Read Nepali New Revised Version, 2012 अय्‍यूब 27 Bible Online

अय्‍यूब 27 - Nepali New Revised Version, 2012 bible

अय्‍यूब 27

¹तब अय्‍यूबले आफ्‍नो बहस फेरि सुरु गरे:

²“परमेश्‍वर जीवित हुनुभए झैँ जसले मेरो इन्‍साफ गर्नलाई इन्‍कार गर्नुभयो, सर्वशक्तिमान्‌को नाउँमा, जसले मेरो मन तीतो बनाइदिनुभयो।

³मेरो शरीरमा प्राण रहुञ्‍जेल, र परमेश्‍वरको सास मेरो नाकमा रहुञ्‍जेल,

⁴कुनै पनि असत्‍य वचन मेरो मुखबाट निस्‍कनेछैन, अनि मेरो जिब्रोले कुनै झूट बोल्‍नेछैन।

⁵तपाईंहरू ठीक हुनुहुन्‍छ भनी म कहिल्‍यै स्‍वीकार गर्ने छैनँ, म नमरुञ्‍जेल म आफ्‍नो ईमान्‍दारीलाई अस्‍वीकार गर्ने छैनँ।

⁶म ठीकै छु भन्‍ने मेरो दाबीलाई म कायम राख्‍नेछु, म बाँचुञ्‍जेल मेरो विवेकले मलाई दोष लगाउनेछैन।

⁷“मेरा शत्रुहरू दुष्‍टझैँ होऊन्, मेरा विरोधीहरू अन्‍यायीजस्‍तै।

⁸किनकि ईश्‍वरहीन मानिस नाश हुँदा त्‍यसको के आशा हुन्‍छ र जब परमेश्‍वरले त्‍यसको प्राण लिइहाल्‍नुहुन्‍छ?

⁹जब दु:ख त्‍यसमाथि आइलाग्‍छ, के परमेश्‍वरले त्‍यसको पुकारा सुन्‍नुहुन्‍छ?

¹⁰के त्‍यसले सर्वशक्तिमान्‌बाट आनन्‍द पाउँछ? र हर समय उहाँको नाउँको पुकारा गर्छ र?

¹¹परमेश्‍वरको शक्तिको बारेमा म तपाईंहरूलाई सिकाउनेछु, सर्वशक्तिमान्‌को बाटोलाई म लुकाउनेछैनँ।

¹²तपाईंहरू सबैले यी कुरा देख्‍नुभएको छ, तपाईंहरू यस्‍ता व्‍यर्थका कुरा किन गर्नुहुन्‍छ?

¹³दुष्‍टको निम्‍ति परमेश्‍वरले ठहराउनुभएको भाग यही हो, निष्‍ठुर मानिसको इनाम सर्वशक्तिमान्‌बाट यही हो।

¹⁴त्‍यसका धेरै छोराछोरीहरू भए तापनि तिनीहरू तरवारले मारिनेछन्‌ र त्‍यसका सन्‍तानहरू भोकै रहनेछन्‌।

¹⁵बाँचेकाहरू रूढ़ीले मरेर चिहानमा लगिनेछन्‌ अनि तिनीहरूका विधवा तिनीहरूका निम्‍ति रुनेछैन।

¹⁶त्‍यसले कसिङ्गरसरह अनगन्‍ती धन-सम्‍पत्ति थुपारे तापनि र थाक-थाक लुगाहरू जम्‍मा गरे तापनि,

¹⁷ती त्‍यसले जम्‍मा त गर्ला, तर धर्मीहरूले ती लगाउनेछन्‌ र त्‍यसका धन-सम्‍पत्ति निर्दोष मानिसले बाँड्‌नेछन्‌।

¹⁸त्‍यसले बनाएको घर पुतलीको गुँड़जस्‍तै कमजोर हुन्‍छ अथवा पहरेदारको टौवाजस्‍तै हुन्‍छ।

¹⁹त्‍यो धनी भएर सुत्‍ला तर अब उसो त्‍यस्‍तो हुनेछैन त्‍यसले आँखा खोल्‍दा ती सबै गइहालेको हुन्‍छ।

²⁰विनाश भलझैँ त्‍यसमाथि आइलाग्‍नेछ र आँधीबेहरीले त्‍यसलाई राती उड़ाएर लैजानेछ।

²¹पूर्वको बतासले त्‍यसलाई उड़ाएर लैजानेछ र त्‍यसको नाउँ निशानै रहनेछैन बतासले त्‍यसलाई त्‍यसको घरबाट टाढ़ा उड़ाई लैजानेछ।

²²निर्दयतासाथ त्‍यो त्‍यसमाथि आइलाग्‍नेछ, जसै त्‍यो त्‍यसको शक्तिबाट भाग्‍नेछ।

²³त्‍यसको पतनमा ताली बजाएको आवाज र त्‍यसको चारैतिर खिसीको सोर हुनेछन्‌।