Read Nepali New Revised Version, 2012 अय्‍यूब 24 Bible Online

अय्‍यूब 24 - Nepali New Revised Version, 2012 bible

अय्‍यूब 24

¹“सर्वशक्तिमान्‌ले दण्‍डको दिन किन ठहराउनुहुन्‍न? उहाँलाई चिन्‍नेहरूले किन त्‍यस्‍ता दिनहरूलाई व्‍यर्थमा खोजी गर्नुपर्छ?

²मानिसहरू साँधसिमानाको ढुङ्गा हटाउँछन्, तिनीहरूले चोरेको भेड़ाका बगाल तिनीहरू चराउँछन्‌।

³तिनीहरू टुहुरा-टुहुरीहरूको गधा धपाएर लान्‍छन्, र विधवाको गोरु बन्‍धकमा लान्‍छन्‌।

⁴तिनीहरू गरीबहरूलाई आफ्‍नो बाटोदेखि धक्‍का दिँदै हिँड्‌छन्, तिनीहरू कङ्गालीहरूलाई जबरदस्‍ती लुक्‍ने ठाउँमा पठाउँछन्‌।

⁵आहारको लागि वन-गधा वनमा घुमफिर गरेझैँ गरीबहरू खाना खोज्‍न जान्‍छन्, उजाड़-स्‍थानले तिनीहरूका छोराछोरीहरूको लागि भोजन जुटाउँछ।

⁶गरीबहरू खेतमा सुक्‍खा अन्‍न टिप्‍छन्, दुष्‍ट मानिसको दाखबारीबाट तिनीहरू अङ्‌गूर बटुल्‍छन्‌।

⁷लुगा नभएको हुनाले तिनीहरू नाङ्गो भएर रात बिताउँछन्, जाड़ोमा ढाक्‍नलाई तिनीहरूको केही हुँदैन।

⁸पहाड़बाट आएको वृष्‍टिले तिनीहरू निथ्रुक्‍क भिज्‍छन्, शरणस्‍थान नभएको हुनाले चट्टाननेर तिनीहरू थुप्रन्‍छन्‌।

⁹बुबा नभएका नानीहरूलाई दुष्‍टहरूले आमाको काखबाट खोसेर लान्‍छन्, र गरीब मानिसको बालकलाई तिनीहरू ऋणको सट्टा लैजान्‍छन्‌।

¹⁰लुगा नभएका हुनाले तिनीहरू नाङ्गै जान्‍छन्‌। तिनीहरू आफ्‍ना अन्‍नका बिटा बोक्‍छन्‌ तर पनि भोकै हुन्‍छन्‌।

¹¹तिनीहरू कौसीमा जैतून पेल्‍छन्, तिनीहरू कोल ता पेल्‍छन्‌ तापनि तिर्खाउँछन्‌।

¹²सहरबाट मर्न लागेको मानिसको आर्तनाद निस्‍कन्‍छ, र चोट लागेको मानिस सहायताको लागि कराउँछ, तर पनि परमेश्‍वर भूल गरेको दोष लाउनुहुन्‍न।

¹³“कोही मानिसहरू ज्‍योतिको विरुद्धमा विद्रोह गर्छन्, तिनीहरू त्‍यसको विषयमा केही जान्‍दैनन्‌ र त्‍यसको ज्‍योतिमा हिँड्‌दैनन्‌।

¹⁴हत्‍याराचाहिँ साँझ परेपछि उठेर गरीब र आवश्‍यकतामा परेकाहरूलाई मार्छ र रातीचाहिँ त्‍यसले चोरले झैँ लूटपीट गर्छ।

¹⁵व्‍यभिचारीले उत्‍सुकतासित साँझको प्रतीक्षा गर्छ, त्‍यसलाई कसैले नदेखोस्‌ भनेर आफ्‍नो भेष त्‍यसले बद्‌लन्‍छ।

¹⁶राती चोर घर फोरेर पस्‍छन्, तर दिनमा तिनीहरू लुक्‍छन्‌ र उज्‍यालोदेखि अलग बस्‍छन्‌।

¹⁷तिनीहरू सबैका निम्‍ति निस्‍पट्ट अँध्‍यारोचाहिँ तिनीहरूको बिहानी हो, तिनीहरूले अन्‍धकारको त्रासलाई मन पराउँछन्‌।

¹⁸“त्‍यस्‍ता मानिसहरू पानीको सतहमा फिँज जस्‍तै हुन्, तिनीहरूका खेतले देशभरि नै श्राप पाएको हुन्‍छ। यसरी कोही पनि दाखबारीमा जाँदैन।

¹⁹जसरी पग्‍लेको हिउँलाई खड़ेरी र तापले सुकाउँछ, त्‍यसरी नै चिहानले [1] पापीलाई विनाश पार्छ।

²⁰कोखले त्‍यसलाई बिसर्नेछ, कीराले त्‍यसलाई खाइहाल्‍छ, दुष्‍ट मानिसहरूको सम्‍झना गरिनेछैन, र तिनीहरू रूखझैँ भाँचिनेछन्‌।

²¹तिनीहरूले बाँझी र बालक नभएकी स्‍त्रीलाई अत्‍याचार गर्छन्‌ र विधवालाई कुनै दया देखाउँदैनन्‌।

²²परमेश्‍वरले आफ्‍नो सामर्थ्‍यमा शक्तिशालीलाई पनि नाश गर्नुहुन्‍छ, तिनीहरू उठे तापनि तिनीहरूको जीवनको आशा हुँदैन।

²³परमेश्‍वरले तिनीहरूलाई सुरक्षाको अभासमा रहन दिनुभए तापनि, उहाँले हरसमय तिनीहरूको चालमाथि आफ्‍नो नजर राख्‍नुहुन्‍छ।

²⁴केही क्षणको निम्‍ति दुष्‍ट मानिस उचालिन्‍छ, त्‍यसपछि त्‍यो नाश हुन्‍छ, अरूहरूलाई झैँ त्‍यसलाई तल झारिन्‍छ र जम्‍मा गरिन्‍छ र काटेर राखेको अन्‍नको बालाझैँ त्‍यो ओइलाइहाल्‍छ।

²⁵“यदि यो होइन भने, कसले मलाई झूटा ठहराउन सक्‍छ र? मेरा वचन निरर्थक भनी कसैले प्रमाण गर्न सक्‍छ र?”