Read Nepali New Revised Version, 2012 अय्‍यूब 3 Bible Online

अय्‍यूब 3 - Nepali New Revised Version, 2012 bible

अय्‍यूब 3

¹तब अय्‍यूबले आफ्‍नो मुख खोलेर, आफ्‍नो जन्‍मेको दिनलाई धिक्‍कार्न लागे।

²अनि तिनले भने:

³“धिक्‍कार होस्, म जन्‍मेको दिनलाई, ‘एउटा बालकको जन्‍म भयो’ भनिएको रात।

⁴त्‍यो दिन अन्‍धकारमा परिवर्तन होस्‌। स्‍वर्गबाट परमेश्‍वरले त्‍यसको वास्‍ता नगरून्, ज्‍योति त्‍यसमाथि नचम्‍कोस्‌।

⁵अन्‍धकार र मृत्‍युको छायाले त्‍यो रातलाई छोपोस्‌। बादलले त्‍यस दिनलाई ढाकोस्‌। त्‍यसको उज्‍यालोलाई अन्‍धकारले निभाइदेओस्‌।

⁶निस्‍पट्ट अँध्‍यारोले त्‍यस रातलाई निलोस्, वर्षका दिनहरूमा त्‍यस रातको गन्‍ती नहोस्‌। महिनाको गन्‍तीमा त्‍यो आउन नपाओस्‌।

⁷त्‍यो रात सदासर्वदाको निम्‍ति बाँझो रहोस्, त्‍यसमा कुनै रमाहटको सोर नसुनिओस्‌।

⁸जसले दिनहरूलाई सराप्‍छ त्यस दिनलाई सरापोस्‌ जो लिव्‍यातन्‌लाई उठाउन तयार छ।

⁹त्‍यसको बिहानीको कुनै ताराले प्रकाश नदेओस्‌। बिहानको उज्‍यालो त्‍यसले व्‍यर्थमा प्रतीक्षा गरिरहनुपरोस्‌। त्‍यस दिनले उषाको प्रथम किरणलाई देख्‍नै नपाओस्‌।

¹⁰किनभने कष्‍ट मेरो आँखाबाट छल्‍नलाई मलाई जन्‍माउने गर्भको ढोका त्‍यसले थुनेन,

¹¹“म जन्‍मने बित्तिकै किन खतम भइनँ? गर्भबाट निस्‍कनासाथ म किन मरिनँ?

¹²मलाई ग्रहण गर्नलाई काख र मेरो स्‍याहार गर्न स्‍तनहरू किन थिए?”

¹³त्‍यसो हुँदो हो ता म शान्‍तिसित शून्‍य चिहानमा पड़िरहनेथिएँ, म मृत्‍युको निद्रामा सुतिरहनेथिएँ, र विश्राममा हुनेथिएँ,

¹⁴संसारका राजा र सल्‍लाहकारहरूका साथमा, जसले आफ्‍नो लागि स्‍थानहरू बनाए जुनहरू आज ध्‍वंस बनिसकेका छन्,

¹⁵शासकहरूसित जोसँग सुन थियो, जसले आफ्‍ना घरहरू चाँदीले भरे।

¹⁶समय नपुगी तुहेको बालकझैँ मलाई किन जमिनभित्र लुकाइएन, दिनको उज्‍यालो कहिल्‍यै नदेखेको बालकझैँ?

¹⁷त्‍यहाँ दुष्‍टहरू खल्‍याङ मल्‍याङबाट आराम पाउँछन्, त्‍यहाँ थकितहरू विश्राममा हुन्‍छन्‌।

¹⁸बँधुवाहरू सुखमा रमाउँछन्, र अबोप्रान्‍त कमारा खटाउनेको सोर त्‍यहाँ सुनिँदैन।

¹⁹ठूला र साना त्‍यहाँ छन्, त्‍यहाँ कमारा आफ्‍ना मालिकबाट मुक्त भएको हुन्‍छ।

²⁰“दु:खमा हुनेहरूलाई उज्‍यालो देख्‍न किन दिइन्‍छ? मनमा दिक्‍क हुनेहरूलाई जीवन किन दिइन्‍छ?

²¹तिनीहरूलाई जसले मृत्‍युको प्रतीक्षा गर्दछन्, तर मृत्‍यु आउँदैन, गाड़धन खोजेको भन्‍दा पनि धेरै जोशसँग तिनीहरू मृत्‍यु खोज्‍छन्‌।

²²जुनहरू चिहानमा पुग्‍दा आनन्‍दले मग्‍न हुन्‍छन्‌ र रमाउँछन्‌?

²³परमेश्‍वरले चारैतिर घेरा लगाउनुभएको बाटोमा, जसको बाटो लुकाइएको हुन्‍छ तिनीहरूलाई किन जीवन दिइन्‍छ?

²⁴मेरो भोजनको सट्टा सुस्‍केरा आउँछ, मेरा आर्तनादहरू पानी झैँ मबाट निस्‍कन्‍छन्‌।

²⁵मलाई तर्साउने त्रासहरूले मलाई समातेका छन्, जे-जेदेखि म डराउँछु, ती ममाथि आइपरेका छन्‌।

²⁶मेरो मनमा न त शान्‍ति छ, न मेरो निम्‍ति विश्राम नै छ, तर खलबल मात्र छ।