Read Nepali New Revised Version, 2012 अय्‍यूब 35 Bible Online

अय्‍यूब 35 - Nepali New Revised Version, 2012 bible

अय्‍यूब 35

¹एलीहूले भने:

²“अय्‍यूब के यो न्‍यायसंगत छ? ‘परमेश्‍वरले मलाई सफाइ दिनुहुन्‍छ?’— भनी तपाईं भन्‍नुहुन्‍छ!

³तापनि तपाईं उहाँलाई सोध्‍नुहुन्‍छ, यसबाट मलाई के लाभ, र पाप नगरेर मलाई के फाइदा हुन्‍छ?

⁴“तपाईं र तपाईंका तीन जना मित्रहरूका विरुद्धमा म आफै बहस गर्नेछु।

⁵माथि आकाशमा हेर्नुहोस्‌ र विचार गर्नुहोस्, तपाईंको मास्‍तिरको बादललाई नियालेर हेर्नुहोस्‌।

⁶तपाईंले पाप गर्नुभएको भए त्‍यसले उहाँलाई कसरी असर पार्छ? तपाईंका अधर्म जतिसुकै भए तापनि त्‍यसले उहाँलाई के हुने हो त?

⁷तपाईं धर्मी हुनुभयो भने तपाईंले उहाँलाई के दिनुहुन्‍छ? अथवा तपाईंबाट उहाँलाई के लाभ हुन्‍छ र?

⁸तपाईंका दुष्‍टताले ता तपाईंजस्‍तै मानिसलाई मात्र छुन्‍छ। तपाईंको धार्मिकताले ता मानिसका सन्‍तानलाई मात्र प्रभाव पार्छ।

⁹“अत्‍याचारको भारमा परेर मानिसहरू कराउनेछन्, र ठूलाहरूको शक्तिको विरुद्धमा सहायताको निम्‍ति पुकारा गर्नेछन्‌।

¹⁰तर तिनीहरूमध्‍येका कसैले पनि यसो भनेर सोध्‍दैनन्, ‘मलाई बनाउनु हुने मेरा सृष्‍टिकर्ता कहाँ हुनुहुन्‍छ?— जसले राती गीतहरू दिनुहुन्‍छ,

¹¹जसले हामीलाई पृथ्‍वीका पशुहरूलाई भन्‍दा बढ़ी सिकाउनुहुन्‍छ, र आकाशका चराहरूलाई भन्‍दा हामीलाई अझ बुद्धिमान्‌ तुल्‍याउनुहुन्‍छ?’

¹²मानिसहरूले पुकारा गर्दा उहाँ जवाफ दिनुहुन्‍न, किनभने तिनीहरू अहङ्कारी छन्‌।

¹³साँच्‍चै नै परमेश्‍वरले ती खोक्रा बिन्‍तीलाई सुन्‍नुहुन्‍न, सर्वशक्तिमान्‌ले त्‍यसमाथि ध्‍यानै दिनुहुन्‍न।

¹⁴“जब तपाईं भन्‍नुहुन्‍छ, म उहाँलाई देख्‍दिनँ, उहाँले तपाईंको बिन्‍ती कति कम सुन्‍नुहोला, जब तपाईंको मुद्दा उहाँको अघि छ र तपाईंले उहाँको बाटो हेर्नुपर्छ।

¹⁵परमेश्‍वरको रीसले दण्‍ड दिँदैन, र दुष्‍टतामाथि उहाँले कुनै ध्‍यान दिनुहुन्‍न।

¹⁶यसरी अय्‍यूबले फोस्रा कुरा गर्नुहुन्‍छ, र ज्ञानविनाका शब्‍दहरू मात्र थुपार्नुहुन्‍छ।”