझदार हुनुहोस्, र हामी कुरा गर्न सक्‍नेछौं।

³हामीलाई किन पशुझैँ व्‍यवहार गरिन्‍छ? र तपाईंको विचारमा हामी मूर्खहरू ठहराइन्‍छौं?

⁴तपाईं जसले रीसमा आफूलाई छिया-छिया पार्नुहुन्‍छ के तपाईंको खातिर पृथ्‍वीलाई त्‍यागिदिने? अथवा पहराहरू तिनीहरूका ठाउँबाट हटाउनु?

⁵“दुष्‍टको बत्ती निभाइन्‍छ, त्‍यसको आगोबाट फेरि कुनै ज्‍वाला निस्‍कँदैन।

⁶त्‍यसको पालमा ज्‍योति अँध्‍यारो हुन्‍छ, त्‍यसको बत्ती निभ्‍छ।

⁷त्‍यसको पाइलाको शक्ति कमजोर हुन्‍छ। त्‍यसको आफ्‍नै युक्तिले त्‍यसलाई लड़ाउँछ।

⁸त्‍यसका खुट्टाले त्‍यसलाई पासोमा धकेल्‍छ, र त्‍यो जालमा भौँतारिन्‍छ।

⁹त्‍यसका खुट्टा पासोमा जेलिन्‍छ, पासोमा डोरीले त्‍यसलाई कसेर बाँध्‍छ।

¹⁰त्‍यसको लागि गलपासो भूइँमा लुकाइएको छ। र जाल त्‍यसको बाटोमा तेर्सिएको हुन्‍छ।

¹¹डरले त्‍यसलाई चारैतिर घेर्छ, र कदम-कदममा त्‍यसलाई खेद्‌छ।

¹²विपत्ति त्‍यसको निम्‍ति भोकाएको हुन्‍छ, त्‍यो लड्‌दा दुर्घटनाले त्‍यसलाई पर्खिरहेको हुन्‍छ।

¹³त्‍यसले त्‍यसको छालाको अंशहरू खाइहाल्‍छ, मृत्‍युको पहिलो सन्‍तानले त्‍यसको हात-खुट्टा खान्‍छ।

¹⁴त्‍यसको घरको सुरक्षाबाट पनि त्‍यसलाई तानेर निकाल्‍छ, र त्‍यसलाई त्रासको राजाकहाँ लैजान्‍छ।

¹⁵त्‍यसको पालमा आगोले वास गर्छ, त्‍यसको घरमा जलिरहेको गन्‍धक छर्किएको छ।

¹⁶त्‍यसका तलतिरका जराहरू सुक्‍छन्, त्‍यसका माथिका हाँगाहरू ओइलाउँछन्‌।

¹⁷पृथ्‍वीबाट त्‍यसको सम्‍झना लोप हुन्‍छ, संसारमा त्‍यसको नाउँनिशानै रहनेछैन।

¹⁸त्‍यो उज्‍यालोबाट अँध्‍यारोमा धपाइन्‍छ, र संसारबाट निकालिन्‍छ।

¹⁹आफ्‍ना मानिसहरूका बीचमा त्‍यसको आफ्‍नो कुनै सन्‍तान छैन। आफू एक पल्‍ट बसेको ठाउँमा कोही बाँचेका हुनेछैनन्‌।

²⁰पश्‍चिमका मानिसहरू त्‍यसको दशा सुनेर छक्‍क पर्नेछन्, पूर्वका मानिसहरू डरले काम्‍नेछन्‌।

²¹दुष्‍ट काम गर्नेहरूको घर यस्‍तै हुनेछ, परमेश्‍वरको वास्‍ता नगर्नेहरूको घर यस्‍तै हुनेछ।”