Read Nepali New Revised Version, 2012 अय्‍यूब 5 Bible Online

अय्‍यूब 5 - Nepali New Revised Version, 2012 bible

अय्‍यूब 5

¹“चाहनुहुन्‍छ भने बोलाएर हेर्नुहोस्, तर तपाईंलाई कसले जवाफ दिन्‍छ? कुन पवित्र जनहरूतिर तपाईं फर्कनुहुनेछ?

²रीसले मूर्खलाई मार्छ, अनि ईर्ष्‍याले सोझाहरूलाई।

³मूर्खले जरा गाड़ेको मैले देखेको छु, तर त्‍यसको घर एक्‍कासि श्रापित भयो।

⁴त्‍यसका बालकहरू सुरक्षित नभएका, अदालतमा प्रतिवाद गरिदिने कोही नभई पेलिएका मैले देखेको छु।

⁵त्‍यसले कटनी गरेको फसल भोकाहरूले खान्‍छन्, काँढ़ाहरूका बीचबाट उम्रेका पनि बटुलेर लान्‍छन्, तिर्खाएकाहरूले त्‍यसका धन-सम्‍पत्तिको तृष्‍णा गर्छन्‌।

⁶किनकि माटोबाट कष्‍ट उब्‍जँदैन, न त जमिनबाट दु:ख उत्‍पन्‍न हुन्‍छ।

⁷आगोको फिलिङ्गो माथि उड़ेझैँ, मानिस पनि दु:खकै लागि जन्‍मन्‍छ।

⁸“तर यदि म भएको भए, म मेरो अर्जी परमेश्‍वरमा नै चढ़ाउने थिएँ, र मेरो मामिला उहाँकै सामुन्‍ने राख्‍नेथिएँ।

⁹उहाँले महान्‌ र बुझ्‍न नसकिने कार्यहरू, अनगन्‍ती आश्‍चर्यकर्महरू गर्नुहुन्‍छ।

¹⁰उहाँले पृथ्‍वीमा पानी वर्षाउनुहुन्‍छ, र खेतहरूमा पानी पठाउनुहुन्‍छ।

¹¹उहाँले नम्रहरूलाई उच्‍च पार्नुहुन्‍छ, र शोक गर्नेहरूलाई सुरक्षामा उचाल्‍नुहुनेछ,

¹²धूर्तहरूका युक्तिलाई उहाँले विफल गराउनुहुन्‍छ, अनि तिनीहरूले सफलता पाउँदैनन्‌।

¹³उहाँले ज्ञानीहरूलाई तिनीहरूका चलाकीमा पक्रनुहुन्‍छ, र धूर्तहरूका योजना खलबल पारिदिनुहुन्‍छ।

¹⁴तिनीहरूमाथि दिउँसै अन्‍धकार आइलाग्‍छन्, र मध्‍यदिनमा तिनीहरू रातमा झैँ छामेर हिँड्‌छन्‌।

¹⁵उहाँले दरिद्रहरूलाई तिनीहरूको मुखमा भएको तरवारदेखि र कङ्गालीहरूलाई बलियाहरूका पन्‍जादेखि जोगाउनुहुन्‍छ।

¹⁶यसैले गरीबहरूको आशा हुन्‍छ, र अन्‍यायले आफ्‍नो मुख बन्‍द गर्नेछ।

¹⁷“त्‍यो मानिस धन्‍यको हो, जसलाई परमेश्‍वरले चेताउनुहुन्‍छ। यसकारण सर्वशक्तिमान्‌को अनुशासनलाई इन्‍कार नगर।

¹⁸किनभने उहाँले चोट पार्नुहुन्‍छ, तर उहाँले पट्टी बाँध्‍नुहुन्‍छ, उहाँले चोट पार्नुहुन्‍छ, तर उहाँको हातले निको पनि पार्नुहुन्‍छ।

¹⁹छ पल्‍ट तिमीमाथि आपत्‌ आइपरे तापनि उहाँले तिमीलाई बचाउनुहुनेछ, सात पल्‍टको हानिले पनि तिमीलाई छुनेछैन।

²⁰अनिकालको बेलामा उहाँले तिमीलाई मृत्‍युबाट बचाउनुहुनेछ, उहाँले तिमीलाई युद्धमा तरवारबाट जोगाउनुहुनेछ।

²¹उहाँले तिमीलाई निन्‍दाको कोर्राबाट सुरक्षित राख्‍नुहुनेछ, विनाश आउँदा तिमी डराउनुपर्नेछैन।

²²विनाश र अनिकालमाथि तिमी हाँस्‍ने छौ, अनि जङ्गली जनावरहरूदेखि तिमी डराउनुपर्नेछैन।

²³खेतका ढुङ्गाहरूसित तिमी वाचा बाँध्‍नेछौ र वन-पशुहरूले तिमीसँग मेलमिलाप राख्‍नेछन्‌।

²⁴तिम्रो पाल सुरक्षित छ भनी तिमीलाई थाहा हुनेछ, र तिमीले आफ्‍ना बगालको सम्‍पत्तिको लेखा राख्‍दा केही अभाव पाउनेछैनौ।

²⁵तिम्रा सन्‍तान-दरसन्‍तानहरू धेरै भएका र तिम्रा छोराछोरीहरू जमिनका घाँसहरूझैँ भएका तिमीलाई थाहा हुनेछ।

²⁶आफ्‍नो ठीक ऋतुमा खलामा बाली आएझैँ पूरा वृद्धावस्‍थामा तिमी आफ्‍नो मृत्‍युमा पुग्‍नेछौ।

²⁷“हामीले यी सबै जाँचेका छौं, र यो सत्‍य हो। यसैले यो सुन्‍नुहोस्, अनि आफूमा त्‍यो लागू गर्नुहोस्‌।”