Read Nepali New Revised Version, 2012 भजनसंग्रह 104 Bible Online

भजनसंग्रह 104 - Nepali New Revised Version, 2012 bible

भजनसंग्रह 104

¹ए मेरो प्राण, परमप्रभुको प्रशंसा गर्‌। हे परमप्रभु मेरा परमेश्‍वर, तपाईं अति महान्‌ हुनुहुन्‍छ। तपाईं वैभव र ऐश्‍वर्यमा विभूषित हुनुहुन्‍छ।

²उहाँले प्रकाशलाई पोशाकझैँ पहिरनुभएको छ, उहाँले आकाशलाई पालजस्‍तै टाँग्‍नुभएको छ।

³उहाँले आफ्‍ना कोठाहरूका दलिनहरू पानीमाथि स्‍थिर गर्नुहुन्‍छ। उहाँले बादललाई आफ्‍नो रथ तुल्‍याउनुहुन्‍छ, र बतासका पखेटामाथि उहाँ सवार हुनुहुन्‍छ।

⁴उहाँले बतासलाई आफ्‍नो दूत, र आगोका ज्‍वालालाई आफ्‍ना सेवक तुल्‍याउनुहुन्‍छ।

⁵पृथ्‍वी कहिल्‍यै नडग्‍मगाओस्‌ भनेर त्‍यसलाई उहाँले जगमाथि स्‍थिर पार्नुभयो।

⁶तपाईंले त्‍यसलाई वस्‍त्रझैँ गहिरो समुद्रले ढाक्‍नुभयो, अनि पहाड़हरू माथि-माथिसम्‍म जल पुग्‍यो।

⁷तर तपाईंको खप्‍कीमा पानी भागिहाल्‍यो, तपाईंका गर्जनको आवाजमा त्‍यो तुरुन्‍तै हटिगयो।

⁸तपाईंले खटाउनुभएको स्‍थानमा जलराशि, पहाड़हरूमाथि उर्लंदै घाटी र बेँसीतिर झर्‍यो।

⁹पानीले फेरि पृथ्‍वीलाई नडुबाओस्‌ भनेर त्‍यसले नाघ्‍‌न नसक्‍ने सिमाना तपाईंले राखिदिनुभयो।

¹⁰उहाँले पानीका मूलहरूलाई खोल्‍सामा पानी खन्‍याउन लगाउनुहुन्‍छ, त्‍यो पानी पहाड़का बीचबाट बग्छ।

¹¹तिनीहरूले मैदानका सबै जीवजन्‍तुलाई पानी दिन्‍छन्‌। जङ्गली गधाहरूले पनि आफ्‍नो तिर्खा मार्दछन्‌।

¹²तिनीहरूकै छेउछाउमा आकाशका चराहरूले आफ्‍नो गुँड़ बनाउँछन्‌, हाँगाहरूका बीचमा तिनीहरू गीत गाउँछन्‌।

¹³उहाँले आफ्‍नो उच्‍च स्‍थानबाट पहाड़हरूमा पानी बर्साउनुहुन्‍छ, उहाँका कार्यहरूका फलबाट पृथ्‍वी तृप्‍त हुन्‍छ।

¹⁴उहाँले गाईबस्‍तुका निम्‍ति घाँस, अनि मानिसहरूका निम्‍ति रूखपात उमार्नुहुन्‍छ, र जमिनबाट आहार ल्‍याउनुहुन्‍छ:

¹⁵मानिसको मन आनन्‍दित गराउनलाई दाखमद्य, र त्‍यसको अनुहार चहकिलो पार्नलाई तेल, र त्‍यसको हृदय बलियो तुल्‍याउनलाई रोटी उहाँले दिनुहुन्‍छ।

¹⁶परमप्रभुले लाउनुभएका वृक्षहरू र लेबनानका देवदारुहरूले मनग्‍य पानी पाएका छन्‌।

¹⁷त्‍यहाँ चराहरूले आफ्‍नो गुँड़ बनाउँछन्‌, सारसले चाहिँ सल्‍लाका रूखहरूमा आफ्‍नो घर बनाउँछ।

¹⁸अल्‍गा-अल्‍गा पहाड़हरू जङ्गली बाख्राहरूका निम्‍ति छन्‌, पहराहरू जङ्गली शापनहरूका निम्‍ति शरणस्‍थान हुन्‍छन्‌।

¹⁹चन्‍द्रमाले ऋतु ठहराउँछ, सूर्यलाई आफ्‍नो अस्‍ताउने बेला थाहा हुन्‍छ।

²⁰तपाईंले अन्‍धकार ल्‍याउनुहुन्‍छ, र रात पर्छ, अनि वनका सबै पशुहरू निस्‍किआउँछन्‌।

²¹सिंहहरू आफ्‍नो शिकारको निम्‍ति गर्जन्‍छन्‌, तिनीहरूले परमेश्‍वरबाट आफ्‍नो आहार खोज्‍छन्‌।

²²सूर्य उदाउँदा ती गइहाल्‍छन्‌, र आफ्‍नो ओड़ारमा गएर लेट्‌छन्‌।

²³तब मानिस आफ्‍नो कामतिर जान्‍छ, र साँझसम्‍म परिश्रम गर्छ।

²⁴हे परमप्रभु, तपाईंका कार्यहरू अनेक छन्‌, आफ्‍नो बुद्धिमा तपाईंले ती सबै रच्‍नुभयो। तपाईंले सृष्‍टि गर्नुभएका यावत्‌ थोकले पृथ्‍वी परिपूर्ण छ।

²⁵त्‍यहाँ विशाल र फराकिलो समुद्र छ, जसमा अनगिन्‍ती जलचरहरू छन्‌, ठूला-साना दुवै थरीका जीवित प्राणीहरू त्‍यहाँ छन्‌।

²⁶त्‍यहाँ जहाजहरू यताउता जान्‍छन्‌। त्‍यहाँ लिव्‍यातन्‌ जन्‍तु पनि छ, जसलाई तपाईंले त्‍यहाँ खेल्‍नलाई रच्‍नुभयो।

²⁷तपाईंबाट आफ्‍ना आहारा ठीक-ठीक समयमा पाउनका निम्‍ति ती सबैले तपाईंतिरै हेरेर आशा राख्‍छन्‌।

²⁸तपाईंले तिनीहरूलाई दिनुहुँदा, तिनीहरूले बटुल्‍छन्‌। तपाईंले आफ्‍नो मुट्ठी फुकाउनुहुँदा उत्तम पदार्थले तिनीहरू तृप्‍त हुन्‍छन्‌।

²⁹तपाईंले आफ्‍नो मुहार छोप्‍नुहुँदा तिनीहरू भयभीत हुन्‍छन्‌। तपाईंले तिनीहरूको सास लिनुहुँदा, ती मरिहाल्‍छन्‌, र फेरि धूलोमा नै फर्कन्‍छन्‌।

³⁰तपाईंले आफ्‍ना आत्‍मा पठाउनुहुँदा, तिनीहरूको सृष्‍टि हुन्‍छ, र तपाईंले पृथ्‍वीको रूपलाई नयाँ तुल्‍याउनुहुन्‍छ।

³¹परमप्रभुको महिमा सदा भइरहोस्‌, परमप्रभु आफ्‍ना कार्यहरूमा प्रसन्‍न होऊन्‌।

³²तपाईंको दृष्‍टि पर्दा पृथ्‍वी कम्‍पायमान हुन्‍छ, तपाईंको स्‍पर्शमा मात्र पहाड़हरूबाट धूवाँ निस्‍कन्‍छ।

³³मेरो जीवनभरि म परमप्रभुको भजन गाउँदैरहनेछु, म बाँचुञ्‍जेल मेरा परमेश्‍वरमा प्रशंसाको स्‍तुति गाउनेछु।

³⁴मेरो चिन्‍तनमनन उहाँलाई मन परोस्‌, किनकि म परमप्रभुमा आनन्‍दित हुन्‍छु।

³⁵तर पापीहरू पृथ्‍वीबाट विलोप भइजाऊन्‌, र दुष्‍टहरू फेरि कहिल्‍यै नरहून्‌। हे मेरो प्राण, परमप्रभुको स्‍तुति गर्‌। परमप्रभुको प्रशंसा गर्‌।