Read Nepali New Revised Version, 2012 अय्‍यूब 41 Bible Online

अय्‍यूब 41 - Nepali New Revised Version, 2012 bible

अय्‍यूब 41

¹के तैंले बल्‍छीले लिव्‍यातन्‌लाई [1] तान्‍न सक्‍छस्‌? अथवा त्‍यसको जिब्रोमा पासोको डोरी लगाउन सक्‍छस्‌?

²के तैंले त्‍यसको नाक छेड़ेर डोरी लगाउन सक्‍छस्‌? अथवा त्‍यसको च्‍यापु बल्‍छीले छेड्‌न सक्‍छ?

³के दयाको लागि त्‍यसले तँसित बिन्‍ती गर्छ? अथवा आफ्‍नो निम्‍ति त्‍यसले तँसित नम्र सोरमा भिक्षा माग्‍छ?

⁴तेरो जीवनभरि नै तेरो कमारा हुनलाई के त्‍यसले तँसित बाचा बाँध्छ र?

⁵चरालाई पालेकोझैँ के तँ त्‍यसलाई पाल्‍न सक्‍छस्‌? अथवा तेरा कमारीहरूका निम्‍ति त्‍यसलाई डोरीले बाँधेर राख्‍न सक्‍छस्‌?

⁶के व्‍यापारीहरूले त्‍यसको निम्‍ति भाउ कसाकस गर्छन्‌ र? अथवा व्‍यापारीहरूले त्‍यसलाई भाग-भाग गर्छन्‌ र?

⁷के तैंले त्‍यसको छालामा भालाले अथवा त्‍यसको टाउकोलाई माछा मार्ने भालाले रोप्‍न सक्‍छस्‌?

⁸यदि तैंले आफ्‍नो हात त्‍यसको विरुद्धमा उठाइस्‌ भने, त्‍यससित लड़ाइँ गर्दा भोग्‍नुपर्ने कठिनाइहरू तैंले सम्‍झिनेछस्‌ र फेरि कहिल्‍यै त्‍यसो गर्ने छैनस्‌?

⁹त्‍यसलाई अधीनमा ल्‍याउने आशा झूट हो, त्‍यसको हेराइले मात्र पनि हताश पार्छ,

¹⁰त्‍यसलाई जगाउन सक्‍ने कोही पनि त्‍यो भन्‍दा भयानक छैन, उसो भए मेरो सामु उभिन सक्‍ने को छ त?

¹¹मैले तिर्नु पर्छ भन्‍ने मेरो विरुद्धमा कसको दाबी छ? स्‍वर्गमुनिका सबै थोक मेरा नै हुन्‌।

¹²“त्‍यसका अङ्गहरू, त्‍यसको बल, र त्‍यसको आकारको सौन्‍दर्यको विषयमा भन्‍न म चुक्‍नेछैन।

¹³त्‍यसको बाहिरको पोशाकलाई कसले उतार्न सक्‍छ? अथवा लगाम लिएर को नजिक जान सक्‍ला?

¹⁴कसले त्‍यसको मुखका ढोकाहरू उघार्न साहस गर्ला? किनभने त्‍यसका दाँतका लहरहरू डरलाग्‍दा हुन्‍छन्‌।

¹⁵दर्शन-ढुङ्गाको पर्खालले घेरिएको जस्‍तै ढालका लहर टम्‍म जोड़ेर राखेको जस्‍तै त्‍यसको ढाड़ हुन्‍छ।

¹⁶त्‍यो एउटामाथि अर्को खापाखाप भएर रहेको हुन्‍छ र हावा पनि त्‍यसको बीचबाट छिर्न सक्‍दैन।

¹⁷ती एक-अर्कासँग यस्‍तो प्रकारले टाँसिएर बसेका हुन्‍छन्‌ कि तिनीहरू कसै गरेर पनि छुट्टिन सक्‍दैनन्‌।

¹⁸त्‍यसले छिउँ काढ्‌दा ज्‍वाला निकाल्‍छ, र त्‍यसका आँखा सूर्योदयजस्‍तै चम्‍कन्‍छन्‌।

¹⁹त्‍यसको मुखबाट राँको र झिल्‍काहरू धाराजस्‍तै निस्‍कन्‍छन्‌।

²⁰पूरा दाउराको आगोमाथि उम्‍लदै गरेको कराही राखेझैँ त्‍यसका नाकका प्‍वालबाट धूवाँ निस्‍कन्‍छ।

²¹त्‍यसको सासले झन्‌ कोइलालाई बालिदिन्‍छ, र त्‍यसको मुखबाट आगोको ज्‍वाला चम्‍कन्‍छ।

²²त्‍यसको घिच्रोमा बल भरिएको हुन्‍छ, आपद्‌ त्‍यसको अघि-अघि जान्‍छ

²³त्‍यसको मासु बटारिएको हुन्‍छ, केही कुराले थिचिए तापनि त्‍यो दबिदैन।

²⁴त्‍यसको छाती ढुङ्गाजस्‍तै कड़ा हुन्‍छ, जाँतोको तल्‍लो पाटाझैँ त्‍यो दृढ़ हुन्‍छ।

²⁵त्‍यो खड़ा हुँदा वीर मानिसहरू पनि डराउँछन्, त्‍यसको हमलामा तिनीहरू पछि हट्‌छन्‌।

²⁶तरवार अथवा भाला, चुपी वा बर्छाले त्‍यसलाई घोच्‍यो भने पनि त्‍यसको केही असर हुँदैन।

²⁷फलामलाई त त्‍यसले परालजस्‍तै ठान्‍छ, वा काँसा त्‍यसको निम्‍ति कुहेको काठझैँ हुन्‍छ।

²⁸कुनै पनि काँड़ले त्‍यसलाई भगाउन सक्‍दैन, घुयेँत्रोको ढुङ्गा त्‍यसको लागि भुसजस्‍तै हुन्‍छ।

²⁹मुङ्‌ग्रो त्‍यसको निम्‍ति निगालोजस्‍तो मात्र हुन्‍छ, बर्छा चलाउँदा ता त्‍यो हाँसिदिन्‍छ।

³⁰त्‍यसका नङ्‌ग्रा तिखा-तिखा खपटाजस्‍तै छन्, त्‍यो हिँड्‌दा हिलोलाई दाउने दाँदेझैँ यताउता घोल्‍छ!

³¹त्‍यसले गहिरो पानीलाई कराहीको पानीजस्‍तै उमाल्‍छ, र भाँड़ामा मलहम घोलेझैँ त्‍यसले समुद्रलाई घोल्‍छ।

³²त्‍यो हिँड्‌दा त्‍यसले आफूपछि झल्‍किने दाग छोड़िराख्‍छ, महानदीको सेतो केश भएजस्‍तै लाग्‍छ?

³³पृथ्‍वीमा त्‍यसको बराबरी कोही छैन, किनभने त्‍यो ता डरविनाको प्राणी हो।

³⁴त्‍यसले सबै हठीहरूलाई तुच्‍छ दृष्‍टिले हेर्छ, त्‍यो त सबै घमण्‍डीहरूको राजा हो।”