Read Nepali New Revised Version, 2012 अय्‍यूब 7 Bible Online

अय्‍यूब 7 - Nepali New Revised Version, 2012 bible

अय्‍यूब 7

¹के पृथ्‍वीमा मानिसले कठिन कार्य गर्नुपर्दैन? अनि के त्‍यसका दिनहरू ज्‍यालामा काम गर्नेहरूका जस्‍तै छैनन्‌ र?

²बेलुकीको शीतल छाया खोज्‍ने दासले झैँ अथवा आफ्‍नो ज्‍यालाको निम्‍ति उत्‍सुकतापूर्वक पर्खिरहने नोकरझैँ,

³यस्‍तै व्‍यर्थका महिना मेरा भाग भएका छन्, दु:खका रातहरू मेरो निम्‍ति ठहराइएका छन्‌।

⁴जब म ढल्‍कन्‍छु, तब म विचार गर्दछु, कहिले उज्‍यालो हुन्‍छ, र म उठूँ? रात लामो हुन्‍छ र मिरमिरे उज्‍यालो नहोउञ्‍जेल, म यताउता छटपटाइरहन्‍छु।

⁵मेरो शरीर कीरै-कीराले र पाप्राले भरिएको छ, र मेरो छालामा चिराचिरा परेर पीप निस्‍कन्‍छ।

⁶जुलाहाको थुरीभन्‍दा चाँड़ो मेरा दिन बित्‍छन्, मेरा दिनहरू आशाविना अन्‍त हुन्‍छन्‌।

⁷हे परमेश्‍वर, मेरो जीवन ता हावाको एक झोँक्‍का मात्र हो भनी सम्‍झनुहोस्‌। मैले फेरि सुदिन देख्‍न पाउनेछैनँ।

⁸अहिले मलाई देख्‍ने आँखाले फेरि कहिल्‍यै देख्‍नेछैन, तपाईंले मलाई खोज्‍नुहुनेछ, तर म लोप भइहाल्‍नेछु।

⁹जसरी बादल फाटेर छताछुल्‍ल र लोप हुन्‍छ, त्‍यसरी नै चिहानमा [1] जाने फेरि कहिल्‍यै फर्कनेछैन।

¹⁰त्‍यो फेरि कहिल्‍यै घरमा फर्केर आउँदैन, अनि त्‍यसलाई चिन्‍नेहरूले त्‍यसलाई बिर्सनेछन्‌।

¹¹“यसकारण म चूप लागि बस्‍नेछैनँ, मेरो मनको पीरमा म बोल्‍नेछु, मेरो प्राणको व्‍याकुलतामा म उजूर गर्नेछु,

¹²के म समुद्र हुँ? अथवा समुद्रको भयानक जन्‍तु हुँ? र तपाईं मलाई पहराको निगरानीमा राख्‍नुहुन्‍छ?

¹³मेरो ओछ्यानमा म सान्‍त्‍वना पाउँछु, र निद्राले मलाई मेरो कष्‍टबाट छुटकारा दिन्‍छ भनी जब म सम्‍झन्‍छु,

¹⁴तब तपाईंले मलाई सपनाले तर्साउनुहुन्‍छ, र दर्शनहरूद्वारा तपाईं मलाई डर देखाउनुहुन्‍छ।

¹⁵यसरी म यो मेरो शरीरभन्‍दा निमोठ्याई र मृत्‍युलाई रुचाउँछु।

¹⁶म मेरो जीवनलाई घृणा गर्दछु, बाँचिरहने मेरो इच्‍छा छैन। मलाई छोड़िदिनुहोस्, किनभने मेरो जीवनको अर्थ छैन।

¹⁷“मानिस के हो र तपाईं त्‍यसको यति धेरै ख्‍याल गर्नुहुन्‍छ? अनि तपाईं त्‍यसको यति धेरै फिक्री गर्नुहुन्‍छ?

¹⁸बिहानैपिच्‍छे त्‍यसलाई तपाईं परीक्षा गर्नुहुन्‍छ? अथवा प्रतिक्षण त्‍यसको जाँच गर्नुहुन्‍छ?

¹⁹के एक क्षण पनि तपाईं मबाट अन्‍त कतै हेर्नुहुन्‍न? अथवा मलाई एकलै छोड्‌नुहुन्‍न।

²⁰हे मानिसहरूका हृदय जाँच्‍नुहुने, यदि मैले पाप गरेको भए, मैले कसरी तपाईंको हानि गरें त? तपाईंले किन मलाई आफ्‍नो निशाना बनाउनुभयो? के म तपाईंको निम्‍ति बोझ भएको छु?

²¹तपाईं किन मेरो अपराध माफ गर्नुहुन्‍न र मेरा पाप क्षमा गर्नुहुन्‍न? किनकि चाँड़ै म चिहानमा सुतिजानेछु, तपाईंले मलाई खोज्‍नुहुँदा पनि मलाई पाउनुहुनेछैन।”